大長今 (劇集)

出自維基百科,自由嘅百科全書
跳去導覽 跳去搵嘢
大長今
대장금
《大長今》片頭題字
《大長今》片頭題字
類型古裝野史劇集[1]
編劇金榮昡
導演李丙勳
主演李英愛池珍熙林湖洪利娜林玄植梁美京韓志旼朴恩惠
語言韓文
每集長度約60分鐘
主題曲原版:《蒼龍》(창룡)
香港版:《希望》
片尾曲《大長今OST》:《오나라 I》、《子夜吳歌》、《何茫然》
製作
製作公司MBC
播出國家/地區Flag of South Korea.svg 韓國/南韓 香港 Flag of the People's Republic of China.svg 中國 Flag of Singapore.svg 星加坡 Flag of Vietnam.svg 越南 Flag of Thailand.svg 泰國 臺灣 臺灣 Flag of Japan.svg 日本
集數54集
MBC首播
播出國家/地區 大韓民國
播出日期2003年9月15號-2004年3月23號
播出時間每週禮拜一、二夜晚九點十個字韓國標準時間
翡翠台首播
播出國家/地區 香港
播出日期2005年1月24號-5月1號
星和娛家戲劇臺首播
播出國家/地區 星加坡
播出日期2012年7月23號-10月26號
出面網頁
官方網站

大長今》(粵拼daai6 coeng4 gam1韓文대장금大長今 daejanggeum)係一套韓國MBC電視劇(時代劇),係齣大河野史劇集,由李英愛主演,故事係朝鮮王朝醫女長今嘅生涯。劇本金榮昡,導演李丙勳。齣戲喺2003年9月15號到2004年3月23號期間首播,套劇2003年喺亞洲各地播嗰陣,引發咗韓劇熱潮。收視率調查業體TNS Media Korea報道齣戲喺韓國全國嘅最高收視率記錄係55.5%(2004年3月23號播出),平均收視率記錄有成41.6%[2]

齣戲輸出到韓國以外嘅國家,如中國大陸香港臺灣日本美國俄國加拿大伊朗土耳其等地,攞到幾多人氣。喺香港,由翡翠台喺2005年1月24號到5月1號間放映,然後喺2012年7月3號到9月18號重放。另外通過呢個作品,演員李英愛有咗契機去做韓流明星,喺美國屬領波多黎各搞成咗活動。

《大長今》係再構嘅虛擬作品,寫嘅係朝鮮時代受中宗信任嘅醫女長今嘅人生。佢喺韓國嘅2003年9月15號到2004年3月23號期間放映,喺每週禮拜一同二播出。部戲講嘅人物主角係個孤兒宮女,原本喺王家廚房做嘢,後來成咗頭位國王嘅御醫女。喺個舊式嘅儒教社會中,婦女嘅角色比較次要,而少女長今喺煮飯方面自我努力,去奮鬥搵出做出朝鮮飲食嘅獨到秘密,佢亦探尋朝鮮嘅古傳醫學,自此爲國王同王族醫病。部戲係喺長今嘅史實基礎上改編,佢係朝鮮朝代頭一位王家女御醫。穿插喺部戲嘅內容刻畫咗韓國傳統韓文대한민국의 문화嘅婦女形象,決心爲咗目標而堅持,依據傳統觀念,要造出啲可以補身嘅飲食,要有利於健康,然後又進級到炮製各樣古傳藥方。

齣戲嘅製作資費約1500萬美金,自從2003年起喺各國播出,部戲收咗近四千萬美金[3]

古仔[編輯]

個古仔橫跨朝鮮國五任國王:自朝鮮成宗(1457年~1494年),到燕山君(1494年~1506年)、朝鮮中宗(1506年~1544年)、朝鮮仁宗(1544年~1545年)、朝鮮明宗(1545年~1567年)。個古仔有幾條人物綫,大體可以分成幾個時間段。

細個時[編輯]

古仔開頭係朝鮮成宗落令廢位毒殺自己嘅王后齊獻王后(又叫廢王妃尹氏),佢正係世子(將來嘅燕山君)嘅生母,噉係由於驚佢嘅獨斷性格會影響到呢位將來嘅國王。行刑之後,一個王家軍官徐天壽(日後長今嘅阿爸)有咗罪疚嘅陰影。歸家路上,佢遇到場意外,又意外噉得救,救佢嘅係位隱士,呢個人畀出個幾隱祕嘅預言,話:「你嘅人生會由三個女人來定奪:頭個女人會死喺你手下;第二個女人會畀你救,但又爲你而死;第三個女人會殺死你,但又會救咗好多人條命。」

