學習強國
學習強國係由中共中央宣傳部主管，以中共總書記習近平嘅講話同思想為主要內容嘅理論學習平台，集新聞、即時通訊同社交網絡等功能於一身，包括流動應用程式（App）同網站，喺2019年1月1號上線[1]。「學習強國」個名係一語雙關，可以理解做「學習近平，將國家變強國」[2][3]。
內容
[編輯]流動應用程式包含要聞、新思想、時政綜合等板塊，收錄咗大量習近平嘅講話同影音內容。另外仲包括黨史資料、紅色革命旅遊景點介紹、中國文化資料、學者課程同廣播電視直播等。呢個平台引入學習積分系統，用戶嘅日常操作，好似登入、閱讀文章、睇影片、發表評論同答題等操作會累積學習積分[4]。
根據路透社引述兩個消息人士嘅話：學習強國係由阿里巴巴公司一個基本上不為外界所知嘅特別項目團隊「Y項目商業小組」開發。呢個小組負責公司以外嘅發展項目。呢個開發團隊仲負責維護呢個軟件嘅應用，當時仲喺度招募人員[5]。
2019年3月底，學習強國APP下線咗學習積分排名功能，取消咗高效時間，並且降低咗每日最高可獲得積分[6]。4月，積分排名嘅功能重新上線，新增全國總排名同實時排名嘅功能[7]。新規則實行之後引起更多人抱怨，由於每人每日能夠獲得嘅積分減少，而好多國有企業、政府機構同事業單位依然對分數嘅要求唔變，規則嘅改變意味住每日要擺更多時間落學習強國[8]。
評價
[編輯]中國共產黨官方傳媒《人民日報》話「學習強國內容權威、內涵豐富、特色鮮明，受到黨員幹部追捧」[9]。根據中國官方傳媒報道，一啲中共黨員表示好中意呢款軟件，話可以通過呢款軟件了解到時事同各類方針政策，而通過積分排行榜嘅形式，可以激勵成績優秀嘅黨員繼續保持，亦可以激勵成績較差嘅黨員繼續努力，有利於調動黨員學習嘅積極性[10][11]。
2019年2月，喺蘋果App Store中國區，學習強國app下載量登上第一位，但評分同評論功能被禁用、睇唔到。分析公司AppAnnie保留咗部分評論，其中有1星評價係「大家都係自願安裝嘅」，另外有1星評價係「呢個軟件太正啦」。《紐約時報》認為呢個軟件係中國共產黨努力喺流動網絡時代進行宣傳嘅有效手段，同時指出呢款app收到嘅好多評價都係冷嘲熱諷嘅口吻[12]。英國廣播公司嘅報道將佢形容做數碼版嘅《紅寶書》[13]。中國社交傳媒喺2019年3月短時間入面出現大量有關學習強國嘅宣傳內容，話佢「有益更有趣」。不過端傳媒嘅評論認為，社交媒體入面對呢個應用嘅正面評價係因為官方賬號同部分偽裝成普通網友嘅網絡評論員引導，同時應用將非政治性嘅知識同競賽融入政治性內容，實現政治向日常生活嘅全面滲透[14]。
《紐約時報》報道話中國好多人將用呢個APP視為做愛國主義嘅表現，不過都有好多人認為呢個係官員強加嘅政治任務，係加強習近平個人崇拜嘅手段。《紐約時報》話呢個係習近平喺數碼時代加強意識形態控制、強化共產黨權威嘅努力[15]。記者李佳佳喺用過呢個軟件之後，喺《紐約時報》上發表嘅文章評論話[16]：「無論呢啲新產品表面上睇落係幾花巧，佢嘅核心依然係對意識形態材料嘅強制學習，同埋對中央政府表忠心。」
參考
[編輯]- ↑ 李昌禹 (2019-01-02)。〈"學習強國"學習平台上線儀式在京舉行〉。《人民日報》。頁 01 版。原先內容歸檔喺2019-03-01。喺2019-03-01搵到。
- ↑ Audrey Jiajia Li (2019-04-04). "Uber but for Xi Jinping". New York Times. 原著喺2019-04-04歸檔.
study Xi and make the nation great
- ↑ "China's most popular app brings Xi Jinping to your pocket". The Guardian. 2019-02-15.
The app’s name “Study (Xi) Strong Country”, is a pun – Xuexi being the word for “study” but also containing the president’s name, suggesting users are to “study Xi”.
- ↑ 〈"學習強國"學習積分規則優化公告〉。原著喺2019-02-04歸檔。喺2019-02-04搵到。
- ↑ 海彥 (2019-02-18)。〈習近平"紅寶書""學習強國"手機軟件由阿裡巴巴開發操作〉。《美國之音》。原先內容歸檔喺2019-03-01。喺2019-03-01搵到。
- ↑ 〈福建黨員注意！學習強國APP有大變化！排名取消！積分規則變化！還有……〉。《東南網》。2019-03-28。原先內容歸檔喺2019-03-29。喺2019-03-29搵到。
- ↑ 〈學習強國積分排名又回來啦！還新增了全國總排名〉。《東南網》。2019-04-04。原先內容歸檔喺2019-04-07。喺2019-04-07搵到。
- ↑ 賈選凝。〈中國人手機裡最重要的app"學習強國"，黨政干部的數位升官圖〉。《風傳媒》。原先內容歸檔喺2019-04-14。喺2019-04-14搵到。
- ↑ 〈用"學習強國"激發學習力量（人民時評）〉。《人民日報》。原先內容歸檔喺2019-04-07。喺2019-04-07搵到。
- ↑ 〈"學習強國"好平台 比學趕超掀熱潮〉。《上游新聞》。萬州時報。2019-02-20。原先內容歸檔喺2019-03-27。喺2019-02-20搵到。
- ↑ 〈大黃山街道依托"學習強國"APP 掀起學習熱潮〉。《中國江蘇網》。徐州日報。2019-02-20。原先內容歸檔喺2019-02-21。喺2019-02-20搵到。
- ↑ RAYMOND ZHONG (2019-02-15)。〈"學習強國"App：在線版習近平"紅寶書"〉。紐約時報中文網。原先內容歸檔喺2019-02-15。喺2019-02-15搵到。
- ↑ BBC News 北京分社 (2019-02-16)。〈"學習強國"：習近平"紅寶書"登上App排行榜首〉。原先內容歸檔喺2019-03-01。喺2019-03-01搵到。
- ↑ 〈"學習強國"走紅後，黨在"同溫層"裡培育下一代？〉。《端傳媒》。2019-04-03。原先內容歸檔喺2019-04-07。喺2019-04-07搵到。
- ↑ Hernández, Javier C. (2019-04-07). "In China, an App About Xi Is Impossible to Ignore — Even if You Try". The New York Times. 原先內容歸檔喺2019-04-08. 喺2019-04-08搵到.
- ↑ 李佳佳 (2019-04-08)。〈使用"學習強國"是一種怎樣的體驗〉。《紐約時報中文網》。原先內容歸檔喺2019-04-09。喺2019-04-09搵到。