增埗

增埗離明觀，攝於1860-1880。

離明觀

增埗（粵拼：zang1 bou6）係廣東廣州嘅一條村，舊底屬南海縣金利司恩洲堡，而家屬荔灣區西村街道。條村喺增埗河邊，南連沙貝海，北接鵝掌坦。世居村民姓蔡、張、梁，清代初期起咗思謙蔡公祠。

名

條村西邊有河流經，舊時掛住罾網嘅漁船泊喺埗頭，就叫「罾埗」。後來寫成「繒埗」同「增埗」。而家亦有簡寫成「增步」。

史

呢笪地原先係臺地。漢朝陸賈喺增埗河邊嘅舊埗頭上岸起坭城。宋朝係陶瓷工業區。明清時期，增埗村屬南海縣金利司恩洲堡。明朝初期，西場蔡氏觀瀾公定居增埗，蔡氏家族喺日後發大。清朝，村民起思謙蔡公祠同曹主娘娘廟。去到中華民國時期，屬廣州市南岸區，變成近代工業同近代新式學校聚集嘅地方。

1950年4月，屬廣州市南岸區增埗農會；同年6月，南岸區改名西區。1951年9月，屬廣州市西村區西增街。1952年9月，改屬西區。1955年5月，屬廣州市西區西增街道。1958年，撤街，屬廣州市西區西村街道。1960，西區改名荔灣區，屬荔灣區西村人民公社管理委員會。1961年8月，復街，屬廣州市荔灣區西村街道辦事處。1968年4月，屬荔灣區西村革命委員會。1980年9月，撤會復街，屬荔灣區西村街道，直到而家。增埗舊底仲屬西郊人民公社（1987年改名西郊行政村），經濟生產屬西郊村管。2002年，廣州​​市城中村改革，將行政村改成公司，西郊村由基層行政組織轉制成純經濟組織，增埗正式脫離咗西郊村。