環卡洛斯一世

出自維基百科,自由嘅百科全書
呢個人物係用緊西班牙人名:首姓或者父姓(即老豆個姓)係「波旁」,次姓或者母姓(即阿媽個父姓)係「波旁-兩西西里」。
環卡洛斯一世
西班牙國王
在位1975年11月20號ー2014年6月19號
加冕1975年11月27號
前任阿方索十三世
佛朗哥(西班牙考迪羅)
繼任菲臘六世

配偶希臘公主蘇菲亞(1962年結婚)
子嗣
全名
Juan Carlos Alfonso Víctor María de Borbón y Borbón-Dos Sicilias
家族波旁-安茹王朝
父王環王子
母后兩西西里公主瑪麗亞·瑪科迪絲
出世 (1938-01-05) 1938年1月5號(86歲)
出世地 意大利羅馬
簽章
宗教羅馬天主教

環·卡洛斯一世西班牙文Juan Carlos I1938年1月5號—),全名環·卡洛斯·艾方素·域托·瑪麗亞·德·波旁-波旁-兩西西里西班牙文Juan Carlos Alfonso Víctor María de Borbón y Borbón-Dos Sicilias),係西班牙國王,1975年至2014年在任。

簡歷[編輯]

早年同家族[編輯]

環卡洛斯(左)同老豆環、細佬阿方素,1950年

1938年1月5號,環·卡洛斯響意大利羅馬Viale dei Parioli街出世,係阿斯圖里亞斯親王環王子瑪麗亞·馬塞迪斯·波旁-兩西西里公主共同嘅第二個細路,第一個仔。由於王室喺1931年西班牙第二共和國成立後畀人廢咗,所以老豆同阿爺阿方索十三世走難到羅馬。佢之後由庇護十二世受洗。而佢嘅教父母,分別係阿嫲維多利亞·尤金妮亞同阿公卡洛斯·波旁-兩西西里

佢有一個家姐皮拉(1936–2020),一個細妹瑪嘉塔(1939-)。另外佢仲有個細佬,叫阿方素

1942年,全家搬到瑞士洛桑,而佢就入讀寄宿學校羅西學院。1948年,佛朗哥宣佈恢復王室,本身係要跟住老豆一齊返去西班牙,但因為環王子同佛朗哥關係差,令到環·卡洛斯響兩年後先至返到西班牙。佢一開始響聖塞巴斯提安接受教育,最後響1954年由馬德里San Isidro學校畢業。

不過,環·卡洛斯其實有讀寫障礙,啲老師都話佢上堂好難集中精神。所以佢要比其他人花更大嘅努力先至讀到書。

環卡洛斯,1968年

佢之後參軍,1955年至1957年響薩拉戈薩軍事學院深造,之後又曾經到馬林海軍學校同埋聖哈維耶爾空軍學校讀書。無耐,佢到馬德里康普頓斯大學法律,最後響1961年畢業。響讀完書後,佢搬到查瑞拉宮住。

1962年5月14號,佢同希臘同丹麥公主蘇菲亞響雅典結婚。蘇菲亞係希臘國王保羅一世嘅大女,王儲康士坦丁嘅家姐;而兩個人亦係第三代表兄妹關係。佢哋嘅婚禮先係響聖但尼大教堂羅馬天主教儀式搞,之後響雅典都主教座堂希臘東正教儀式搞。

細佬嘅死[編輯]

濯足節嘅夜晚,即1956年3月29號,細佬阿方素響葡萄牙海濱勝地艾斯杜尼嘅家族別墅死咗,原因係槍走火。西班牙官方係咁樣回應:

Whilst His Highness Prince Alfonso was cleaning a revolver last evening with his brother, a shot was fired hitting his forehead and killing him in a few minutes. The accident took place at 20.30 hours, after the Infante's return from the Maundy Thursday religious service, during which he had received holy communion.

據知,阿方素王子響嗰日贏到高爾夫比賽嘅獎,之後參加夜晚彌撒,衝入房去見當時啱由軍校返嚟嘅大佬環·卡洛斯。環·卡洛斯同阿方素都響入面玩一支子彈長22口俓嘅左輪手槍,而呢支手槍係屬於阿方素王子嘅。之後阿方素王子就死咗。由於當時得佢兩個響間房,加上冇法醫驗屍,所以冇人知道阿方素係點死,除咗環·卡洛斯本人,所以過程眾說紛紜。根據佢阿媽個裁縫嘅講法,當時環·卡洛斯唔知把槍已經上咗膛,就直至對住阿方素個頭,一槍打死咗佢;而環·卡洛斯個老友波蘭度·阿隆素就話,環·卡洛斯開槍嗰陣的確係唔知把槍已經上咗膛,不過係向牆開,結果子彈竟然反陣射中阿方素塊面。而根據家姐皮拉嘅講法,當時阿方素係想返入嚟間房,點知門柄撞到環·卡洛斯,結果佢就開咗槍。雖然過程係有好多講法,但有一點可以肯定:就係阿方素嘅死由環卡洛斯造成。