多年後,朝鮮成宗駕崩,燕山君繼位,做咗朝鮮王朝第十代國王。朴明伊(日後長今嘅阿媽)係個新宮女,服務喺王室廚房。佢無意中見到自己嘅同門老友崔成琴落緊毒藥入仁粹大王大妃韓文소혜왕후(即係國王嘅阿嫲)嘅食物度,因爲當時大王大妃要徹底斬斷崔氏家族嘅權力,而崔氏家族已經傳咗御膳廚房總管尚宮個職位五個世代,造成崔氏家族嘅勢力,亦通過買賣各類物品入王宮賺取利益。朴明伊稟報咗自己老友呢個行爲畀嗰間廚房嘅總管,但佢估唔到總管金尚宮同自己嘅同門老友已經勾結咗,一齊計劃暗殺大王大妃嘅陰謀[4]。因爲驚陰謀敗露,佢哋決定用毒藥剷除佢。佢最好嘅親友韓白英搵計救佢,辦法係溝淡佢哋逼佢飲嘅毒藥,之後偷偷餵佢飲解毒藥。佢昏迷咗喺溪邊,但幾好彩佢咁啱遇到軍人徐天壽,呢個軍人救返生咗佢。徐天壽畀官府追殺緊,佢兩個都捲入當時嘅宮中暗鬥;之後佢哋相愛、結婚,一齊生咗個聰明女徐長今李英愛飾演),即係《大長今》嘅主人公。

喺王室廚房做宮女[編輯]

有一次畀老豆帶外出玩,徐長今嗰時仲好天真,要求自家老豆試吓同軍佬摔跤鬥力。當佢老豆最屘就來戰勝時,不料對手用刀自傷,嗌話徐長今老豆要謀害佢自己。徐長今喊住求佢放過老豆,無意泄露咗自己老豆嘅名姓,畀人知咗佢老豆曾係朝廷嘅官兵。正係呢條令徐長今老豆被捕帶走。之後徐長今阿媽帶住個女去搵老豆,但尋唔得,最後搵計聯繫上韓白英,即係當初喺王宮廚房時嘅同門老友,就係想幫手帶徐長今入去做宮女,希望日後可以報仇、洗清自己嘅冤屈。

不幸嘅係,崔家得知宮女朴明伊(徐長今阿媽)仲在生,佢哋決定派殺手整死長今阿媽。好彩,長今得救,搵得一個平民家庭寄養。徐長今自細冇咗父母,佢繼承阿媽嘅遺志,想去做水剌間(御膳廚房)嘅最高尚宮,攞到傳畀最高尚宮嘅祕傳書本,將阿媽嘅冤屈記喺入面。長今有次派去送酒畀大君李懌(之後嘅朝鮮中宗),求得人帶佢入去宮闕,做咗宮女。喺呢度佢大個女,緣份上咁啱得到尚宮韓白英(長今阿媽嘅老友)引導,教佢煮食料理嘅手法。

喺揀人做「水剌間最高尚宮」嘅比賽中,佢做咗韓尚宮嘅幫手(後尾韓白英先知長今係朴明伊個女),幫佢贏咗場比賽,而賽中崔家、尤其是崔尚宮(當初嘅宮女崔成琴,落過毒藥入仁粹大妃嘅食物度)喺度努力搞破壞。崔尚宮懷恨在心,要伺機報復。有一次朝鮮中宗要去浸温泉療養,韓尚宮同長今負責整國王嘅飲食。崔尚宮整咗個陰謀,落啲藥物入由韓尚宮同長今整嘅鴨肉餸度。中宗食咗呢味餸後接連昏迷多日,嗰陣啲御醫診斷病情出咗啲差錯,趁呢個機會,崔尚宮共主診御醫鄭潤壽密謀推罪於飲食度。崔尚宮誣陷佢哋,講假話韓尚宮同長今勾結趙光祖大人一齊謀反。因爲肉赤自己個學徒,韓尚宮認晒啲罪落身,話全部計劃都係由佢自己做嘅,同長今冇關。

