南斯拉夫

南斯拉夫國土嘅轉變

南斯拉夫（Jugoslavija）係歐洲巴爾幹半島一個已經冇咗嘅國，京城喺貝爾格萊德。

史

1918年12月1號由塞爾維亞王國國王彼得一世宣布成立。初時係叫塞爾維亞人、克羅地亞人和斯洛文尼亞人王國，1929年10月3號，國王亞歷山大一世將國名改做「南斯拉夫王國」。

第二次世界大戰期間嘅1941年4月6號，軸心國侵略南斯拉夫，佔領晒全境，國王同王室家族走佬去外國。南斯拉夫即刻畀鄰國分咗，匈牙利同保加利亞佔領一啲邊境地區，而克羅地亞獨立國成立，新成立嘅「塞爾維亞救國政府」就統治剩返嘅領土。

到1945年，德國撤出南斯拉夫。但係南斯拉夫响嗰年11月廢君主制，宣布成立共產黨政府，南斯拉夫再唔係王國。1946年1月31號，南斯拉夫組成南斯拉夫人民聯邦共和國（Federativna Narodna Republika Jugoslavija, FNRJ），1963年再改名做南斯拉夫社會主義聯邦共和國（Socijalistička Federativna Republika Jugoslavija, SFRJ）。

1992年，南斯拉夫開始分裂，斯洛文尼亞、克羅地亞、波斯尼亞同埋馬其頓先後獨立。最後南斯拉夫得番塞爾維亞同埋黑山兩個加盟國，叫南斯拉夫聯盟共和國。

2003年，南斯拉夫改名做塞爾維亞和黑山（簡稱「塞黑」）。2006年黑山獨立，南斯拉夫正式玩完。

南斯拉夫演變史（減筆字）

多樣性

南斯拉夫一向有「一個國家、兩種文字、三種語言、四種宗教、五個民族、六個共和國、七個鄰國、八個政治區」嘅形容，包括：

• 一個國家──南斯拉夫社會主義聯邦共和國
• 兩種文字──拉丁字母同埋基里爾字母
• 三種官方語言──塞爾維亞-克羅地亞文、斯洛文尼亞文同埋馬其頓文
• 四種主要宗教──天主教、基督新教、東正教同埋伊斯蘭教
• 五大族裔──塞爾維亞人、克羅地亞人、斯洛文尼亞人、馬其頓人同埋黑山人
• 六個加盟共和國──塞爾維亞、克羅地亞、斯洛文尼亞、北馬其頓、黑山同埋波斯尼亞
• 七個鄰國──阿爾巴尼亞、希臘、保加利亞、羅馬尼亞、匈牙利、奧地利同埋意大利
• 八個政治區──塞爾維亞、克羅地亞、斯洛文尼亞、北馬其頓、黑山、波斯尼亞、科索沃自治省、禾獲甸拿自治省