林村河
林村河（Lam Tsuen River）係香港一河，喺新界大埔，水源自大帽山同觀音山，自林村谷出大埔海，經林村各圍村，近康樂園屈入大埔新市鎮出海。條河係香港僅存嘅大型低地河，流域大，範圍約莫有十八平方千米半，分水嶺為林村谷羣山。佢支流有社山河，同喺谷地。林村河生物品種繁多，包括稀有動物香港蠑螈。行政上，林村河成個流域都喺大埔區。
由於啲水要輸入船灣淡水湖，喺三渡坑有尼龍壩閘住啲水，對上嘅水質受到監察同保護。平日壩下水少，只淨一條水坑，直至去錦山村、錦石新村同太和邨一段，海水潮汐漲退匯合，變得充盈。有暴雨時，尼龍壩先至會放水。
水流[編輯]
林村河上游，由梧桐寨瀑布開始，流經林村谷，落到中游流，經寨乪、馬蒲尾村同坪朗等農地。中游上半段起咗條60米闊嘅堤壩，毀壞咗天然生態，同埋原有嘅河床。而中游下半段，流經林錦公路側邊。下游起自林錦公路交匯處，去到大埔頭抽水站，呢處有條人造纖維整嘅充氣水壩，控制流量。水站周圍係梅樹坑公園。過梅樹坑就係大埔頭，由此入大埔新市鎮。佢經過帝欣苑、錦石新村，再過太和邨同大埔市中心，最後喺廣福邨滙合大埔河，喺元洲仔以北，流入大埔海。
史[編輯]
遠古時林村河並唔係流入大埔海，而係過今日圍頭村一帶屈北，經麻笏河，出梧桐河，出深圳河，流入后海灣。由於平原沖積，水道跟年月變化，因而改道，流入大埔海。
林村河原本喺家下廣福橋附近，就流入大埔海。喺1970年代，大埔新市鎮發展，大埔海近大埔呢邊，就填晒海。因此，林村河就改成人工河道，畀人拉長到去廣福邨先出海。並且，響廣福邨附近，同另一條畀人拉長大埔河匯合，變成今日咁樣。
堰[編輯]
堰，當地土話叫陂頭，用來閘住啲水，留起並且引水入田。以往多人種田，要用好多水，村人就閘起啲。
橋[編輯]
林村河近大埔，因為河面較闊，以前係靠艇渡河。英國人1898年得到新界，就響大埔起大埔公路，連帶起橋過河。條橋重建，叫廣福橋。因為當時將大埔公路響大埔市一段，改名叫改廣福道。後尾新市鎮發展，條橋柝咗，馬路改道。廣福橋重新起過變人行橋。
林村河大埔一段，響大埔新市鎮發展期間，約莫1984年到1992年，起咗有五座行人橋過河，橋身外貌似唐人建築。佢哋分別係錦石橋、錦和橋、太和橋、廣福橋同寶鄉橋。
-
近大埔頭抽水站一段 -
充氣水壩
睇埋[編輯]
出面網頁[編輯]