雖然係噉,由於崔尚宮嘅勢力買通咗大監吳兼護(單案嘅主持),就判決佢兩個都有罪,落得奴婢嘅身份,流配去濟州島。喺去濟州島嘅路上,韓尚宮由於拷問嘅傷痕而過世。崔尚宮快快手提拔咗朴尚宮同尹尚宮,呢兩個人同佢同一派,來撐自己去頂替韓尚宮嘅位置,做咗水剌間最高尚宮,自此長今喺心度許諾,佢會有朝一日回歸王宮,去沉冤得雪、幫韓尚宮報仇。

禁衛軍官閔政浩有一次同外敵打交時畀刺客攻擊而受傷,但意外畀長今救傷而倖存,之後佢敬重長今,跟住佢亦去到濟州島。閔政浩提議幫佢走佬,但佢唔要,話如果噉做,佢會冇得返去王宮去洗清韓尚宮嘅冤抑、同時亦冇得去爲佢阿媽嘅死討公道。閔政浩決定同佢一齊留低,幫佢直到佢離開濟州島。

喺濟州島,長今遇到一個名叫張德中文长德 (医女)嘅女人,佢發現張德係個出名嘅醫女,但佢揀咗隱逸嘅生活。開頭,張德嘅直率性格傷害咗長今,但慢慢,長今先知嗰個女醫生係個好敬業嘅人,有住仁愛之心。日子過去,長今意識到只有一個辦法可以幫佢返去王宮,就係學醫,去做醫女。佢求張德教自己醫術。鄭雲白係長今嘅友人,佢同時亦係個喺朝中特立獨行嘅御醫,佢反對徐長今改行學醫嘅決定,因爲佢學來係去報復崔家。長今無視反對,佢堅持練習,贏得宮中實習醫女嘅位置,成功復歸宮廷[5]

之後佢實現咗老母嘅夢,經歷過做最高尚宮,然後做咗國王中宗嘅主治醫師,係第一位女御醫,賜予佢「大長今」嘅稱號,個劇情描繪咗個成功過程嘅古仔,講咗主人公長今當中嘅成功同愛情。「唔好悲傷,唔好喊,亦唔好咁簡單就放棄」,佢一生人都守住老母教畀佢嘅話,佢唔知韓白英係老母嘅親友,喺噉嘅情況下跟住佢修習廚藝,同佢結成咗尊敬、信賴嘅關係,同老友李連生培育出友情,通過同對手崔今英嘅廚藝對決、同閔政浩嘅戀愛,佢數次畀陰謀整蠱折磨,但長今依然堅強噉捱過。齣戲描繪長今嘅形象之餘,亦展示出華麗嘅朝鮮文化同數種宮廷菜式,介紹咗當時朝鮮嘅醫術。另外有個可以見到嘅大背景係「勳舊派」同「士林派」壯觀嘅權力鬥爭,勳舊派嘅代表有吳兼護、崔成琴、今英,士林派嘅代表有閔政浩、韓白英、長今,呢齣戲講到嘅權力鬥爭亦係種「魅力」。

登場人物[編輯]

主要人物[編輯]

水剌間內人長今→奴婢長今→醫女長今→水剌間最高尚宮→女御醫(大長今)
呢個古仔嘅主角。原本係水剌間內人(內人亦即係宮女),兼任過出納尚宮(出納員),歷經做內醫院醫女,乃至做到阿媽所夢想嘅水剌間最高尚宮,認受相當於正三品堂上官嘅大長今稱號。佢有天賦嘅才能同倔強嘅精神,繼承阿媽嘅遺志,克服各種障礙,向住目標奮鬥;除咗頑固嘅呢一面,佢亦多次做出爲自己惹來危機嘅事。喺佢嘅半世人中,經歷咗好多相遇同離別,作爲人不斷變強、不斷成長,最後以女人身份做咗朝鮮史上首位女御醫。崔氏一族崩潰後,佢代行水剌間最高尚宮(暫定嘅第15代人),展現出卓越嘅烹飪實力。國王中宗臨死時落密令,送佢去閔政浩身邊,最後兩人一齊結合。
水剌間內人今英→水剌間尚宮→水剌間最高尚宮
從長今幼年時就彼此競爭。宮女見習嗰陣就畀人稱爲烹飪天才,因而驕傲高竇,但亦有心精進烹飪,而佢嘅師傅兼姑媽崔成琴逼佢學謀略、理財能力、政治能力呢啲烹飪以外嘅嘢,所以佢覺得好唔痛快。喺爭最高尚宮位置嘅廚藝對決中,崔成琴輸咗,咁耐以來,雖然佢係崔氏一族嘅人,但佢受到韓白英同長今嘅形象影響,立志要做個廚藝叻人。佢要喺宮中做崔成琴嘅後繼人,而佢從前就對閔政浩抱有愛慕,閔政浩亦幾信賴呢個崔氏家族中嘅異質人,但作爲宮女,立場上係唔准戀上國王以外嘅男人,兼且閔政浩個心向住長今,所以佢求愛不得。另一方面作爲崔氏家族嘅人,佢畀強加嘅使命所翻弄,持續衝突喺「烹飪」、「戀愛」、「家族」之間。崔成琴話過要燒毀朴明伊嘅信,但佢冇照做,佢罷職之後,將封信畀返長今,離開咗宮中。
漢城府判官→內禁衞從事官→全羅道右水營濟州鎮萬戶→司憲府執儀→承政院同副承旨(兼內醫院副提調)
佢幾細個時就通過科舉試驗而合格,做咗秀才。佢武藝優秀,做文官,亦負擔武官嘅任務。佢追蹤倭國偵探時,一唔小心負咗重傷,暈咗。長今偶然路過,親手救佢一命,而喺佢意識清醒前長今就離開咗,但長今賴低咗件嘢,係件配飾,於是佢就知道件嘢嘅主人係佢嘅救命恩人,想搵佢。後來佢識得咗長今,之後先知佢就係配飾嘅主人,長今專心認真噉處事惹起佢嘅心,令佢一心想幫佢,長今流配濟州島時,佢採取大膽行動,做咗島上嘅海軍武官,兩個人嘅距離逐漸縮細。另外,對於今英嘅感情佢雖然感覺到,但反應淡薄,對待今英好節制。

