大埔頭

大埔頭（Tai Po Tau），又叫大埔頭圍（Tai Po Tau Wai），係香港大埔嘅村，亦係周圍一帶嘅稱呼。位置約莫係太和邨同大埔舊墟以北一帶平地。村歸翕和鄉，屬大埔鄉事委員會。當中有法定古蹟敬羅家塾。

呢帶有大埔頭徑同大埔頭路以大埔頭命名。

地理

大埔頭響大埔太和市西北，大埔舊墟以西，石鼓壟以北。響正林村河、大埔公路同九廣鐵路（港鐵東鐵綫）側邊，約莫太和邨西面，到林村河，同埋太和邨北面到山腳。

大埔頭分成兩村，近林村河有圍牆嗰邊，舊時叫大埔頭圍，家下叫大埔頭水圍（Tai Po Tau Shui Wai）或者大埔頭老圍（Tai Po Tau Lo Wai），而近山嗰條村，叫家下大埔頭村。

除咗呢兩條村，東面山邊重有營盤下、新圍仔等村。

原本村嘅田，家下都起晒樓。

大埔頭係鄧氏嘅村，錦田鄧氏其中一支，響十三世紀搬到大埔頭林村河邊，起咗水圍。之後響水圍北面，另立一村。

舊時大埔頭鄧氏響村東面海皮，當時林村河口設有大埔墟，即今日大埔舊墟。係大埔重要墟市，直至1892年，大清光緒十八年，南面太和市興起，以致歿落。

大清時，大埔頭一帶有軍駐守，設有大埔頭汛。

1898年，英國接管新界。無耐就起大埔公路同九廣鐵路。1910年代，九廣鐵路穿過將大埔頭田地，一分為二，隔開大埔頭兩條村。

香港政府響大埔頭起咗大埔運動場、大埔公眾泳池等設施。而衞奕信徑亦途經大埔頭。