危險駕駛引致他人死亡
危險駕駛引致他人死亡（英文：Dangerous Driving Causing Death）係香港一項刑事罪名，係喺致命交通意外發生嗰陣，肇事司機有機會被告嘅一條罪[1]。
法例
[編輯]根據《香港法例》第374章《道路交通條例》第36條《危險駕駛引致他人死亡》，最高刑罰係罰款HK$50,000同坐監10年，首次定罪取消駕駛資格5年，再犯10年[2]。
如果係《危險駕駛引致他人身體受嚴重傷害》（第36A條）嘅話，最高刑罰係罰款HK$50,000同坐監7年，首次定罪取消駕駛資格2年，再犯5年。
如果受害者係警務人員而傷勢較輕，可以加控《襲擊警務人員》，最高刑罰係罰款$5,000同坐監6個月。
上面嘅罪名都要強制修習駕駛改進課程，同埋喺交通違例記分制到扣10分；另外有「犯罪情節特別嚴重」加刑因素，如果司機干犯以上罪行嗰陣，體內
- 酒精濃度達第3級（即每100毫升呼氣/血液/尿液分別超過66微克/150毫克/201毫克的酒精），或拒絕接受酒精呼氣/血液/尿液測試；或
- 含有任何份量的指明毒品（即海洛英、氯胺酮、「冰」、大麻、可卡因或「搖頭丸」）
會被視為「犯罪情節特別嚴重」，有關罪行嘅最高罰款額、最高監禁期同最短停牌期各增加50%。
另外，如果犯罪情節特別嚴重，根據案例有機會以嚴重傷人或誤殺作為交替控罪。例如1983年邱德根個仔邱達成喺何文田公主道撞死交通警員，最後因誤殺罪入獄4年[3]。
危險駕駛定義
[編輯]危險駕駛（Dangerous Driving）唔同不小心駕駛[4][5]。
危險駕駛包括無牌駕駛、唔理交通訊號、唔理路面交通情況、不顧警方路障或交通指揮、超速駕駛、小路出大路唔停車又唔減速、扒頭、玩飄移、酒後駕駛、衝紅燈等。
危險駕駛本身已經係刑事罪行，最高刑罰係罰款港幣25,000文同坐監3年，首次定罪取消駕駛資格半年或以上，再犯1年半以上。並且要強制修習駕駛改進課程同交通違例記分制入面記10分。
但如果因為危險駕駛，引致他人（包括乘客、行人同其他車輛嘅司機）死亡或受到嚴重傷害，一般將會控以「危險駕駛引致他人死亡」或「危險駕駛引致他人身體受嚴重傷害」嘅罪行。
引致他人死亡定義
[編輯]- 他人，所指嘅係肇事司機以外嘅人，包括乘客、行人同其他車輛嘅司機等。
- 死亡有別於受傷、重傷，包括併發症。例如一位的士司機喺單程路反向行車，後座乘客受驚引致心臟病發死亡。
- 導致，係因果關係。他人死亡未必因為當時嘅危險駕駛引發。
歷史
[編輯]自2000年7月1號起，「魯莽駕駛」同「魯莽駕駛引致他人死亡」分別被「危險駕駛」同「危險駕駛引致他人死亡」取代[6]。
參考
[編輯]- ↑ 〈運輸署 - 危險駕駛〉。運輸署。原先內容歸檔喺2020-08-11。喺2019-08-23搵到。
- ↑ "Hong Kong e-Legislation". www.elegislation.gov.hk. 喺2021-11-27搵到.
- ↑ 〈83年邱達成撞死警誤殺囚四年〉。原先內容歸檔喺2010-03-08。喺2018-05-11搵到。
- ↑ 〈存档副本〉 (PDF)。原先內容歸檔 (PDF)喺2019-11-04。喺2008-05-03搵到。
- ↑ 〈存档副本〉。原著喺2008-04-19歸檔。喺2008-05-03搵到。
- ↑ 〈運輸署 - 危險駕駛〉。www.td.gov.hk。喺2021-11-27搵到。