安省註冊平面設計師協會
安省註冊平面設計師協會（英文：Association of Registered Graphic Designers，簡稱 RGD；法文：Association des graphistes agréés；原名 Association of Registered Graphic Designers of Ontario）係一個加拿大安大略嘅專業組織，服務對象係從事平面設計嘅人同教平面設計嘅教育工作者；前身係加拿大平面設計師協會（GDC，現稱 DesCan）喺安省嘅四個分會，1996年經省議會嘅一項私人法案立法成立，正式脱離加拿大平面設計師協會，目前係加拿大會員人數最多嘅平面設計師協會，總部喺多倫多[1][2]。
爾個會負責管理一個叫 RGD（註冊平面設計師）嘅專業資格，喺安省係一種法定銜頭[3]，用嘅係同加拿大另外兩個平面設計師協會一樣嘅統一專業守則。不過雖然話係法定，並唔係指唔考資格唔可以執業，只係唔考資格唔可以用 ｢註冊平面設計師｣ 嘅銜頭執業。
爾個會嘅專業守則係所有會員都要遵守，包括冇考資格嘅附屬會員。
佢哋出過嘅刊物包括畀從業員用嘅手冊 《The Business of Graphic Design》 同講無障礙設計嘅 《Access Ability》。
雖然個會有正式法文名，但係其實佢哋淨係講英文。
組織及活動概況[編輯]
安省註冊平面設計師協會每年舉行一次教育工作者研討會（Design Educator Conference）、一次俾學生同畢業生嘅會議（Creative Directions）同兩次俾從業員進修嘅會議（DesignThinkers），其中 DesignThinkers 一年兩次係因為一次喺多倫多，另一次係喺溫哥華舉行。
除咗大型會議之外，個會亦都定期舉行網上講座（webinars）。
佢哋亦都每年評選四個獎項，分別係俾新晉設計師參加嘅 UltraBold 設計獎、獎勵對社會有積極影響嘅設計嘅 SoGood 設計獎、專俾公司機構內部人員參加嘅 In-House Design Awards 同一個 ｢年度最佳教育工作者｣ 獎[5]。
貢獻[編輯]
統一專業守則[編輯]
安省註冊平面設計師協會一向有用來考資格用嘅專業守則；而今加拿大嘅三個平面設計師協會共用嘅統一專業守則係由爾份守則演變而來。
2019年，安省註冊平面設計師協會同加拿大平面設計師協會同意統一佢哋嘅專業守則，用安省註冊平面設計師協會用開嘅專業守則做基礎，再參考加拿大平面設計師協會嘅專業守則，做咗一啲改動同加咗一啲新嘢，最先通過採用新守則嘅係加拿大平面設計師協會[6]，魁省平面設計師協會後來亦都加入。
2020年，魁省平面設計師協會通過採用統一專業守則[7]。
睇埋[編輯]
- 魁省平面設計師協會（SDGQ）
- 加拿大設計業專業人員協會（DesCan）
- American Institute of Graphic Arts（美國）
拎[編輯]
攷[編輯]
- ↑ "What is RGD?" (加拿大英文). Association of Registered Graphic Designers. 喺2022年12月1號搵到.
- ↑ "Bill PR56, Association of Registered Graphic Designers of Ontario Act, 1996". Legislative Assembly of Ontario. 1996. 喺2022年12月1號搵到.
- ↑ "5241 – Graphic designers and illustrators" (英文). Government of Canada. 喺2022年12月1號搵到.
- ↑ "Members network" (英文). International Council of Design. 喺2022年12月1號搵到.
- ↑ "2022 ULTRABOLD Awards" (英文). 喺2022年12月3號搵到.
- ↑ "RGD and GDC create joint Code of Ethics" (加拿大英文). Association of Registered Graphic Designers. 2019年4月9號. 喺2022年12月3號搵到.
- ↑ "SDGQ adopts common Code of Ethics with RGD and GDC" (加拿大英文). Association of Registered Graphic Designers. 2020年3月2號. 喺2022年12月3號搵到.