王室人物[編輯]

佢嘅前代國王兼異母兄係燕山君,因爲不堪暴政,勳舊派嘅武官朴元宗、仲有成希顏韓文성희안柳順汀韓文류순정哋起義,發動宮廷政變(中宗反正),擁立佢做朝鮮第11代國王。即位前佢稱呼做晉城大君。佢有原因不明嘅皮膚病,係個身體虛弱嘅人物。年幼嘅長今畀人託付去告知政變起義嘅消息,於是佢遇到咗大君,長今想做水剌間宮女,就直接當面呼訴請求。之後,佢讚絕作爲宮女而成長嘅長今,長今做咗醫女後,又因爲搵出病因,而畀國王好高噉評價咗佢嘅醫術同功績,佢壓低晒班大臣嘅反對,任命佢做自身嘅主治醫師。另外一方面,身爲國王佢個心境孤獨,所以佢信賴真心對人嘅長今,呢種交心嘅親密令佢心動,但係畀佢作爲醫生而活躍嘅身份、定當爲女人娶佢做側室,對長今有種搖擺曖昧嘅「愛嘅心態」。喺內政方面,佢多次希望改革國政,但同班政變功臣(靖國功臣)有利害衝突,令佢冇得惗呢樣嘢。晚年,由於嚴重嘅腸閉塞呢件事,喺病床度悟到自己嘅死期近,落咗王命,將長今秘密送返閔政浩嘅身邊,之後病死。

佢係中宗嘅王后。史實當中,喺佢個仔明宗呢一代,佢掌握住政治實權,搞外戚當政,史家仲推斷係佢依次毒殺啲政敵,惡評佢係個毒婦,亦有認爲佢可以同前代國王成宗嘅母后仁粹大妃並稱做女傑、鐵娘子,不過呢齣戲中只將佢描畫成聰明嘅女人。佢運用自己聰明嘅判斷,向犯咗國法嘅長今伸出援手,畀佢隱密噉調查王上嘅病。佢啲手法無視慣例同組織,比較多單邊行動,因而雖然冇侵犯啲大臣嘅既得利益,但吳兼護哋都嫌惡佢。佢同長今之間有關嘅事幾多,對佢嘅人品有住完全嘅信賴。中宗嘅第一位王后係端敬王后,佢喺中宗即位數日後做咗廢妃,第二位王后章敬王后則係早逝,文定王后係中宗嘅第三位王后。

內命婦[編輯]

佢係正五品嘅王宮提調尚宮(總理宮中一切事務嘅女官)。崔家領頭嘅崔成琴能夠做到最高尚宮,背後係有佢隻手助力。當初佢都一直喺宮中任職,但到劇集後半,個劇情變咗,崔成琴爆佢收賄,因而佢跣腳落臺。於是佢就開始咗復仇。

