加州罌粟

How to read a taxobox 加州罌粟
位於加州Table Mountain Phantom Fall步道嘅加州罌粟
物種分類
界 植物界 Plantae 門 被子植物門 Magnoliophyta 綱 雙子葉植物綱 Eudicots 目 毛茛目 Ranunculales 科 罌粟科 Papaveraceae 屬 花菱草屬 Eschscholzia 種 加州罌粟 E. californica

加州罌粟（學名：Eschscholzia californica），又嗌花菱草、金英花，係罌粟科花菱草屬嘅一種一年生或多年生嘅草本植物。

名

佢嘅種名californica係加利福尼亞噉解。佢原本生喺美國西部同埋墨西哥，分佈嚮美國加州，向外邊延伸到去俄勒岡州、華盛頓州、內華達州、亞利桑那州同埋新墨西哥州等幾個州，而佢嚮墨西哥就分佈嚮索諾拉州同下加利福尼亞州嘅西北部。生長喺海拔零到兩千公尺嘅草地同開闊地區。

樣

植株可以生到成五十到六十公分咁高。啲葉係互生嘅，綠色，葉係分裂型，裂片個頂係圓形。啲花單獨生嚮一枝頗為之長嘅花莖上邊，有四塊花瓣，花瓣長二到六公分，花係黃色到橙色咁上下，開花期係從二月到九月。啲花會做睡眠運動，嚮晚黑啲花會合起身，到第二日朝早再開返。當朝早嘅天口凍，風大或者陰天嗰陣啲花亦都會合起身，唔會展開。佢啲果實係長形嘅蒴果，長三到九公分，成熟嗰陣會裂開成二塊瓣，放出入便嘅耔。啲耔好細，有好多粒，顏色係黑色或者深咖啡色。

種植

佢嘅耔

佢係一種耐旱兼佮容易栽培嘅觀賞花卉，鍾意成日晒太陽、同埋排水良好嘅沙質泥或者係貧瘠嘅土地。除咗可以做庭園、公路綠化美化嘅植物之外，佢經常會出現嚮路兩邊、受到擾動嘅土地同埋火災燒過之後嘅地方，佢嚮受擾動過啲泥入邊生得好好。

用途、文化意義

加州罌粟對好多美國西部原住民嚟講係具有文化意義嘅，其中包括咗美國西部嘅Luiseno、Cahuilla、Costanoan 同埋 Pomo 部落。佢哋大多數經常用植物或者係植物嘅特定部位嚟作為嘢食或者藥。

啲根一般含有較高水平嘅生物鹼，被用嚟做鎮靜劑或者鎮痛用途；花嗰部份類胡蘿蔔素含量高，兼且帶有一啲啲甜味，可以用嚟當香口膠𡁻，花粉就可以用嚟做眼影或者特殊場合嗰陣嘅彩繪身體顏料。成棵植物都畀佢哋放嚮細路嘅床下底，據稱可以瞓得好啲。。

啲花捻碎之後煲水用嚟洗頭，可以除頭蝨噉話。

美國原住民利用佢嘅全草做草藥，係一種苦味嘅鎮靜藥草，起到利尿嘅作用，可以緩解痛、緩解抽筋、促進排汗。亦被用嚟醫精神焦慮、失眠同尿失禁（尤其係細路）。佢啲效果同罌粟（Papaver somniferum）相似，但係作用更溫和，唔會抑制中樞神經系統。

另一份報告指出，佢對中樞神經系統有明顯唔同嘅影響，唔係一種麻醉劑，而係傾向於使個心理情緒正常翻（啫係抗焦慮、抗抑鬱）。

佢亦係美國加州嘅州花，加州指定每年嘅四月六號做加州罌粟日。嚮加州嘅州界牌上邊有加州罌粟嘅圖像。