共同富裕
共同富裕（英文：common prosperity[1]），係中華人民共和國政治術語，指全體社會成員都過住幸福、富裕、美好嘅物質同文化生活，係中華人民共和國發展社會主義市場經濟嘅根本目標[2]。
歷屆領導人對概念嘅態度
[編輯]1978年12月中共十一屆三中全會召開之後，鄧小平總結咗國內國際建設社會主義嘅教訓，深入探索咗共同富裕思想[3]。1985年3月，喺全國科技工作會議上面，中共中央顧問委員會主任鄧小平指出：「社會主義嘅目的就係要全國人民共同富裕，唔係兩極分化。」1985年9月、1990年12月、1992年初，鄧小平又多次提到共同富裕。佢認為，共同富裕係社會主義同資本主義嘅區別：「如果走資本主義道路，可以令到中國百分之幾嘅人富裕起身，但係絕對解決唔到百分之九十幾嘅人生活富裕嘅問題。而堅持社會主義，實行按勞分配原則，就唔會產生貧富過大嘅差距。」[3]
鄧小平認為，共同富裕係分階段嘅，可以用市場機制作為工具進行建設[4]，而唔係同步富裕。佢提倡一部分有條件嘅地區、一部分人先富裕起身，帶動同幫助落後嘅地區同人民，最終實現共同富裕[5]。同步富裕係要求全體社會成員喺同一時間，同平均分配嘅辦法，消除生活水平差距[4]。鄧小平認為，平均發展係唔可能嘅，實際上係共同落後，共同貧窮[3]。佢話：「農村、城市都要畀一部分人先富起身，勤勞致富係正當嘅。」（又叫先富論）先富帶動後富，逐步走向共同富裕。但同時，應采取社會主義嘅措施，預防兩極分化嘅狀況[3]。鄧小平重認為，共同富裕係物質同精神富裕相統一嘅[3]。江澤民、胡錦濤兩任中共中央總書記嘅政治思想入面，都提到過共同富裕嘅重要意義[3]。
《習近平思想》入面包含「精准扶貧」嘅思想。呢一個思想認為，有能力、有條件發展經濟嘅人能脫貧致富嘅同時，亦要畀發展成果更多更公平咁惠及廣大貧困群眾，幫助冇能力同條件或者暫時冇能力條件發展嘅人實現發展，實現共同富裕[6]。另外，中共中央總書記習近平喺2021年8月嘅中央財經委員會第十次會議同中共中央政治局會議上，再次提到共同富裕係中國式現代化嘅重要特徵，提出「要構建初次分配、再分配、三次分配協調配套嘅基礎性制度安排，形成中間大、兩頭小嘅橄欖型分配結構。」[7]。為咗回應習近平嘅號召，中國科技巨頭騰訊宣布投資500億組建「共同富裕專項計劃」[8]。拼多多亦喺2021年8月24號承諾將上季同未來幾季潛在獲利，投入農業發展，直至投資100億元。[9]中央財經委員會辦公室負責人就表示唔會搞「殺富濟貧」[10]。
外間對共同富裕嘅評論
[編輯]習近平嘅政策引起外界嘅質疑，認為中國政府係搞「國進民退」。美國投資者佐治·索羅斯批評習近平對民營企業嘅控制同打壓，話佢根本唔了解市場係點樣運作，只係將所有中國企業視為一黨制國家嘅工具[11]。
2021年10月15號，馬來西亞歌手黃明志同陳芳語推出歌曲《玻璃心》，歌詞除咗揶揄中國大陸網民玻璃心心態之外，亦有提及共同富裕同維吾爾族種族滅絕等中國社會人權問題[12]。
2021年11月頭，香港馬主蘇啟聲名下叫做Nowitzki嘅賽駒起名做「共同富裕」（「大震撼」嘅子嗣），引起馬迷廣泛關注，但係呢匹容天鵬馬房賽駒喺香港出賽6次，全部跑唔入獎金名次，重喺2022年7月14號結束喺香港嘅競賽生涯。
睇埋
[編輯]參考
[編輯]- ↑ 新華社 (2020-11-03)。"Xi Focus: Xi says China to further promote common prosperity"。新華社。原先內容歸檔喺2021-03-01。喺2021-07-15搵到。
- ↑ 汪嘯風,市場經濟大辭典,湖南出版社,1994年01月第1版,第55頁
- ↑ 3.0 3.1 3.2 3.3 3.4 3.5 余永躍、王世明。〈論鄧小平共同富裕思想的理論來源及其發展〉。《科學社會主義》。原先內容歸檔喺2020-04-08。喺2018-08-10搵到。
- ↑ 4.0 4.1 汪嘯風,市場經濟大辭典,湖南出版社,1994年01月第1版,第55頁
- ↑ 李長福主編,鄧小平理論辭典,中國文史出版社,2004年08月第1版,第367頁
- ↑ 李國祥 (2016-02-09)。〈習近平精准扶貧精准脫貧思想的實踐和理論意義--時政--人民網〉。《人民網》。原先內容歸檔喺2017-02-25。喺2018-08-10搵到。
- ↑ 〈中國領導人要重新分配財富 "調節過高收入"引熱議〉。《德國之聲中文網》。2021-08-18。原先內容歸檔喺2021-08-21。喺2021-08-19搵到。
- ↑ 〈騰訊再投500億助力共同富裕〉。《聯合早報》。2021-08-19。原先內容歸檔喺2021-08-19。喺2021-08-19搵到。
- ↑ 〈拼多多承諾拿出100億元人民幣利潤 投資中國農業發展〉。《香港01》。2021-08-24。
- ↑ 〈韓文秀：共同富裕要靠共同奮鬥 不搞"殺富濟貧"-中新網〉。www.chinanews.com。喺2021-08-30搵到。
- ↑ 小山 (2021-08-30)。〈索羅斯：習近平治下的中國投資者面臨棒喝驚醒〉。《法國國際廣播電台》。原著喺2021-08-30歸檔。喺2021-08-30搵到。
- ↑ 民間全民電視公司 (2021-10-16)。〈「辱華神曲」讓小粉紅玻璃心碎！黃明志、陳芳語「不到1天」微博遭封〉。《民視新聞網》 (繁體中文)。喺2021-10-17搵到。
- ↑ 〈中国的全面小康--时政--人民网〉。politics.people.com.cn。喺2021-11-11搵到。