  • 李淑 飾 副提調尚宮
  • 崔恩淑 飾 崔尚宮嘅姑媽,水剌間最高尚宮
  • 呂運計 飾 丁末今(丁尚宮,中文譯成鄭尚宮),醬庫尚宮→水剌間最高尚宮 粵語配音:林丹鳳

佢出身兩班,年歲已老,曾經係最高尚宮嘅候補,但佢自己唔鍾意權力爭鬥,所以佢隱藏住實力,去就任冷門職位,去做醬庫尚宮(管理調味料同埋泡菜嘅尚宮)。佢做咗見習期間時李連生嘅老師,對李連生同長今似粒女噉𡃶住。崔家嘅第十代水剌間最高尚宮因病引退,而又冇適任人,朴容信同崔成琴哋就推舉佢做最高尚宮,就係睇啱佢對權力毫無興趣,可以做得佢哋嘅扯綫公仔。佢係熱愛詩歌嘅風雅之人,性格直爽唔加掩飾,志高存遠,非常之嫌惡將食入人口嘅餸菜利用成政爭工具,佢堅持呢個心志,不惜同當權者衝突,而佢就當呢一切係嚴肅嘅遊戲。除此之外,佢起用人做主廚唔睇身份或者家世,而係睇實力,佢提出用競賽決定最高尚宮嘅擔任人,呢陣時朴容信失咗人事權,而崔氏家族想穩固對要職嘅霸佔,於是惹親佢哋嘅反感。佢決意改革畀崔家擺佈嘅水剌間,因而願意出山就任第11代水剌間最高尚宮。

  • 梁美京 飾 韓白英(韓尚宮),水剌間尚宮→水剌間最高尚宮 粵語配音:陸惠玲

雖然佢出身嘅身份低,但佢畀朴明伊讚過佢啲餸菜,於是佢做咗宮女,之後一直係朴明伊嘅密友。雖然佢機智噉救咗朴明伊條命,結果因爲覺得自己冇更多力量去幫朴明伊而自責,從此封閉內心。佢唔知長今係密友個女,而做咗佢老師。佢烹飪手勢叻,將丁末今嘅心志引以爲繼,同崔成琴爭最高尚宮個位,傳奇噉勝出,攞到個位。做咗最高尚宮後,先知長今係朴明伊個女,同長今悲喜相認,但接住就中咗崔家嘅陰謀,共長今一齊流放,由於拷問嘅傷,喺送去濟州島嘅路上斷氣。佢講嘢比較少,但作爲廚師對手藝同品格要求嚴格。長今有才能,但性格莽撞,呢啲佢都睇入眼,自幼就徹底噉鍛鍊佢。呢啲教導對長今嘅人生有住非常大嘅影響。

  • 甄美里 飾 崔成琴(崔尚宮),水剌間尚宮→水剌間最高尚宮→提調尚宮 粵語配音:黃麗芳

佢係崔氏家族嘅人,崔家自第五代國王文宗嘅時代開始就不斷有女人入去做宮女。透過做最高尚宮,來操控住水剌間,族中男人就利用攞到嘅特權去行商,發筆大財。細個嗰陣佢同韓白英以及朴明伊係好友,劇中有嗰陣嘅回想場面。但係佢作爲崔家一員,爲咗崔氏一族嘅繁榮,不擇手段嘅事都要去做,喺噉嘅「使命」面前,後生時佢都掙扎過,但個結局反抗唔到,從此就對「使命」唔再抱任何疑問,嗰啲妨礙到佢嘅好多宮女都畀佢拉晒落馬,就連曾經嘅友人韓白英、以前嘅部下尹令路呢啲宮女都畀佢落毒手。作爲崔家人佢致力於擴張權勢,而內心度承受住成身悲恨,然而佢仲係按家族成員嘅方式去生活。做宮女要成世人獨身(形式上係國王嘅後宮),所以佢當侄女今英係自己女,想佢繼續自己嘅人生軌跡噉工作。之後佢啲衰嘢揚晒見光,佢就從宮中逃脫。佢拜訪咗朴明伊嘅墓,然後想自首,喺返王宮嘅途中神志恍惚,結果跌咗落山崖。佢回想起同韓白英、朴明伊共同度過嘅幼年日子,然後跌死喺崖底。長今聽聞到佢跌死,佢嘅死亦傳晒成個宮中。

