阿方素 (安茹同加的士公爵)

出自維基百科,自由嘅百科全書
呢個人物係用緊西班牙人名:首姓或者父姓(即老豆個姓)係「波旁」,次姓或者母姓(即阿媽個父姓)係「達派維」。
波旁公爵阿方素,1963年攝

安茹同加的士公爵阿方素(西班牙文:Alfonso, duque de Cádiz y Anjou,1936年4月20號1989年1月30號),另有銜頭西班牙大公波旁公爵,全名阿方素·凱瑂·馬西利奧·曼紐·域托·馬利亞·德·波旁ー達派維(西班牙文:Alfonso Jaime Marcelino Manuel Víctor María de Borbón y Dampierre),係波旁王朝成員,西班牙王子凱瑂大仔、國王阿方素十三世嘅長子嫡孫。另外佢亦畀法國正統派擁立做佢哋嘅國王,稱號係「阿豐斯二世」(法文:Alphonse II)。

阿方素響羅馬出世,係凱瑂同第一任老婆嘅大仔,有一個細佬岡薩洛。因為1931年西班牙第二共和國嘅成立,令到王室走佬去外國,自然阿方素亦響外國出世。

1941年,阿方素同一家人到瑞士去睇阿嫲維多利亞·燕拿。響呢度,佢同細佬都畀人送去聖ー若聖書院(即後嚟嘅Villa St. Jean International School)。

本身王位繼承人係大伯阿方素。大伯自細身體唔好,患有血友病,所以一直好少代表王室公開同人民見面,但始終王儲就係佢。直至1933年,大伯因為要同平民結婚,所以放棄王位繼承權。老豆凱瑂作為國王二仔,本身係要繼承呢個位,但由於佢耳聾,所以被迫放棄自身同埋後人對西班牙王位嘅要求。最後由叔叔環王子繼承。

西班牙內戰之後,長槍黨領袖佛朗哥坐上最高領導人個位。而佢響1947年宣佈恢復王室。1949年,凱瑂話自己對西班牙王位有繼承權,推翻自己響1935年嘅決定。由於佛朗哥同王位繼承人環王子關係一直都唔好,所以響1952年,凱瑂畀阿仔阿方素返西班牙讀書。最初阿方素響德烏斯托大學讀法律,1955年到Centro de Estudios大學讀書。

佛朗哥同環王子關係持續變差,令到佛朗哥想換接班人。當時佢考慮過兩位候選人:一係加的士公爵阿方素,二係環卡洛斯。呢點響西班牙王室引發好大爭議。去到1964年,佛朗哥認為環卡洛斯係最好嘅接班人;但如果環卡洛斯做啲好過火嘅嘢,佢將會任命阿方素做接班人。1969年,當佛朗哥任命環卡洛斯做西班牙王子嗰陣,阿方素同意咗,又派人去巴黎,叫佢老豆唔好出嚟反對。

1975年3月,佢老豆死咗之後,阿方素繼位成法國正統派國王(未畀政府承認),佢嘅支持者叫佢做「阿豐斯二世」。同年8月,佢做咗安茹公爵

由1977年至1984年,佢出任西班牙滑雪聯合會主席;而1984年去到1989年,佢就係西班牙奧委會主席。

1989年1月30號,佢響美國哥羅拉度州滑雪出意外死咗,終年52歲。

屋企[編輯]

1972年,佢同佛朗哥個孫女第二代佛朗哥公爵卡雯·馬天尼斯ー波迪烏·佛朗哥結婚,有兩個仔:

1982年,佢同卡雯離婚。而兩個仔嘅監護權就畀咗阿方素。

1984年,佢同兩個仔滑完雪之後返屋企,點知響路上炒車,大仔法蘭西斯高當場死咗;細仔路易住院一個月,而阿方素本人亦因為呢場車禍而做咗六次手術。