船灣淡水湖

船灣淡水湖（英文：Plover Cove Reservoir）係香港一水塘，係全球第一個起喺海嘅水塘^[1]，一九六八年起好之時，佢條主壩係全球大壩前列。船灣淡水湖喺大埔東北，起喺船灣海，而南邊係赤門。成個水塘歸入船灣郊野公園，環境受到保護。個水塘係儲食水。香港來計，佢面積最大，有廿四公頃，而容量排第二，排喺萬宜水庫後面。

史

船灣淡水湖，原本係船灣海東部，喺赤門北面，係畀山同島圍住嘅內海。1960年代香港唔夠食水，而啱起興大水塘嘅谷，又所剩無幾。當時香港水務監督毛瑾，喺船灣海遊船河，就構思起堤，將島同地連埋，就可以圍成水塘。當時政府喺內海起水塘，成為全球第一個起響海嘅水塘。

徙置

由於船灣淡水湖，比海平面高好多，原本喺水塘範圍沿岸嘅六鄉村，即小滘、大滘、金竹排、橫嶺背連橫嶺頭、涌尾同涌背，就浸喺水。所以成千名村民，就搬到大埔墟嘅六鄉新村。而白沙頭嘅三門仔村村民，同埋水上人，想維持原有鄉村社群，揀喺近船灣鹽田仔三門仔新村重新安居立戶。

結構

船灣海東部，三面環山，對出有兩島，叫白沙頭同東頭洲。首先，起堤圍塘，起條長堤由大美督連去白沙頭，是爲主壩。而白沙頭同東頭洲，起短堤一條，而東頭洲到伯公嘴，又起多條短堤。圍塘之後，將鹹水魚捉晒，再抽乾鹹水，就可以儲水。船灣淡水湖1960年11月動工，1968年完成，10月5號正式啟用。首階段耗資四億港元。

船灣淡水湖主壩長二千一百米，另有副壩兩條，各長二百米，家下壩高廿八米。壩用哋全部用沙同大小石分層砌成。水塘面積達一千二百一十五公頃，儲水量則達到一億七千萬立方米。1970年，香港政府再耗資一億五千萬港元，同加高啲堤，1973年完成。自此儲水量增至二億三千萬立方米。

鹹度

初期有傳食水需求大，水塘嘅鹹水未抽清就注入食水，搞到供水有鹹味。但事實上，初期略帶鹹味，皆因水塘底嘅泥仍有鹽份，抽清晒都一樣會有鹹味。

水源

船灣淡水湖會接收東江水，亦都有新娘潭嘅水。

由於香港政府同廣東省買東江水，而購買量亦遠超所需，所以家下船灣淡水湖嘅水，唔會供畀市區。依家水塘水，會免費供畀大埔一帶離島鄉村用。

生態

船灣淡水湖，有魚十二種，成廿萬條淡水魚。品種有金山鯽、藍刀、土鯪魚同鯉魚等等，當中四分三係鯿魚。另一方面，船灣淡水湖嘅水，引自珠江上游嘅東江，亦無意間將河殼菜蛤（Limnoperna fortunei）引入香港，大量繁殖，阻塞水道，危害引水系統^[2]。

消閒

近水塘嘅大美督，係有燒烤場供人燒烤遊樂，亦有單車出租，唔少人踩單車去主壩。而大美督亦有好多渡假同康樂設施。

慶祝

為慶祝船灣淡水湖啟用40周年，「國際水協中國香港地區委員會」喺2007年，揀咗船灣淡水湖舉辦「世界水監測日」（World Water Monitoring Day）活動，喺10月14號，請咗卅幾間中學到場，測試水質^[3]。

註

↑ 海中水塘始祖40歲壽誕當年署長奇想船灣築湖解旱互聯網檔案館嘅歸檔，歸檔日期2011年4月4號，.，《明報》，2007年10月13號
↑ Morton BS. 1975. The colonisation of Hong Kong's raw water supply system by Limnoperna fortunei ( Dunker 1857 ) ( Bivalvia: Mytilacae ) from China. Malacological Review 8:91-105.
↑ 〈船灣淡水湖大壩可用百年〉。原著喺2008年2月26號歸檔。喺2010年6月27號搵到。

圖

船灣淡水湖主壩
主壩頂單車徑
主壩上嘅測量柱
副壩嘅溢洪道

睇埋

出面網頁

[1] 海中水塘始祖40歲壽誕當年署長奇想船灣築湖解旱互聯網檔案館嘅歸檔，歸檔日期2011年4月4號，.，《明報》，2007年10月13號

[2] Morton BS. 1975. The colonisation of Hong Kong's raw water supply system by Limnoperna fortunei ( Dunker 1857 ) ( Bivalvia: Mytilacae ) from China. Malacological Review 8:91-105.

[3] 〈船灣淡水湖大壩可用百年〉。原著喺2008年2月26號歸檔。喺2010年6月27號搵到。

[1]

[2]

[3]