原型

  呢篇文講工程設計過程會整嘅一樣嘢。想搵語言學上有關「人腦點處理意思」嘅概念嘅話，請睇原型理論。

  想搵物件導向編程嘅一種技巧嘅話，請睇基於原型編程。

某電子工程 project 嘅原型；件產品未有耐整好，但可能已經行到，能夠提供基本嘅功能。

喺工程學上，原型（粵音：jyun4 jing4）係指可以實際行得到嘅模型，用嚟模擬或者展示設計緊嘅系統同產品實際用嗰陣會係點嘅樣。原型唔一定具備最終成品嘅所有功能，重點係快手整好，可以攞去做測試、收集意見、探索有咩可行性，從而幫助團隊喺正式投入資源前做出更好嘅決策。

唔同開發階段可能會用到唔同層次嘅原型，由紙本原型到近乎同成品無異嘅樣板都有。諸如軟件工程、電子工程以至網頁設計等咁多唔同嘅設計同工程領域，都會用到原型呢個概念。

基本概論

一棟樓嘅模型；圖中仲有埋人類模型，便於顯示預想中嗰棟樓有幾大。

睇埋：設計

原型通常會省略系統嘅某啲設計細節，例如係缺乏容錯能力，或者用家介面完全冇做過美化呀噉。話雖如此，原型依然能夠運作，可以攞去試用同睇。

原型有好多種用途：

• 可以用嚟做測試，評估用戶體驗；
• 做 demo，示範技術概念或者新功能；
• 發現個設計有咩漏洞或者不合理之處；
• 用嚟做團隊內部或者同客戶溝通嘅工具。

喺某啲工程領域，製作實際成品嘅成本可以好高昂，整原型做測試就可以免卻好多麻煩。

製作原型嘅概念，同建築設計上嘅建築模型好相似：例如依家要起一棟大廈，實際起嗰時用料同工時等都會涉及巨額嘅資源；如果咩原型都冇就直接施工，一旦出錯，代價極高。因此建築師同工程師往往首先會整返個建築模型出嚟，去騷個設計概念俾人睇，甚至做少少測試。

原型喺英文入便個名係 prototype，呢隻詞嚟自希臘文：πρωτότυπον / prototypon，大致可以理解為最初形態或者原始形式噉嘅意思，而中文詞彙原型喺意思上好接近呢個詞。

主要種類

紙本原型：有班人做網頁設計，畫咗幅圖描繪想像中個網站嘅用家介面；佢哋跟住就可以開會，傾吓個大方向有冇問題。

睇埋：概念驗證同比例模型

原型都有得分好多種：

• 紙本原型：講緊一張張打印或者手畫出嚟嘅草圖，用嚟大致模擬想設計嗰樣嘢。呢種原型通常係用嚟設計初期諗頭，好處係好易整，可以快速整好並且用嚟做一啲基本嘅測試，整咗出嚟可以攞去成隊人一齊檢查個諗頭，噉團隊未投放大量時間金錢做開發之間，可以首先確認個設計嘅方向啱唔啱。
• 行到嘅原型：有齊晒最終成品嘅全部功能，或者近乎有齊晒呢啲功能。
• 功能原型：唔單只展示得到設計預期嘅功能，仲大致描繪到最後成品嘅外觀，可以攞去俾個客睇；同最終成品比起嚟，功能原型好可能係用咗唔同嘅技術製作，甚至尺寸同最終成品有差距。

原型整好咗，可以幫設計者驗證佢哋嘅設計概念、攞用家意見、同團隊傾自己嘅諗法。亦有助騷個設計俾人睇，其他人睇到個設計覺得有搞頭，設計者就可以爭取到資金，方便落實開發，亦減少日後要大改嘅風險。

製作過程

内文：工程設計

睇埋：快速成型同疊代增量開發

喺軟件工程當中，製作原型有兩種策略可以用，包括用完抌製作同埋進化式製作。

用完抌製作係指要有咁快得咁快整一個簡化版本嘅原型，用嚟試驗介面設計或者用戶嘅需求。呢種原型目的唔係要用落最終產品，而係攞嚟測試同收集用戶意見，完成目的之後啲原型就會「抌咗佢」唔再用。例如家陣要設計登入用嘅介面，編程員可能會用 Python 快速整返個介面出嚟，登入邏輯只係好簡單嘅：

if username == "admin" and password == "1234":
    print("Login sing4 gung1")
else:
    print("Login sat1 baai6")

呢段代碼雖然行得，但係冇安全性可言，只可以俾測試者用嚟睇介面同流程，唔會放入最終產品入面。

進化式製作就係指將個原型一路改良落去，最終變成正式產品嘅一部分。開發團隊會逐步加入功能，每次改版都係建立喺上次嘅基礎之上。例如初版可能係一個登入表單，第二輪原型製作嗰陣，編程員就加入鑑別功能，要用戶入密碼先可以簽到。然後佢哋喺接住落嚟嘅步驟，仲會加入各種更進階嘅功能，啲原型唔會「用完就抌咗佢」。

睇埋

• 三維打印
• 產品測試
• 複雜系統：假如設計緊嘅系統好複雜，整咗原型出嚟之後往往會發現始料不及嘅錯處。
• 音樂上講嘅 demo

外拎

• （香港繁體） 原型製作共享空間，香港科技園公司