加拿大維亞鐵路

維亞鐵路嘅標誌

來往溫哥華同多倫多嘅長途列車「加拿大人號」。

停喺曼尼托巴省邱吉爾市嘅「哈德遜灣號」。

停喺渥太華嘅維亞鐵路城際列車。

加拿大維亞鐵路（簡稱維亞鐵路；英文/法文：Via Rail Canada）係加拿大嘅國營客運鐵路公司，提供橫跨加拿大大陸地區（紐芬蘭同愛德華王子島除外）長途及城際鐵路客運服務。

加拿大維亞鐵路營運嘅路線全長達到12500公里，絕大部份路線都同加拿大國家鐵路共享路軌。而其中最繁忙嘅路線係魁北克市同溫莎之間嘅走廊。

歷史

二戰結束之後，隨著汽車同飛機嘅普及，坐火車出行嘅人越來越少。到1960年代後期，聯邦政府同省政府投入大量資源興建高速公路同機場，令到上個世紀興建嘅鐵路網絡近乎荒廢。當時加拿大最大嘅兩間鐵路集團——國營嘅加拿大國家鐵路同私營嘅加拿大太平洋鐵路——出於營利嘅考慮，都想縮減甚至停止客運服務，而將主要精力擺落賺得錢嘅貨運服務道。

喺1974年嘅大選裡面，時任自由黨黨領皮耶·杜呂多喺競選嘅時候承諾會推動建立一間類似美國國鐵嘅國家級鐵路客運集團。1976年，加拿大國家鐵路正式將旗下嘅客運服務部拆分成一間獨立嘅子公司——「維亞鐵路」。揀「維亞」做公司名，係因為「維亞」（「Via」）爾個詞係英文同法文裡面都存在，而且意思基本一致。1977年1月21號，維亞鐵路脫離加拿大國家鐵路，成為一間獨立嘅國營企業。1978年10月29號，經過艱難嘅談判之後，維亞鐵路終於由加拿大太平洋鐵路手頭上買到路權，可以行加拿大太平洋鐵路擁有嘅路軌。但係由於當時加拿大國家鐵路旗下重有紐芬蘭鐵路、卑詩鐵路、安大略北方鐵路、魁北克北海岸與拉布拉多鐵路等多間子公司，而爾啲子公司依然做緊客運服務，維亞鐵路嘅起步並唔算順利。

1979年爆發嘅石油危機喺某種程度上推動徂鐵路運輸嘅復興。但係好景不長，1981年，杜呂多政府大幅削減徂維亞鐵路嘅預算，令到維亞鐵路不得不腰斬兩條長途路線——往返多倫多同溫哥華嘅「超級大陸號」同埋往返魁北克市同聖莊嘅「大西洋號」。但係維亞鐵路都係購買徂龐巴迪嘅LRC擺式列車，用來運營往返魁北克市同溫莎嘅城際路線。

1980年，以拜仁·穆朗尼為首嘅保守黨政府重新增加徂維亞鐵路嘅預算。「超級大陸號」同「大西洋號」兩條線喺購買徂通用電氣嘅新動車組之後重新通車。但係到徂1980年代後期，同一個保守黨政府再一次削減徂維亞鐵路嘅預算，令到幾條長途路線再一次被迫停運。

1990年代末期，以莊·克雷蒂安為首嘅自由黨政府為維亞鐵路推出徂一項「復興計劃」，具體包括：

• 由歐洲購入行英法海底隧道嘅「晚星號」車組；
• 由美國購入通用電氣P42DC動車；
• 重開往返哈里法斯同薛尼嘅路線；
• 購入同翻新滿地可同渥太華沿線嘅幾座老舊車站，開發觀光路線。

2008年，加拿大聯邦政府向維亞鐵路注資4億零700萬加元，用於重開部份長途路線以及購置新動車。

車輛

維亞鐵路目前有78部動車同396部客車。

路線

維亞鐵路目前運營19條路線，平均每星期開出497班車。爾19條路線主要分為三大類：

• 城際路線：即日出發即日到達嘅快車；
• 長途路線：跨省路線，主要嘅功能係觀光旅遊；
• 指定路線：聯邦政府指定要開通，服務其他交通工具難以到達嘅地區嘅路線。

碳排放量

2010年，維亞鐵路火車嘅二氧化碳排放量係平均每位乘客每千米0.117千克。