內捲化

內捲化（英文：involution，又叫做內卷）係一個中國大陸網絡潮語，嚟自社會學嘅概念「內捲化」（involution，又叫做過密化），意思其實係「向內演化」，用嚟形容社會文化嘅重複勞作、發展遲鈍，社會無進一步發展嘅空間。簡單啲講，某個社會或者文化發展到最終形態之後，無辦法再進化落去，只能夠喺一個簡單嘅層次上面重複作業，所以想發展落去，只能夠令到內部更加複雜。「內捲」造成嘅內部更加複雜，並唔等於更高級，或更先進，而係造成惡性競爭同埋內鬥。

喺中國，內卷俾網民用嚟形容唔健康、白熱化嘅競爭，亦即係喺資源有限嘅情況之下，啲人為咗得到資源，於是就會進行一啲非理性嘅競爭，造成過度競爭，資源唔能夠有效咁用到。內卷同「內耗」唔同，內卷係一種長期嘅社會現象，而內耗式嘅危機唔會長期存在，只喺短期嘅社會現象。

內卷呢個詞嘅來源

最早將「內卷」呢個詞引入中文世界嘅係中國嘅歷史社會學家黃宗智。佢喺1985年出版嘅《華北的小農經濟與社會變遷》嗰度提到中國嘅小農經濟，勞動力過多，土地又有限，形成咗「過密化成長」。黃宗智發現，單一勞動力單位嘅產出，已經出現邊際生產率遞減嘅情況，即係話，投入土地勞動嘅人越多，平均每個人就越窮，可以話係內耗，黃宗智將呢個現象叫做「內卷」。