到喉唔到肺，係廣東話入面嘅俗語之一，意思即係話一件唔完整嘅事令到人好吊癮、好無奈；例如：
- 講故事講到最精彩嘅時候突然停咗唔講，搞到心痕痕想知道故事發展；
- 睇電視或者睇電影嘅情況同上；
- 一樣好味嘅食物，但係只係食到好少份量就冇晒，覺得未夠好想食多啲；
- 踢足球時，想交個畀人，點知踢出去軟弱無力，個波離隊友重有一段距離（可參考醫院波）
……等等。
呢句嘢嘅出處，據聞係一啲食煙嘅人用嚟笑嗰啲唔識食煙或者扮食煙嘅人而創作嘅；嗰啲唔識食煙或者扮食煙嘅人，淨係識得吸一啖煙喺口入面，但就唔識吸落個肺度，然後就即刻噴返出嚟，俗稱「打煙炮」，根本就唔係食煙，只係吊住口癮；後來就借用咗為吊癮、搞到好冇癮嘅俗語。
