大清幣制

大清貨幣

大清幣制講嘅係大清嗰陣時啲錢。清朝由1616年努爾哈赤起家，搞咗後金政權，一路到1912年中華民國成立，呢296年間出過好多唔同嘅錢。清朝早期基本係跟住明朝嗰套用法，大數用銀兩，細數用銅錢，呢個叫銀錢復本位制，又或者叫銀錢平行本位制。後期為咗應付外國經濟入侵搞到啲幣制亂晒大龍，清朝就搞咗幾次幣制改革。

清朝每個皇帝都有出過年號錢；由乾隆嗰陣開始，清政府喺西藏開始出銀幣；去到咸豐年間，仲出過戶部官票同埋大清寶鈔；清朝後期，以制錢為主嘅中國傳統鑄幣慢慢畀機制幣取代，銀兩都畀銀元取代埋。

歷史

後金嘅錢

内文：天命通寶同天聰汗錢

天聰汗錢

1616年（明朝萬曆四十四年），努爾哈赤喺赫圖阿拉嗰度稱汗建國，定咗個年號做天命，就開始鑄錢，有分老滿文“天命汗錢”同漢文“天命通寶”。早期嘅天命錢鑄造得比較粗糙，直到天命六年（1621年，明朝天啟元年）搬去遼陽，先正式開始鑄錢。因為嗰陣後金嘅關外經濟活動唔係好興旺，滿洲人大多都唔使錢，所以發行出嚟嘅天命錢好多都變成咗裝飾品。

1626年（明朝天啟六年），皇太極繼位。第二年改咗年號做天聰，就開始鑄“天聰汗錢”，呢啲錢比較大，係十大錢，錢文用嘅係老滿文。1636年，皇太極喺盛京稱帝，改國號做“大清”。因為嗰陣東北嘅貨幣經濟唔係好發達，仲有啲原始交易用物物交換，加埋戰爭中掠奪咗好多財富，令到當時對本朝貨幣嘅需求唔多，所以後金嘅錢鑄得好少。

後金嗰陣發行過嘅錢有以下啲：

正面錢文	羅馬化轉寫	幣值	年代	汗
ᠠᠪᡴᠠᡳ ᡶ᠋ᠣᠯᡳ᠍ᡢᡴᠠ ᡴᠠᠨ ᠵᡳᡴᠠ	Abkai fulingga han jiha	1 文	1616–1626	努爾哈赤
天命通寶	Tin1 meng6 tung1 bou2	1 文	1616–1626	努爾哈赤
ᠰᡡᡵᠠ ᡴᠠᠨ ᠨᡳ ᠵᡳᡴᠠ	Sure han ni jiha	10 文	1627–1643	皇太極

順治年間

内文：順治通寶

1643年（崇德八年），皇太極過咗身，佢個仔福臨繼位。1644年清軍入關，改咗年號做順治。嗰年開始喺北京設局鑄造“順治通寶”錢，隨住清朝統一全國，各地又陸續設局鑄造錢幣。順治通寶初初鑄行嘅時候，仲同明錢一齊流通，但過咗唔耐，清朝嘅錢就開始獨行。呢隻幣係用黃銅鑄造，入面有七成銅同埋三成鋅。順治通寶喺鑄行過程中，錢嘅制式改變過幾次，根據背文可以分為五種，即所謂嘅“順治五式”。

版別	圖例	背文	直徑	重量	鑄造時間	備註
順治一式		光背	24.5mm	3.8g	順治元年至二年 （1644年-1645年）
順治二式		有戶、工、陝、臨、宣、薊、延、原、西、雲、同、荊、河、昌、寧、江、浙、東、福、陽、襄局名	25mm-26mm	4g
順治三式		穿右係局名，穿左寫住“一厘”二字	26mm	4g	順治十年至十四年 （1653年-1657年）	呢款錢叫“一厘錢”
順治四式		穿左係滿文“寶”字，穿右係滿文局名	17mm	4.4g	順治十四年至十八年 （1657年-1661年）
順治五式		穿左係滿文局名，穿右係漢文局名，有陝、臨、宣、薊、原、同、河、昌、寧、江、浙、東	28mm	4g	順治十七年至十八年 （1660年-1661年）

咸豐年間

内文：咸豐錢

咸豐嗰陣係中國貨幣史上幣制好亂嘅一段時期，除咗以前歷朝發行嘅小平錢制錢之外，咸豐年間仲發行咗虛值大錢，仲有戶部官票、大清寶鈔等紙幣，亦都有咸豐寶藏、上海銀餅、銀錠等銀質貨幣。

參考書

• 郝延平：〈晚清沿海的新貨幣及其影響 Wayback Machine嘅版面存檔備份〉。
• 張惠信，1993，〈清代庫銀大集合〉，《中國貨幣傳奇》，台北：貿元。