列子 (書)
呢篇文章講嘅係書籍。想搵其作者，請睇「列禦寇」。《列子》（粵拼：lit6 zi2）係春秋戰國時期嘅道家學者列禦寇所寫嘅一本書，又名《沖虛經》或者《沖虛真經》。全書包括《天瑞》、《黃帝》、《周穆王》、《仲尼》、《湯問》、《力命》、《楊朱》同《說符》八篇，紀錄咗好多出名嘅故事，寓言同神話都有，例如係杞人憂天、愚公移山同夸父逐日呀噉。呢本書講嗰啲故仔，帶有可以警惕世人嘅教訓，而且仲有一定嘅文學價值，係道家嘅重要經典之一。
|
僞書爭議
[編輯]有啲人認為《列子》嘅原著喺西漢之後就已經失傳咗，唐朝嘅柳宗元已經懷疑過呢本書嘅來源。[1]姚際恆嘅《古今僞書考》首先認為《列子》係僞書，話而家現存嘅《列子》已經唔係原著，而係晉朝人將道家嘅思想湊埋寫出嚟嘅。好多學者，包括高似孫[2]、黃震[3]、葉大慶[4]、錢大昕[5]、姚鼐[6]、何治運[7]、俞正燮[8]、吳德旋[9]、汪繼培[10]、鈕樹玉[11]、章炳麟[12]、陳三立[13]、梁啟超[14]等人都認為呢本書係假嘅。楊柏峻嘅《列子集釋》入面有一段〈辨偽文字輯略〉，引用咗朱熹嘅〈觀列子偶書〉嚟證明呢本書係偽作，話《列子》抄咗佛經。但係其實朱熹嘅意見正好相反，佢認為係佛經抄《列子》。馬敘倫喺《列子僞書考》入面話，《列子》出現得遲但亡失得早，魏晉之後啲好事之徒將其他典籍嘅內容收集埋一齊，再加啲後來嘅說法，借劉向嘅序言增加權威性。錢鍾書喺《管錐編》指出《列子》受到佛教思想影響，認為係魏晉時期嘅僞書，不過佢又話《列子》全書「竄取佛說，聲色不動」，「能脫胎換骨，不粘皮帶骨」[15]。而家現存嘅《列子》注本有晉代張湛注嘅《沖虛至德真經》八卷[16]，清朝已經有人懷疑係張湛嘅作品。[17]章太炎認為而家嘅《文子》同《列子》「同出一手」，所以「疑即張湛僞造」。[18]季羨林仲指出《列子》嘅作者係張湛，話《列子·湯問篇》第五其實係抄咗太康年間竺法護翻譯嘅《生經》卷第三，源自印度神話《國王五人經》裏面機關木人嘅故事。[19]呢本書嘅完成時間一定唔會早過太康六年（285年）。[20]季羨林請教過胡適，胡適都認為呢個證據好確鑿。[21]錢鍾書喺《管錐編》入面提出，「偽託者未必係作注者張湛。」但即使《列子》真係張湛寫嘅，「唔足以貶《列子》，反而足以尊張湛。」而家學者對於《列子》係咪僞書有三種睇法：係僞書、唔係僞書、同埋係列子思想溝埋後人整理嘅結合體。[22]
成語故事
[編輯]有好多著名嘅成語故仔，都係出自呢本書嘅：
- 卷一《天瑞》：杞人憂天、男尊女卑、宋人學盜
- 卷二《黃帝》：朝三暮四
- 卷三《周穆王》：
- 卷四《仲尼》：
- 卷五《湯問》：愚公移山、夸父逐日、小兒辯日、扁鵲捩心
- 卷六《力命》：
- 卷七《楊朱》：野人獻曝
- 卷八《說符》：歧路亡羊、亡鈇意鄰
