壽星仔 (漫畫)

出自維基百科,自由嘅百科全書
Jump to navigation Jump to search
香港漫畫星光大道上官小強筆下人物

壽星仔係一本香港公仔書,由上官小強主編兼監制,1974年創刊,最初叫「壽星仔」,後來改名叫做《壽星仔週刊》、《壽星仔雙週刊》,之後又因為作者上官小強自立門戶,又再改名為《金裝壽星仔》。

壽星仔係喺1980年代香港暢銷公仔書之一,走搞笑路線,而家已經無出。

簡介[編輯]

壽星仔其實係一本綜合漫畫,但以壽星仔故事做主打,再加上唔同嘅漫畫主筆所寫嘅專欄、四格漫畫、短篇漫畫內容,其中又以甘小文四格最受歡迎。

壽星仔故仔[編輯]

壽星仔以故事主角「壽星仔」而命名,喺個故仔入面,「壽星仔」多數叫做「阿壽」,身高唔夠五呎、體重唔過一佰磅,而且永遠九歲半,長唔大,雖然人仔細細,但行為老積,而且重粗口爛舌。

除咗「阿壽」之外,重有一個熱血青年叫做「強記」,強記其實係作者上官小強自己,另外一個friend叫「火麻仁」, 重有一個叫辣手幹探「彭蛇」,三十幾勾,彭蛇其實係拎「彭sir」諧音,做咗 CID 三年零八個月完全未升過職。「強記」、「彭蛇」加埋「阿壽」三條友合稱「神勇三膠龍」。

故仔圍繞住,阿壽、強記、彭蛇三條友發展,每幾期或者一期完成一個故事,故仔有時係原創,有時會改編電影,第一期故事叫做「神經六」,多數故仔同故仔之間都無關連。不過咁多個故仔之中,以改編自日本漫畫「七金剛」嘅「港產七金剛」最為經典,因為呢個係唯一有續集嘅故仔。

其他角色:

  • 火蔴仁:一個鍾意搞搞震無幫襯嘅死肥佬,唔着鞋,一日到黑着件空手道衫扮有型
  • 和尚仔:另一個同「阿壽」一樣咁老積嘅細路,不過成日畀人搵笨
  • 珠女:「阿壽」條女

文化影響[編輯]

壽星仔嘅對白全部都係用廣東話口語寫,經常玩好多粗口諧音,好似:「利物浦」(離X譜)、「戴高樂」(大X鑊),除此之外亦有好多市井風味嘅言詞,好似「屎窟撞棍」、「你老母湊大你」。喺周星馳重做緊兒童節目主持,軟硬天師重報緊交通之前,壽星仔已經用緊「無厘頭」呢個詞,當時喺壽星仔連載嘅甘小文漫畫,就以「無厘頭」風格見稱。

客串主筆[編輯]

壽星仔除咗壽星仔故事之外,重有好多主筆客串短篇或者四格。活躍客串主筆好似有:

甘小文、大粒墨、好小子、阿Ben、四方菓、羅永康、何永享、許景琛邱福龍、阿富汗、林雨才

壽星幫[編輯]

壽星幫即係指壽星仔制作部成員。

壽星幫成員:

  • 主編、監制:上官小強
  • 封面:上官小強、曾憲璋、陸偉昌
  • 助理:何永享、李振富、鄧耀輝、溫永聰、關烈文、何穎圖

[編輯]

相關[編輯]