北潭涌
北潭涌係香港新界西貢半島南一撻地方。北潭涌響鯽魚湖南面，黃麖地東面，上窰北面。北潭涌原本有六條村，其中北潭涌村係18世紀起一條天主敎客家村。北潭涌響正兩條涌匯合之處，其中大嗰條叫龍坑，係北潭流入來，直流入海。因為呢條涌，所以呢度叫北潭涌。
北潭涌有閘口。除非有批准，否則唔畀車入西貢東郊野公園。
歷史[編輯]
未通路時，去赤徑或者去西貢啲人要坐船。18世紀因為香港島要起好多樓，要好多石灰整水泥，所以呢一帶唔少地方整石灰。
大清嗰時，上水姓廖有秀才，姓廖會去北潭涌收糧當稅。大英帝國租借咗新界，呢度啲鄉民都唔知。忽然有好多印度人走入來，村民見到即刻反抗，後尾先知有印度人來丈量，自此以後，就交稅畀香港政府。而姓廖重搏矇來收糧，以為村民乜都唔知，畀村民趕走。 [1]
1970年代，香港政府劃個半島做兩個郊野公園。而北潭涌就咁啱響西貢東郊野公園同西貢西郊野公園中間。重起埋西貢郊野公園遊客中心，專講西貢鄉村習俗、生態環境、風景區、萬宜水庫等等。無幾耐，保良局響呢度起渡假營。
交通[編輯]
北潭涌有大網仔路西去大網仔同西貢，東去萬宜水庫，而北潭路就由北潭涌起去北潭凹同海下。