響知道細仔死咗嘅消息後,老豆環王子好震驚,即刻跑上樓,嘗試救返細仔,但唔成功。激動嘅佢,捉住環·卡洛斯大鬧:「話畀我知,你唔係特登嘅!」之後即刻送佢返軍校。

西班牙王子(1969-1975)[編輯]

環卡洛斯同佛朗哥一齊閱兵,1969年攝

當時西班牙係由長槍黨領袖佛朗哥統治。佛朗哥響西班牙內戰入面獲得勝利,之後就做咗西班牙最高領導人;1947年,佢恢復西班牙王室,亦將環王子睇成係佢嘅繼承人。隨住佛朗哥年紀越嚟越大,左派人士抗議嘅聲音一浪接一浪,希望恢復民主;同時之間,右派又要求恢復君主制,令到佢好頭痛。雖然當時王位繼承人係環王子,前國王阿方素十三世三仔,但佛朗哥極度唔信任佢:因為環係自由主義者,佢好驚環登基後會作反、推翻自己政權。兩個人之間關係又好鬼差,更加堅定咗佛朗哥要將佢換走嘅諗法。

佛朗哥曾經考慮過兩位取代佢嘅人選:一係安茹同加的士公爵阿方素凱瑂王子大仔,一位極度支持佛朗哥主義嘅波旁王室成員,後嚟仲同佛朗哥嘅孫女卡文結婚;二係環·卡洛斯,環王子大仔。最終,佛朗哥認為環·卡洛斯更加可以繼續佢嘅獨裁統治,決定跳過一代人,直接欽點環·卡洛斯做佢嘅繼承人;王子亦都接受。呢個結果響波旁王室引起好大爭議,特別係環王子。環王子響一次巴塞羅那伯爵樞密院搞嘅私人會議上面,話自己先至係合法王位繼承人,環·卡洛斯嘅存在會取代自己嘅一切權力。

唔理有幾多人反對,佛朗哥最終響1969年冊封環·卡洛斯係西班牙王子(而唔係阿斯圖里亞斯親王),承認佢係王儲[1]。而議會就響同年7月22號,批準咗佛朗哥嘅決定;條件係環·卡洛斯要宣誓效忠佛朗哥主義。呢一點同佢老豆唔同,佢好快就宣咗誓。

環·卡洛斯響做西班牙王子嗰陣成日同佛朗哥見面,又成日參加官方活動,仲大力支持獨裁政權,讚獨裁下嘅西班牙經濟有變好。由於佛朗哥年紀大機械壞,所以環卡洛斯都經常陪住佢出席公開活動。佢嘅行為惹嚟希望變天嘅左派人士抗議。但實際上環·卡洛斯同老豆一樣都係一位自由主義者,隨住時間一長,就開始靜雞雞作反。佢先係同流亡外國嘅自由派人士秘密見面,之後打電話同老豆秘密會談。佛朗哥對王子做嘅一切並唔知情,仲響顧問同下屬好心提佢「環·卡洛斯響某方面唔忠心於佛朗哥政權」嗰陣,唔聽佢哋嘅勸告。

1974年,佛朗哥身體已經差到處理唔到政事,環·卡洛斯代為處理。1975年10月30號,佛朗哥將權力完全交畀環·卡洛斯。

國王時代(1975-2014)[編輯]

民主改革[編輯]

1975年11月22號,環·卡洛斯響西班牙議會宣誓成為西班牙國王

1975年11月20號,佛朗哥過身。兩日後,西班牙議會宣佈環·卡洛斯成為西班牙國王。11月27號,佢響馬德里聖熱羅尼莫堂嘅彌撤上正式成為國王。佢一反常態,唔係揀「環三世」、「卡洛斯五世」,而係揀「環·卡洛斯一世」嚟做自己嘅稱號。

環·卡洛斯嘅登基唔係好受對議會反對。「國家運動」淨係得好少人投票反對佢。佢即位之後並無繼續獨裁專政,而係逐步引入徂民主政治。呢點引起保皇派同長槍黨成員嘅不滿,佢哋原本以為環·卡洛斯會延續佛朗哥嘅統治。1976年7月,環·卡洛斯炒咗首相卡路士·阿里亞斯·拿華路,一個佛朗哥嘅堅定支持者,仲試圖延續佛朗哥主義。國王任命阿道弗·蘇亞雷斯取代拿華路做首相。

