原子質量
(由原子重量跳轉過嚟)
原子質量（Atomic mass）係指某一個特定同位素嘅質量。佢係一個原子入面質子、中子同埋電子嘅質量。因為好多元素都有超過一種同位素，所以元素表入面嘅原子質量係會以唔同同位素喺大自然嘅比例再乘番佢哋嘅質量計番平均數，所以亦叫做平均原子質量。
單位
[編輯]因為一個原子嘅質量實在太細，如果用番常用嘅公斤做單位，無論記、寫、用、計都好唔方便，於是，國際間就用相對原子質量（符號：Ar）嚟計原子質量，將一個碳-12原子嘅相對質量規定為12.00，作為相對原子質量嘅標準。一個單位嘅原子質量換算成公制就係1.660538782(83)×10-27公斤。相對原子質量同絕對原子質量（克）嘅換算公式係：
歷史
[編輯]起初，原子質量定義係以最輕嘅原子氫作為1.00，1820年，英國化學家威廉·普留特（William Prout）假設每一種元素嘅原子質量都係氫原子質量嘅倍數。但係瑞典化學家楊斯·雅各·白謝遼斯（Jöns Jacob Berzelius）之後證明就算係約數，個假設都係唔啱。例如氯嘅原子質量大約喺兩個氫原子重量嘅倍數之間。不過之後發現原來咁係因為有同位素，實際上每一個個別嘅同位素嘅原子質量的確係同氫原子質量嘅某個倍數相差細過百分之一。
之後由二十世紀中期去到1960年代，化學學家同物理學家對原子重量單位有兩個唔同定義：化學學家以氧唔同同位素嘅混合物作為原子重量16，而物理學家以氧最常見嘅同位素（有8個質子同8個中子）作為原子重量16。最後，因為氧-17同氧-18都會喺自然出現，所以定義一個碳-12嘅重量係12原子重量，呢個亦都係今日嘅標準。