利利潑同巴拉佛斯古
(由利利潑跳轉過嚟)
利利潑（Lilliput）同巴拉佛斯古（Blefuscu），又或者叫小人國，係英文奇幻小說《小人國歷險記》入便嘅兩笪地方。
故仔
[編輯]内文：格列佛遊記
《小人國歷險記》第一部就係講利利潑同巴拉佛斯古嘅。
話說主角林苗·加厘華坐嗰架船唔好彩遇到風暴，畀狂風暴雨打沉咗，成架船得加厘華生還。
加厘華隨海浪漂浮，漂到去利利潑—利利潑特色係啲居民好細粒，一個平均嘅大人得嗰 6 吋咁高。由利利潑人嘅角度睇加厘華係個巨人，而佢哋一見到昏迷不醒嘅加厘華就驚，嗱嗱臨趁加厘華未醒，搵粗壯嘅繩同纜綁實佢，然後佢哋就帶住郁唔到嘅加厘華去見利利潑嘅皇帝。利利潑皇帝同佢班大臣商量咗一輪之後開口，要求加厘華幫佢哋手打低利利潑嘅敵人—巴拉佛斯古；巴拉佛斯古位於利利潑嘅東北，同利利潑隔咗個海峽，啲居民同利利潑人一樣咁細粒。加厘華答應皇帝嘅要求，仲輕而易舉噉收服咗巴拉佛斯古嘅成隊海軍艦隊。初頭利利潑人當咗加厘華係英雄，但後嚟加厘華畀人話佢同巴拉佛斯古嘅大使太友好。打後有一晚利利潑皇宮火燭，加厘華情急想救火，咁啱又有啲飲大咗[註 1]，於是佢就除褲喺皇宮上面屙尿，用尿滅火。
事後皇后發晒爛渣，話以後都唔會再踏足畀尿淋到嗰一忽皇宮。而且根據利利潑嘅律例，喺皇宮隨地屙尿係要處死嘅。於是乎加厘華就有咁快得咁快走佬，搵咗架艇仔坐住離開利利潑同巴拉佛斯古。而佢喺海面漂漂吓就遇到一架嚟自英格蘭嘅船，返到英格蘭。
|
再睇
[編輯]註釋
[編輯]- ↑ 本小說仲有提到，話隻酒好利尿。