1977年,西班牙舉行44年以嚟第一次普選,蘇亞雷斯做咗第一位民選嘅西班牙首相。同年,環·卡洛斯嘅老豆環王子為咗穩定民心,宣佈放棄王位繼承權同親王銜頭,承認環·卡洛斯係唯一嘅西班牙國定元首。環·卡洛斯就封佢為巴塞隆拿伯爵。同年5月12號,國王同人民社會黨總書記菲臘·干沙利斯見面。無耐,西班牙共產黨就宣佈合法化。左派越嚟越支持國王,但右派就開始反對國王,特別係軍隊仲有好多人奉行佛朗哥主義。

1978年,通過西班牙憲法公投。內容唔單止推動西班牙和平恁過渡到君主立憲制、建立西班牙議會;而且話環·卡洛斯係「歷史上嘅合法繼承人」,而唔係「佛朗哥嘅合法繼承人」。

政變[編輯]

內文:1981年西班牙未遂政變

保皇派一直希望恢復獨裁統治,返到佛朗哥時代。1978年有一次由保皇派發動嘅政變,但呢次政變好快就被平息。

1981年2月23號,保皇派軍人再次發動政變。當時西班牙議會正響度投票係咪支持新首相良保·卡爾沃-索特洛上任,突然之間國民警衛隊中校安東尼奧·特赫路帶住150人左右衝入議會,帶走代理首相阿道弗·蘇亞雷斯等人。華倫西亞地區隨即就宣佈進入緊急狀態,因為軍區司令剴瑂·米蘭斯·德爾博什係個佛朗哥支持者。

環·卡洛斯一世親自出馬,搵嚟三軍參謀長同埋內閣副大臣傾解決方法。第二日,環·卡洛斯就發表全國講話,表示「唔能夠容忍民主倒退」,呼籲市民支持合法嘅民主政府,叫叛軍投降,又話軍隊會盡全力嚟維持治安。好快,除咗先前進入緊急狀態嘅華倫西亞地區之外,西班牙其他地區都宣佈支持國王。

跟住其他地區派嚟嘅坦克包圍咗華倫西亞,剴瑂·米蘭斯·德爾博什政變失敗。同時,政府軍隊亦包圍由保皇派軍人控制嘅議會,而佢哋亦響同日投降。最終無人傷亡,呢個結果令佢贏得廣泛讚譽,佢嘅支持率一直保持響高水位。當時西班牙共產黨總書記聖迪亞高·卡利路仲話:「今日我哋都係君主主義者。」

1982年又有一班保皇派軍人試圖發動政變,但因為計劃畀人政府事先知道而政變搞唔成。

國家轉型[編輯]

響環·卡洛斯一世嘅領導下,西班牙政局越嚟越穩定,變得更加民主。1981年,西班牙加入北大西洋公約組織。一年後,左派嘅西班牙工人社會黨上台執政,由40歲嘅黨總書記菲臘·干沙利斯做新首相,建立西班牙46年嚟第一個左派政府;干沙利斯一直做首相14年,係西班牙史上做得最耐嘅民選首相,期間佢有效咁促進西班牙嘅經濟、社會改革,通過咗墮胎法、人身保護令、集會自由等一系刑措施,保障國家穩定。1986年,西班牙加入歐洲共同體。西班牙響八十年代至千禧年代,人民生活水平不斷提高。

至1982年由干沙利斯上台後,環·卡洛斯一世就變成象徵性君主。佢響紙面上有住比較大嘅保留權力。佢係憲法嘅守護者,有責任確保憲法嘅遵守。佢由嗰時開始主要擔任無黨派嘅角色,基本以政府嘅意見做嘢。不過佢都有相當大嘅道德權威。

1990年,佢訪問智利瓦爾迪維亞。西班牙響九十年代搞咗夏季奧林匹克運動會同埋世界博覽會

千禧年代[編輯]

2005年,當媒體問環·卡洛斯一世會唔會支持同性婚姻合法化嗰陣,佢答:「Soy el Rey de España y no el de Bélgica(我係西班牙,唔係比利時。)」佢響同年7月1號批準法例。

任期晚年[編輯]

2014年6月2號,環·卡洛斯一世突然宣布將會喺短時間之內退位,由細仔阿斯圖里亞斯親王菲臘皮繼位[2]。佢喺6月19號正式退位。

退位後(2014-)[編輯]

2020年8月,由於身陷貪腐醜聞,佢離開西班牙,喺阿聯酋過住流亡生活。

參考[編輯]

  1. "Those Apprentice Kings and Queens Who May – One Day – Ascend a Throne," New York Times. 14 November 1971.
  2. BBCCBC