全盒

全盒

全盒，正寫攢盒，係漢字文化圈過農曆新年嗰時擺嘅盒，入面裝住甜嘅嘢食，傳統上有糖蓮子、糖冬瓜、糖蓮藕、糖椰絲、糖椰角、糖柑桔、糖馬蹄‎、糖甘筍（合稱「八甜」），重會有瓜子、開心果、笑口棗、油角、煎堆等，而新派就有朱古力金幣、瑞士糖同其他糖。客人拜年時主人家會攞個全盒畀人拎啲嘢食，叫做搲銀。

名

「攢盒」個「攢」解做「聚合唔同嘅嘢」，而攢盒正正就係集合咗唔同款式嘅甜食。由於粵語入面「攢」同「全」同音，好多人都寫做「全盒」，攞「十全十美」、「齊齊全全」嘅意思。