呈分試
提示：呢篇文講嘅唔係小學六年級檢定考試。呈分試又叫做報分試，係香港教育局根據校內成績去編排全香港小學生嘅排名，從而分配中學嘅學位派位。呈分試唔係全港嘅統一考試，每間小學需要將每位學生五年級下學期同六年級上下學期，總共三個學期嘅成績呈交畀教育局，而評核方法除咗考試之外，根據每間小學各自嘅方針，亦都包括小測、總測、課業等[1]。
教育局會因應每位同學喺呢三次考試嘅名次，以及所屬學校過往嘅中一入學前香港學科測驗成績，去調整所屬校網所有學校同學生嘅成績排名，然後分為三個派位組別（Band）。學生嘅組別越高，可以派到心儀中學嘅機會就越高[1][2][3]。
每科成績喺呈分試所佔嘅比重都唔同，根據教育局嘅建議，中文、英文同數學各佔23.7%，常識佔15.8%，視覺藝術佔7.9%，音樂佔5.3%，不過每間小學可以各自有唔同嘅比重[4]。
呈分試取消
2020年由於受到肺炎疫情影響，教育局宣佈全港延長學校停課，唔會早過2020年4月20號復課，小六第三次呈分試取消。2019－20年學年小六學生嘅中一派位會根據小五第一次同小六第二次呈分試成績安排。
2022年由於受到第五波疫情影響，小六第三次呈分試取消，小六學生嘅中一派位組別將會根據喺小五下學期同小六上學期由學校向教育局呈報嘅校內成績決定[5]。
參考
- ↑ 1.0 1.1 容寶樹 (2020-08-18)。〈疫情下的中一派位呈分試〉。《教育局》 (香港中文)。原先內容歸檔喺2023-02-16。喺2024-01-04搵到。
- ↑ 〈呈分試機制及其重要性〉 (PDF)。原先內容歸檔 (PDF)喺2019-06-24。喺2020-02-27搵到。
- ↑ 〈常見問題〉。香港考試及評核局。原先內容歸檔喺2020-10-26。
- ↑ 〈【呈分試攻略】呈分科目計分方程式 資深老師：主科失1分等於失9分〉。經濟日報。原先內容歸檔喺2020-10-27。
- ↑ 張瑋婷 (2022-02-14)。〈教育局宣布全港學校暫停面授延至3.6 小六呈分試取消〉 (香港中文)。原先內容歸檔喺2023-06-02。喺2024-01-04搵到。