分佈語義學

分佈語義學（粵拼：fan1 bou3 jyu5 ji6 hok6）係一種研究語義嘅大方向。分佈語義學研究者會睇大量嘅語言數據，留意隻語言啲嘢（例如字詞）嘅分佈性質，從而量化噉研究語言嘅語義。呢套研究基於語言學上嘅分佈假說。

分佈假說

語義分佈假說^{[e 1]}個諗頭係講語言點樣表達意思嘅。呢套學說講，要決定一隻字詞嘅語義，可以睇吓佢傾向同邊啲字詞「可互換」^[1]，用粵語語句做例子：

「個差人拉咗個賊。」

「個警察拉咗個賊。」

差人同警察喺（例如）99% 嘅情況下都可互換，就算將差人換做警察，句嘢嘅合理度都唔會變。相比之下，差人同女警嘅可互換度會低啲，可能得 50%，而差人同蘋果嘅可互換度就仲低。

根據語義分佈假說，研究者可以畀電腦讀取極之大量——講緊幾億字咁多——嘅合理語句，就達到教電腦學識理解語言背後嘅意思。呢點就係大語言模型^{[e 2]}背後嘅原理。