  • 金昭怡 飾 閔桂烈(閔尚宮),水剌間尚宮→淑媛殿至密尚宮→水剌間最高尚宮
  • 朴恩惠 飾 李連生(細個時:金素妍),水剌間內人→特別尚宮李氏→淑媛李氏
  • 崔慈惠 飾 盧昌伊(細個時:朱多英),水剌間內人→淑媛殿至密內人→水剌間尚宮
  • 李葉璽 飾 尹令路(細個時:金涵菲),水剌間內人→添附尚宮
  • 白賢淑 飾 大殿至密尚宮
  • 金政河 飾 訓育尚宮
  • 李美淑 飾 訓育尚宮

內醫院人物[編輯]

  • 朴垠樹 飾 申益弼,典醫監醫學教授→內醫院主簿→內醫院僉正(醫局長) 粵語配音:翟耀輝

佢中人出身,負責醫女研修。佢作爲優秀嘅醫官而過得順風順水,但試過因誤診而醫死重臣。長今因自家嘅知識而變得傲慢,失咗面向患者時嘅謙虛,佢就棒喝長今,訓喻佢:「身爲醫者,相比要做個聰明人,更加之緊要係做個深沉嘅人。一定要保持沉穩。」復歸內醫院後,佢幾高噉評價長今嘅醫術,而佢排除一切私情嘅嚴格心態則從未動搖。

之外人物[編輯]

  • 金慧渲 飾 朴明伊,水剌間朴內人→長今阿媽
  • 朴贊煥 飾 徐天壽,內禁衞軍官→長今阿爸

長今嘅養父。佢係服侍宮廷嘅廚師(熟手),手藝確實靈通,而性格既和氣又滑稽。佢怕老婆,唔多敢頂老婆頸,但佢哋係拍檔得幾好嘅夫婦。佢鍾意瞞住老婆去偷飲搦去賣嘅酒。佢經常偷啲公家嘅酒同人參,喺宮廷內又收取高價去賣啲鹹濕畫同埋來路不明嘅藥,噉來賺啲日常茶飯錢,但佢唔係根性惡劣嘅人。佢有個親生仔姜一道(年紀大過長今),但喺長今入咗宮中後因疫病而死亡。硫磺鴨事件後,佢又生多一個仔姜二道,但呢粒仔亦都年幼就死於瘟疫[6]。因爲親生仔都病死,所以將長今似親生女噉𡃶住。

佢係姜德九嘅老婆、長今嘅養母。佢經營住釀酒業。雖然把口講嘢尖酸、會將條數計到好死,但根底上係個柔和而內心溫暖嘅人。本名未詳。

  • 趙卿煥 飾 吳兼護(右相大人),宣惠廳堂上→右議政→左議政 粵語配音:源家祥

佢係宮廷裏頭嘅當權者。佢唔顧危險,發動政變終結燕山君嘅惡政,係令中宗成爲國王嘅人物之一(靖國功臣)。佢從承政院同副承旨開始擔任官職,硫磺鴨事件中佢做臨時嘅審案官。佢做司饔院嘅副提調,兼任提調,做正一品嘅右議政、兼內醫院都提調。喺之前佢冇應試科舉,所以冇官做,但佢參加咗政變,以此攞得權柄,一舉做咗堂上官。佢同崔家聯手,透過收賄來獲取財力,從而增強喺宮廷嘅發言權。之後佢啲惡事全部畀人發覺,因而免職,流放去離島黑山島

佢係崔成琴嘅阿哥,係崔氏家族當代嘅族長,係個中人出身嘅大商人。佢同吳兼護勾結,令佢能夠獨佔住向宮廷內輸入物品嘅特權。最高尚宮競賽時,佢指使崔成琴啲內助尹令路哋,去秘密標參韓白英,但呢啲妨礙對手嘅舉動反而唔係崔成琴鍾意嘅。日後佢啲衰嘢全數畀人發覺,因而佢逃亡,但佢走佬嘅事畀姜德九預測正咗,結果捉住咗佢,上完棒刑之後佢就貶做奴隸,罰去咸鏡道嘅礦山度做嘢,但由於棒刑啲傷呢個原因,佢喺移送途中死亡。

OST[編輯]

