傳福音

葛培理喺佈道會傳福音

傳福音，又叫作見證，天主教叫福傳，係指同人分享耶穌基督嘅「福音」（通用希臘語：εὐαγγέλιον）——即人類因耶穌犧牲頂罪而得赦免嘅「好消息」。傳福音嘅目的通常係為咗引導人相信耶穌，而傳嘅方法有好多種，包括咗人同人交談、公開講道、用媒體等，同宣教工作唇齒相依。

《聖經》講過，耶穌曾經吩咐使徒同埋教會「往普天下去，傳福音給萬民聽」（馬可福音16:15），並預言咗「奉他的名傳悔改、赦罪的道⋯傳到萬邦」（路加福音24:47）。保羅喺彼西底安提阿都講過：「赦罪的道是（藉著耶穌）傳給你們的」（使徒行傳13:38–39），應驗咗耶穌嘅預告。耶穌復活之後亦再命令門徒向所有人宣告赦罪嘅好消息。到今日，教會仍然透過《聖經》上面嘅文字，同埋用信徒親口講去延續呢個使命，無論係牧者或者係其他信徒，都要咩起呢個任務。聖經亦都教導：「我們作基督的使者，就好像神藉我們勸你們一般。我們替基督求你們與神和好。」（哥林多後書5:20），上帝差派佢嘅使者傳達「與神和好」嘅信息，亦就係叫聽嘅人相信佢已經因耶穌嘅頂罪而得到赦免。

傳統基督新教認為，傳福音時所講嘅並唔係「赦罪嘅可能」，而係正式宣告「人被判無罪」（稱義）。耶穌差派信徒去宣講嘅，係已成事實嘅好消息，而唔係「可能性」。聖經清楚吩咐人傳福音，而能夠向人宣告赦罪嘅福音，係好大嘅榮幸（羅馬書10:15）。新教神學好強調上帝呢一個無罪宣判，係一個全靠基督嘅功勞同埋上帝旨意嘅既定事實，福音係「已經成就嘅好消息」。

無論係身處本地社區定係海外宣教工場，專心傳福音嘅基督徒好多時都被稱為福音使者（evangelists），有啲宗派更加會將呢類人士統稱為宣教士（missionaries），亦有啲教會當福音使者係佢哋嘅領袖，負責埋講道甚至教會管理。

簡介

傳福音係基督徒嘅重要使命。新約聖經有幾個章節提到基督徒傳福音嘅重要性：「你哋去普天下，傳福音畀萬民聽」（《馬可福音》第16章第15節），「我冇理由為傳福音而誇口，我不過係奉名去傳；若果唔傳福音，我就有禍咯」（《哥林多前書》第9章第16節）。

傳福音嘅內容大體上係以耶穌基督為中心同聖經經文，主要係強調救恩嘅內容，通常亦會涉及關於原罪同大審判等有關基督教神學內容，亦可能會有更貼近聽者生活嘅內容。唔同嘅基督教團體所傳講嘅教義內容並唔係完全相同，有時甚至會有較大嘅差別。

方法

基督徒傳福音嘅方法有好多種，最常見嘅包括：三福、四律、五色佈道法等。有啲教會亦會印製一啲小冊子，派畀慕道者或者路人。

傳福音嘅方式，隨住時代同社會嘅轉變而有唔同嘅方式，進入工業化時代前，基督徒多數係到處演講、派發單張、創作音樂等方式嚟傳播福音。現代傳福音嘅方式就相當多樣化，除咗傳統方式之外，流行音樂、傳媒、營會亦經常俾基督徒運用，貼近普羅大眾嘅生活，令人更容易接解到福音。

睇埋

• 啟發課程