大嶼山巴士跌落山坑

大嶼山巴士跌落山坑係喺1973年 7月22號響香港大嶼山嘅交通失事，有成17死23傷，係嗰時香港開埠以嚟死得人最多、同而家為止死得第四多人嘅交通意外。

出事係星期日下晝兩點半，新大嶼山巴士嘅36座位巴士由昂坪開去梅窩，喺羗山同深屈道交界避一架私家車，失控撞向右邊山坡，反彈撞穿防撞欄，跌咗300呎（100米）之下嘅山坑。唔死得嘅乘客話，架巴士落地嗰吓，十足爆炸咁。巴士個頂撞到揭開，揈咗部份乘客出外便嘅山邊。政府派出成百人同五架直升機去現場救人，個山頭環境好惡搞，拯救人員搞足七個鐘先救晒啲死同傷嘅出嚟。

意外之後，寶蓮寺嘅僧人喺嗰度做咗場法事。路旁重放咗「南無阿彌陀佛」嘅石牌。事後巴士司機被控危險駕駛罪，罰款千五蚊同停牌十二個月。