  • 《高原》(고원) — Craig Eastman
  • 《蒼龍》(창룡) — Eric Rigler
  • 《何茫然(韓文版)》(하망연)— 亞歷山德羅·沙飛拿(Alessandro Safina)
  • 《呼喚 一》(오나라 Ⅰ)— YUN
  • 《呼喚 二》(오나라 Ⅱ)— YUN
  • 《空八一五》(0815)— Eric Rigler
  • 《蓮實》(연밥)— Eric Rigler
  • 《德九》(덕구)— 朴在天
  • 《何茫然(英文版)》(Hamangyeon)— 亞歷山德羅·沙飛拿(Alessandro Safina)
  • 《APNA》— 林世賢
  • 《父女情》(다솜)— 林世賢
  • 《悲》(비)— 李時雨
  • 《短歌》(단가)— 李時雨
  • 《煙濤》(연도)— 白寶賢
  • 《The Legend Becomes History》— 金素賢
  • 《子夜吳歌(電音版)》(자야오가)— YUN
  • 《何茫然(演奏版)》— 柳京和

喺韓國嘅放映[編輯]

當初係惗住做全50集嘅,水剌間時代預定係做約17~20集嘅程度,但放映開始後,連日來獲得嘅收視率都超過50%,當中扮韓尚宮(韓白英)嘅梁美京,啲觀衆對佢嘅人氣仲高過預想以上,因爲噉,就急急腳將水剌間嘅情節延長咗10集左右。所以,劇集來唔切展開,延長到54集。

攞獎[編輯]

  • 2003年MBC演技大獎:女子最優秀獎、大獎 — 李英愛
  • 2003年MBC演技大獎:演技者部門特別獎 — 林玄植
  • 2003年MBC演技大獎:演技者部門特別獎 — 梁美京
  • 2003年MBC演技大獎:作家獎 — 金榮昡
  • 2004年百想藝術大獎:TV部門女子人氣獎 — 梁美京
  • 2004年百想藝術大獎:TV部門導演獎 — 李丙勳
  • 2004年第6回男女平等放送獎:大獎

歷史嘅事實同錯漏[編輯]

歷史嘅事實[編輯]

史實之中,《朝鮮王朝實錄》嘅《中宗實錄》中寫到話有個稱呼做大長今嘅人得到重用,王信任佢,呢位醫女做咗王嘅主治醫師。當時嘅朝鮮男尊女卑,但大長今嘅醫術夠優秀,所以受到國王嘅信賴。

有關大長今嘅記述喺《中宗實錄》有10處,提到擔任王嘅主治醫師嘅記述得一處,就係中宗三十九年十月嘅『予證女醫知之』(我嘅病症,女醫會知嘅)噉樣一行字。除此之外,長今嘅本名、出身等仔細嘅記錄冇流傳到,劇集中登場嘅長今個人物有關內容大部分係靠作家嘅想象力創作嘅古仔。

歷史嘅錯漏[編輯]

  • 《大長今》第18集中,爲咗款待中國來嘅使臣,整出咗「滿漢全席」招呼佢。之但係滿漢全席呢家嘢係網羅咗滿洲族同漢族所有餸菜嘅,係滿洲人征服咗中國、西藏等大幅嘅大陸,成立咗清朝後,爲咗滿漢融合,到第六代皇帝乾隆帝時先至登場嘅嘢。所以喺佢200年之前嘅朝鮮中宗,即係明朝時係冇呢家嘢嘅。
  • 宮中飲食日常基本上係3~5碟餸,特別日子時先有12碟餸咁多。而且宮中飲食大部分係男人整嘅,只有極少一部分係女人做嘅。
  • 日本筑波大學教授古田博司批評呢齣戲,話長今經歷嘅劇情「純粹係小說,唔會係史實」,因爲「喺朝鮮李朝,女子喺宮中出仕,就同王上結成近似婚姻嘅關係,一世人都冇得外出」,所以「唔會似戲中噉,長今可以噉樣出出入入」;另外,「戲中嘅李朝時代充滿各種顏色色彩,事實上當時欠缺顏料,喺民間冇咩花色」[7]。朝鮮王朝時代嘅陶瓷器(李朝白瓷等)顏料主要有三種:青(青花)、黑(鐵繪)、紅(辰砂),大多用當中嘅一色或兩色,畫成淡彩畫,冇嗰種華麗嘅彩瓷[8],呢啲突顯咗朝鮮獨特嘅審美意識。

大長今主題樂園[編輯]

