域多利監獄

域多利監獄（英文：Victoria Prison）以前叫中央監獄，係香港第一間監獄，位於香港島中環奧卑利街16號，1995年列為香港法定古蹟，同舊中區警署、前中央裁判司署組成中區警署建築群。域多利監獄喺2006年停用之後，包括域多利監獄在內嘅中區警署建築群，已活化成為古蹟及藝術館大館。

歷史[編輯]

英國喺1841年佔領香港島之後，首要工作係確立法紀，因此喺荷李活道半山興建一座石砌監獄，但係監獄好快就太過擠迫。政府就喺1858年展開全面重建工作，工程喺1862年完成。主樓東翼（而家叫「D倉」）同更樓（而家叫「紫荊樓」）仍然保留到而家。

舊域多利監獄喺十九世紀末至二十世紀初期間，曾經多次進行翻新同擴建，二次大戰之後用嚟做收押所，之後部分地方畀入境事務處用。1980年代初開始，呢度用嚟收容非法入境者同越南船民，喺2006年停止運作。