圖特

出自維基百科,自由嘅百科全書
跳去導覽 跳去搵嘢
圖特

圖特粵拼tou4 dak6古希臘文:Θώθ,thṓth),係古埃及神話入面嘅智慧之神。

圖特嘅形象通常都會俾人描繪為一個擁有埃及聖䴉中文埃及聖䴉嘅頭部(Threskiornis aethiopicus)、男性身體嘅神靈,亦有陣時會係隻攞住月亮模型、全身覆蓋濃密銀白色體毛埃及狒狒中文埃及狒狒(Papio hamadryas)。圖特(thṓth)呢個名係古希臘人對呢位神明嘅稱呼,古埃及人其實係叫佢做“Djehuty”,音譯傑弗帝(粵拼git6 fat1 dai3)。

知識與智慧之神[編輯]

喺赫爾莫波利斯創世神話入面,圖特被稱為「石頭之子、卵生者」。由佢所講嘅話語令混沌世界有秩序,並創造咗宇宙萬物同埋佢哋運作嘅法則。圖特仲創造咗五花八門的各種學問,係所有學問嘅守護者。

圖特仲透過全世界最初嘅計算作業,創造咗科學知識。另外,佢為免自己好唔容易先至完成到嘅世界法則畀人曲解或者唔記得曬,就發明文字方便記事。圖特亦因為咁得到咗「計買萬物者」呢個稱號。

創造出世界法則嘅圖特,亦都體現出古埃及人極為重視嘅法則——瑪亞特(秩序)嘅存在;所以佢同時係確立人類以及眾神社會各種倫理律條的「瑪亞特書寫者」。除此之外,制定度量衡、保存古文書亦都係圖特好重要的工作。

冥界書記[編輯]

圖特除咗係知識與智慧之神,佢亦負責記錄人嘅死後審判。死神阿努比斯會將死者嘅心臟放喺一個秤上面,喺秤嘅另一邊會放真理女神瑪亞特嘅羽毛。如果死者嘅心臟輕過羽毛、或者一樣,咁佢就有資格去古埃及人嘅天堂,雅盧;如果死者嘅心臟重過羽毛,咁佢嘅心臟就會俾一隻叫阿米特嘅怪物吞食。[1]

其他方面[編輯]

圖特本身就畀民眾奉為月神崇拜。傳說當時嘅人會以「天空的預告者」稱呼圖特,可見佢嘅地位有時候甚至高過太陽神

早喺前王朝時代開始之前,古埃及人就已經注意到月亮盈虧嘅週期,了解到可以月亮週期嚟計算日期,而唔係依據太陽。埃及聖䴉黑白相間嘅羽毛顏色、彎曲嘅鳥喙等特徵,都能令人聯想到月亮,不過實際上呢種講法其實冇獲得過證實。[2]

天空之神荷魯斯的雙眼係太陽同月亮嘅象徵,而掌管月亮嘅圖特曾經施術醫好荷魯斯對眼,所以圖特亦都畀埃及人奉為醫術之神。

相傳圖特嘅廣博知識都記錄曬喺一共42卷嘅魔法書《透特之書》。任何人只要讀過呢本書,就可以得到圖特所有嘅知識。

圖特除咗有知性嘅一面之外,仲有代替賽特為太陽神拉殺敵、富攻擊性嘅另一面。不過佢喺殺敵嘅時候亦都好符合佢固有嘅風格,即係通過詠唱魔法咒語令敵人攔腰斷開兩截。圖特仲會為咗保護埃及而同異族打仗。所以圖特亦有「打倒亞洲人和異國領主的殺戮之主」呢個殺氣略重嘅稱號。尤其喺長期戰亂的努比亞地區,更特別強調透特嘅戰神屬性。

圖特信仰嘅演變[編輯]

圖特嘅信仰好有可能喺古王國時代(西元前2686~2181年)已經出現,並喺中王國時代(西元前2055~1650年)傳播到埃及各地。而圖特信仰最重要嘅聖域,就係位於上埃及第十五省嘅赫爾莫波利斯。圖特吸收咗原本赫爾莫波利斯民眾所崇拜嘅狒狒神赫吉維爾信仰之後,成為當地信奉嘅創造神,並畀人奉為赫爾莫波利斯八大神之首。圖特嘅狒狒形象,應該就係佢同赫吉維爾信仰融合而成嘅。

圖特喺其他地區仍然係好重要嘅神靈,赫利奧波利斯、孟菲斯、底比斯等地居民更將圖特視為輔佐當地主神嘅重要神明虔誠咁祭祀。

喺新王國時代(西元前1550~1069年),圖特的信仰區域持續向外擴張,甚至去到努比亞地區。埃及人將圖特奉為太陽神拉嘅長子,取代咗賽特嘅地位同工作。後來甚至仲有人主張圖特係賽特同荷魯斯嘅後代,喺賽特頭部生出嚟,呢種講法有可能係要為兩人權力嘅輪替作解釋。

喺托勒密時代(西元前332~32年)之後,圖特被視為等同於希臘嘅赫密士又或者羅馬嘅墨丘利;兩位都有知識之神、眾神信差嘅神性。喺神話入面扮演嘅角色都同圖特差唔多。後來一位諾斯替教哲學家將赫密士同圖特結合,蛻變成赫密士·崔斯墨圖(Ἑρμῆς ὁ Τρισμέγιστος)。據傳,呢位哲學家留低嘅《赫密斯文書》,好可能就係《透特文書》。

[編輯]

  1. "Ammit". Britannica Kids (美國英文). 喺2023-01-26搵到.
  2. Songben, Mi; 松本彌 (2018.11). Tu jie gu ai ji shen qi = gu dai e zi pu to no shen shen. Honglong Zhao, 趙鴻龍 (第Chu ban版). Xin bei shi. ISBN 978-986-96694-9-8. OCLC 1105575458. {{cite book}}: Check date values in: |date= (help)

參考[編輯]

  • 《圖解古埃及神祇》,松本彌著,趙鴻龍譯,楓樹林出版有限公司出版,ISBN 978-986-96694-9-8