吳孟達
| 吳孟達 | |
|---|---|
| 男演員 | |
| 英文名 | Ng Man Tat |
| 花名 | 達叔 |
| 國籍 |  中國（香港） |
| 籍貫 |  中國福建廈門 |
| 職業 | 演員 |
| 網路電影資料庫（IMDb）資訊 | |
吳孟達（Ng Mang Tat，1952年1月2號—），喺香港出世，鄉下喺福建省廈門，香港嘅影視演員，因為成日同周星馳合作演出而為人所熟悉。
生平[編輯]
吳孟達早喺1970年代投考無綫電視藝員培訓班，同期考入嘅重有周潤發同導演林嶺東，以排第五名嘅成績畢業。吳孟達響1975年就經已響無綫電視做配角，拍過無數電視劇，不過一直都冇咩人氣。佢最早嘅演出係《民間傳奇》系列，至1979年佢響《楚留香傳奇》飾演「胡鐵花」，就開始受到注意。
吳孟達講過吓佢啱啱出道嗰陣嘅情形。嗰陣爛賭，到1980年唔但止爭人30萬蚊賭債，重俾無綫雪起，搞到佢一度想自殺。後來佢修心養性，重新努力，好好研究演技，終於成功爬返起身，重還晒冚嘭唥債。佢唔但止重新喺電視熒幕出現，1981年仲參演咗生平第一部電影《執法者》。
1989年佢同周星馳拍攝《他來自江湖》之後大受歡迎，佢就噉開始紅。日後佢轉戰影壇，拍嘅戲，都幾乎清一色由周星馳主演。佢喺1990年開始進軍電影界，嗰年佢就憑周星馳主演嘅《賭聖》獲提名嗰年香港電影金像獎最佳男配角，到1991年他終於憑《天若有情》，榮獲金像獎最佳男配角獎。
吳孟達喺電影生涯幾十年，實際上都冇一部係自己領銜主演。但相對其他配角演員，吳孟達就係少數靠演配角而走紅海內外嘅演員。佢參演過嘅唔少電影入面，最為人熟悉嘅都係周星馳電影：《賭聖》、《逃學威龍》、《鹿鼎記》、《審死官》、《逃學威龍2》、《破壞之王》、《九品芝麻官之白面包青天》、《百變星君》、《食神》、《少林足球》等等。其中1990年上演嘅《賭聖》票房勁收四千萬，破咗歷來港產片票房紀錄。1992年周星馳主演嘅五部戲包辦嗰年度票房榜頭五位，其中三部都有吳孟達份。到2001年佢參演嘅《少林足球》再破歷來港產片票房紀錄，收六千幾萬。多年來吳孟達同周星馳合作無間，使到連海峽兩岸一提起吳孟達，亦都會聯想起周星馳，稱之為「搞笑男二號」。
九十年代尾港產片市道不景，吳孟達喺港產片演出大為減少，主要仍然喺周星馳電影亮相。呢段期間佢喺大陸同台灣不斷接演劇集，比較成功嘅係台劇《白色巨塔》。
作品[編輯]
連續劇[編輯]
網絡電視劇[編輯]
- 2017年：反黑 飾 豬油