呢啲故事就算到咗廿一世紀初，都仲成日攞返嚟講。例如愚公移山嘅神話故事就好出名[23]：呢個神話講一個九十歲嘅阿伯，佢叫愚公，佢住喺兩座大山附近。佢成家人出出入入都畀呢兩座山阻礙，所以佢就諗住用鋤頭同埋竹籃嚟掘走兩座山。佢掘山嘅時候，一年只可以來回一次。有人質疑佢嘅計劃根本冇可能完成，仲笑佢蠢，愚公就答：雖然佢喺有生之年應該完成唔到呢個任務，但係透過佢自己、佢嘅仔女、孫仔孫女，一代代人嘅努力，終有一日可以將兩座山移走。天上嘅神仙見到愚公咁有恆心，就命令兩座山分開，等愚公得以喺有生之年睇到自己努力嘅成果。一般認為，呢個故仔係講緊「有志者事竟成」嘅道理。
|
外文譯本
[編輯]同其他道家經典相比，《列子》嘅英文譯本數量相對少。喺一九一二年，翟林奈（Lionel Giles）首次將《列子》第一至六章同埋第八章譯做英文，而安頓·弗克（Anton Forke）就負責譯第七章（楊朱）。廿一世紀初嘅最新版本係由 Eva Wong 喺二零零一年翻譯嘅。
睇埋
[編輯]引咗
[編輯]- ↑ 《柳河東集》卷四《辯列子》：「劉向古稱博極群書，然其錄《列子》，獨曰鄭穆公時人。穆公在孔子前幾百歲，《列子》書言鄭國，皆雲子產、鄧析，不知向何以言之如此？……其書亦多增竄，非其實，……其言魏牟孔穿，皆出列子後，不可信。」
- ↑ 《子略》，頁58。
- ↑ 黃震，《慈谿黃氏日抄》卷五十五《讀諸子·列子》。
- ↑ 《考古質疑》卷三，見《海山仙館叢書》
- ↑ 《十駕齋養新錄》卷十八《釋氏輪迴之說》
- ↑ 《惜抱軒文後集》卷二《跋列子》
- ↑ 《何氏學》卷四《書列子後》
- ↑ 《癸巳存稿》卷十《火浣布》說。
- ↑ 《初月樓文續鈔》《辨列子》。
- ↑ 《列子張注》八卷，附《釋文》二卷，汪繼培序
- ↑ 《匪石先生文集》卷下《列子跋》
- ↑ 《菿漢昌言》卷四：「《列子》書漢人無引者。王何嵇阮下及樂廣，清談玄義，散在篇籍，亦無有引《列子》者。觀張湛序，殆其所自造。湛謂與佛經相參，實則有取於佛經爾。」
- ↑ 《東方雜誌》第十四卷第9號《讀列子》。
- ↑ 霍世休《唐代傳奇文與印度故事》
- ↑ 黃寶生《〈管錐編〉與佛經》
- ↑ 黃震《黃氏日鈔》認為張湛推出嘅《列子》係咪劉向所講嘅《列子》，"殆未可知"。
- ↑ 姚鼐《惜抱軒文後集》卷二《跋〈列子》）雲：「出於張湛，安知非湛有矯入者乎？」
- ↑ 《菿漢微言》
- ↑ 《生經》卷第三《佛說國王五人經》第二十四
- ↑ 季羨林：《佛教十五題·〈列子〉與佛典》
- ↑ 季羨林：〈站在胡適之先生墓前〉
- ↑ 曾春海。《兩漢魏晉哲學史》，五南圖書出版股份有限公司，2004年，第255 互聯網檔案館嘅歸檔，歸檔日期2020年12月1號，.至256頁，ISBN 9789571134147。
- ↑ Giddens, Owen; Giddens, Sandra (2005). Chinese Mythology. The Rosen Publishing Group. p. 39.
出面網頁
[編輯]
- （香港繁體） 《愚公移山》列子 (粵語/廣東話) *子子孫孫，無窮匱也*，呢條視頻用粵語讀《列子．愚公移山》。
- （大陸簡體） 《列子》—中國哲學書電子化計劃
- （中文） 《列子》全文 Wayback Machine嘅版面存檔備份
- （英文） 《列子》 Wayback Machine嘅版面存檔備份，于古騰堡計畫