  • 《大長今》攝影場地「楊州大長今主題樂園」係韓國國內第一間劇集主題樂園,位置喺京畿道楊州市晚松路(394~104,晚松洞30)。
  • 呢個攝影場拍攝過劇集《商道》、《醫道》、《王朝》、《菊熙》、《英雄時代》、《時間機器》等,《大長今》放映以後聚集咗人氣,2004年12月「楊州大長今主題樂園」開張。之後韓國國內加埋日本臺灣等幾多海外粉絲來訪問,但係後來啲建築老化,2011年12月31號以後就關閉咗。
  • 「楊州大長今主題樂園」場地關閉以後,將一部分拍攝品搬入「龍仁MBC劇集樂園(Dramia)」呢個片場,「龍仁MBC劇集樂園」改稱做「龍仁大長今公園」,至今運營中。

花絮[編輯]

  • 徐長今呢個角色當初係惗住搵宋玧妸張真英等來做[9],但佢哋因個人私事嘅理由而拒絕出演,最後經過波折,點到李英愛來演。
  • 洪利娜扮嘅崔今英角色當初係想點姜成妍來做,但佢要出演KBS 2TV月火迷你劇集《佢係最掂嘅》,所以告辭[10],因爲噉,姜成妍畀MBC方面抗議,於是就提案鄭善敬來頂替,但呢個人又要出演MBC《可愛嘅女人》,因而拒絕[11]
  • 做崔尚宮角色嘅甄美里當初係做韓尚宮嘅角色嘅,而崔尚宮角色係惗住點宋彩丸來做嘅[12],但因佢個人有事,就推咗呢齣戲,由梁美京代替韓尚宮個角色,而換甄美里去做崔尚宮個角。

睇埋[編輯]

[編輯]

  1. "宮廷女官 チャングムの誓い (2003 - 2004)". allcinema.net. 喺2018年3月21號搵到.
  2. "드라마 '대장금', 11년간 드라마 부문 최고 시청률 기록(漢諺:Drama '大長今', 11年間 drama 部門 最高視聽率記錄;粵譯:劇集《大長今》,11年間電視劇部門最高收視率記錄)". Sports Kyunghyang. 2011年7月4號. 喺2018年5月5號搵到.
  3. "Korean soaps cleaning up(粵譯:韓國劇集梳理)". 亞洲時報. 2005年8月31號. 喺2018年5月6號搵到.
  4. 尚宮係有六品職務嘅宮女,係婦女喺王宮做嘢攞得嘅最高職務。
  5. 喺古時朝鮮,婦女喺人生各個領域嘅地位都低過男人,包括佢哋嘅事業。喺燕山君時期,醫女等同係妓女,係王宮中最底層嘅婦女。
  6. 喺第51集,姜德久老婆同長今私底傾偈,講到佢哋嘅兩個仔都喺場瘟疫中冇咗,呢段劇情收埋喺呢段對話度。
  7. "『増殖する韓国の「自尊史観」』(粵譯:韓國日益增長嘅「自尊史觀」)". 正論. 2008年12月17號. 原著喺2013年3月11號歸檔. 喺2018年8月20號搵到.;「正論」呢個刊物喺日本係衆所周知嘅批判韓國、朝鮮嘅雜誌,呢度刊載嘅言論要注意佢強烈嘅政治主張。
  8. 吉田宏志 (1992年3月1號). "李朝の皿に描かれた絵画(粵譯:描繪喺李朝器皿度嘅繪畫)". 大阪市立東洋陶瓷美術館.
  9. ""'대장금' 이영애, '허준' 황수정은 7순위 배우"(漢諺:"'大長今' 李英愛, '許浚' 黃秀貞은 7順位 俳優";粵譯:《大長今》嘅李英愛、《醫道》嘅黃秀貞係排第7嘅演員)". Naver TV演藝. 2009年6月5號. 喺2018年6月4號搵到.
  10. "강성연 "'대장금' 출연제의 거절 후 경쟁드라마로 참패"(漢諺:姜成妍 "'大長今' 出演提議 拒絕後 競爭drama로 慘敗";粵譯:姜成妍《大長今》出演提議拒絕後去競爭劇集時慘敗)". Naver TV演藝. 2006年8月3號. 喺2018年6月4號搵到.
  11. "'허준-대장금'놓친 정선경 "서동요 꽉잡았어요"(漢諺:'許浚-大長今'놓친 鄭善敬 "薯童謠 꽉잡았어요";粵譯:《醫道》《大長今》都錯過嘅鄭善敬捉住咗《薯童謠》)". Naver TV演藝. 2005年5月31號. 喺2018年6月4號搵到.
  12. "[스타탐구] 송채환(漢諺:[Star探求] 宋彩丸)". 週間韓國. 2004年2月4號. 喺2016年6月29號搵到.

出面網頁[編輯]