喜劇之王

出自維基百科,自由嘅百科全書
《喜劇之王》嘅 VCD 封面,由寰宇鐳射發行

喜劇之王》係喺1999年農曆新年出品嘅香港賀歲電影之一,亦係香港電影明星周星馳頭一次自編自導自演嘅作品。

呢部戲雖然係周星馳搞笑系列之一,但相對下內容比較藝術化,因為部戲係描述一個實力派演員,點樣響偶像派橫行無忌底下冇法子出頭。有人話咁係影射周星馳啱啱出道時嘅人生,因為佢以前都只係響無綫電視做二打六,捱到十年先轉到拍電影,成為票房保證。

電影資料[編輯]

製作[編輯]

劇情大綱[編輯]

呢套戲係時裝劇,講一個對演戲有自己一套美學嘅人,點樣俾人認同自己演技理念嘅故事,當中有喜亦有悲。

尹天仇係一條村裏面街坊福利會管理員,同時亦係一個非常執着於演戲技巧嘅人,間唔中會做吓臨記(俗稱「茄喱啡」)嚟過吓戲癮,可惜佢嘅演戲技巧得唔到其他人嘅認同而成日俾人鬧、俾人趕走。喺一次做臨記嘅時候,因為演技上嘅問題而令成組戲要再拍,搞到女主角杜娟兒非常嬲,就俾導演趕走話以後都唔用佢,重要出到去想攞個飯盒都俾場務阿毛奚落,將個飯盒掉落地餵狗都唔畀阿仇。

阿仇冇得再返去戲棚做臨記,但係仍然念念不忘演戲,於是搞咗個街坊劇場,劇目係出名嘅文學作品【雷雨】,但係啲街坊嘅反應冷冷淡淡冇乜興趣,最終都係冇人捧場。第二日佢又返去戲棚度要求再畀機會佢演出,咁啱啲道具有問題而畀佢頂上去做,雖然佢專業精神令到杜娟兒好欣賞,但最後又係闖禍收場,個飯盒又係俾場務阿毛掉咗落地餵狗。

另一方面,一個喺夜總會公關小姐柳飄飄因為唔識扮學生妹服待客人而得罪人,差啲喺夜總會要坐冷板;後來個公關女大班帶咗佢哋成班女去搵阿仇研究演戲嘅心得,想喺夜總會搞嘅「學生妹初戀之夜」度搵多啲客捧場,點知講講吓阿飄飄就因為俾阿仇寸親而發脾氣走咗去。跟住返工嘅時候,有個超級公子龍少爺醉酒話要搵初戀,面對成呎高嘅一千蚊紙,飄飄即刻用阿仇教嘅演技去對付,居然成功得到龍少嘅歡心之餘重賺埋佢啲錢,於是第二日就返到去村度搵阿仇正式討教。

後來村口嚟咗班人拍戲,咁村裡面嘅小惡棍洪爺就派個新仔去收保護費(俗稱「收陀地」),但係個新仔其實係啱啱畢業嘅大學生,只係暫時冇嘢撈就喺村度跟住洪爺四圍蕩;洪爺見佢薯頭薯樣咁唔夠惡,所以就搵咗阿仇去幫手教個新丁扮惡人,同埋點樣去收保護費,點知呢班攝影隊原來已經有黑社會關照,喺阿仇嘅鼓勵之下,呢個新仔雖然都繼續「演出」,而且最後都俾佢收到少少錢返去,但係就俾人打到血流披面。

第二日,阿仇又再返去戲棚,希望用堅持嚟感動臨記主管再畀機會佢演出,正當又俾人拒絕嘅時候,點不知又咁橋有個替身可以畀佢做,但係呢次除咗又令到導演發火趕佢走之外,重搞到對手嚴重灼傷。去出面想攞飯盒走,亦照列俾場務寸而得唔到飯盒,重話佢毫無演技跟本唔夠班做戲,令到阿仇非常之沮喪。

返到村,阿仇勸咗想去開片嘅洪爺去做話劇,當晚排緊【精武門】嘅時候,柳飄飄嚟到冇觀眾嘅劇場度睇佢哋表演;後來阿仇同飄飄喺沙灘傾計,傾傾吓就產生好感,最後跟咗阿仇返中心宿舍度過夜;第二朝阿仇因為覺得唔好意思,就趁飄飄喺出面吹風時將自己嘅身家拎晒出嚟做肉金,飄飄入房見到,於是好冇癮咁拎咗就走;阿仇諗諗吓覺得自己對飄飄都有多少感情,就彈起身追出去,重應承會養飄飄一世,令到飄飄離開時都有所感動。

阿仇都係死心不息得唔到啲飯盒,於是又再返戲棚搵場務爭取,誰不知俾人捉咗入去會議室;原來杜娟兒有套新戲開拍,但係原本嘅男主角阿大哥因為太忙度唔到期嚟拍,於是娟兒就想起用新人,而目標就係想用阿仇;娟兒同班老細即席考驗阿仇嘅演技,得嚟好大嘅讚賞,就係咁阿仇就拎住份劇本歡天喜地咁走咗。

呢邊廂,阿仇同娟兒出席大小記者會同埋宴會,另一邊廂,飄飄繼續佢嘅公關生涯,但係佢個心因為掛住阿仇,搞到得罪超級公子龍少而俾人打咗一身。某個朝頭早,正當娟兒要接阿仇去開會嘅時候,帶傷嘅飄飄突然出現,要搵阿仇兌現養佢一世嘅承諾,阿仇亦一口答應。可惜好景不常,當阿仇去到會議室正準備開會時,娟兒突然宣佈男主角要畀返阿大哥做,阿仇因此而極度失望,連劇本都差啲扯爛;正當佢喺出面淋雨嘅時候,場務阿毛突然出現向佢招手,原來阿毛係警方嘅臥底人員,因為事出突然而想搵阿仇幫手做一場冇得NG(No Good,即係唔得要再拍)嘅戲,過程雖然令到阿毛受咗傷,但係最終都得到阿毛嘅讚賞。

阿仇飄飄同班街坊終於得到娟兒嘅支持可以演出【雷雨】,故事就喺一片過千人嘅掌聲中完結。

主要出場人物同埋演出者[編輯]

  • 尹天仇:周星馳
  • 柳飄飄:張柏芝
  • 杜娟兒:莫文蔚
  • 場務阿毛:吳孟達

睇埋[編輯]