古利奈人西門

古利奈人西門（粵拼：gu2 lei6 noi6 jan4 sai1 mun4，英文：Simon of Cyrene），天主教譯基勒乃人西滿，係根據《聖經》記載，喺耶穌孭住十字架前往受刑途中，畀羅馬士兵強迫幫耶穌孭十字架嘅人^[1]^[2]^[3]。

背景

古利奈係位於非洲北端嘅古城，今日利比亞東部靠近沙哈特（Shahhat）村。嗰度曾經係希臘時代一個繁榮嘅城邦，以盛產羅盤草等指南菊屬嘅藥用植物聞名；後嚟被托勒密王朝統治，直到公元前74年成為羅馬帝國下嘅行省。嗰度當地有哲學院，被譽為「非洲嘅雅典」。兩約期間開始有大量嘅猶太人移居古利奈，直到使徒時代嗰度仍有上萬猶太人居住^[4]，甚至有猶太人嘅會堂^[5]。呢位西門就係嚟自嗰度，根據佢嘅名就知道佢係猶太人。

古利奈人西門喺《聖經》中第一次亦係唯一一次出場，就係耶穌被釘十字架之前前往各各他嘅路上，而嗰度亦係佢一生中唯一一次同耶穌相逢嘅嘅時候，以代耶穌孭十字架嘅身分出現喺耶路撒冷。三卷《福音書》都有提到佢。當時喺巡撫彼拉多手下嘅羅馬兵丁喺衙門帶住耶穌出去準備到髑髏地釘十字架。按照當時嘅條例，被判死刑嘅犯人要親自孭十字架前往刑場。但係當時嘅耶穌可能已經非常虛弱，由於前一晚都冇瞓被審問、又俾人鞭打直到早上，耶穌已經冇力孭起笨重嘅木頭行走，因此需要其他人代佢孭十字架。

聖經記載

佢哋出去嘅時候，遇見一個古利奈人，名叫西門，就強迫佢同去，孭起耶穌嘅十字架。《馬太福音27:32》

一個古利奈人西門，就係亞力山大同魯孚嘅爸爸，從鄉下入城，經過嗰度，佢哋就強迫佢同去，孭住耶穌嘅十字架。《馬可福音15:21》

佢哋將耶穌帶去嘅時候，有一個古利奈人西門從鄉下來，佢哋就捉住佢，將十字架放喺佢身上，叫佢孭住跟住喺耶穌後面。《路加福音23:26》

睇埋

參考

↑ 〈馬太福音〉27章32節（基督教和合本：〈太〉27:32、天主教思高本：〈瑪〉二十七32）.
↑ 〈馬可福音〉15章21節（基督教和合本：〈可〉15:21、天主教思高本：〈谷〉十五21）.
↑ 〈路加福音〉23章26節（基督教和合本：〈路〉23:26、天主教思高本：〈路〉二十三26）.
↑ 〈使徒行傳〉2章10節（基督教和合本：〈徒〉2:10、天主教思高本：〈宗〉二10）.
↑ 〈使徒行傳〉6章9節（SBL 希臘文新約：Πράξεις 6:9；可以睇埋：基督教和合本：〈徒〉6:9、天主教思高本：〈宗〉六9）.

[1] 〈馬太福音〉27章32節（基督教和合本：〈太〉27:32、天主教思高本：〈瑪〉二十七32）.

[2] 〈馬可福音〉15章21節（基督教和合本：〈可〉15:21、天主教思高本：〈谷〉十五21）.

[3] 〈路加福音〉23章26節（基督教和合本：〈路〉23:26、天主教思高本：〈路〉二十三26）.

[Ac-4] 〈使徒行傳〉2章10節（基督教和合本：〈徒〉2:10、天主教思高本：〈宗〉二10）.

[Ac2-5] 〈使徒行傳〉6章9節（SBL 希臘文新約：Πράξεις 6:9；可以睇埋：基督教和合本：〈徒〉6:9、天主教思高本：〈宗〉六9）.

[1]

[2]

[3]

[4]

[5]