1992年夏季奧林匹克運動會

1992年夏季奧林匹克運動會係第25屆現代奧林匹克運動會，1992年7月25號到8月9號喺西班牙巴薩隆拿搞。

背景

呢屆奧運會係冷戰結束後嘅第一屆奧運會，同樣亦係繼1982年FIFA世界盃後，另一項西班牙主辦嘅盛事，參賽國家嘅格局發生咗好大嘅變化，蘇聯解體後，12個前加盟共和國以獨聯體嘅名義參賽，波羅的海三國（愛沙尼亞、拉脫維亞、立陶宛）再次以獨立身份參賽，南北也門、東西德國都係喺兩個國家分別統一後首次參賽，克羅地亞、斯洛文尼亞同埋波斯尼亞黑塞哥維那獨立後首次參賽，被制裁嘅南斯拉夫聯盟共和國，亦同馬其頓共和國派出咗運動員，以「獨立選手」嘅名義參賽，至於捷克斯洛伐克就係喺1993年解體之前最後一次參賽，甚至乎阿爾巴尼亞闊別20年後，呢屆亦再次出席。

20年嚟，國際奧委會嘅所有成員，除咗處於戰亂中嘅阿富汗、索馬里、柬埔寨、利比利亞，全部喺巴塞羅拿聚埋一齊。

賽事焦點

• 本屆奧組委首次邀請50個國家嘅155名代表接力傳遞奧運聖火，由希臘嘅奧林匹亞採集嘅火種經過傳遞，最終抵達巴塞羅拿。
• 喺開幕禮入面，西班牙殘奧會射箭比賽獎牌得主雷波洛用弓箭將火把射出，點燃奧運聖火。
• 以往點燃聖火嘅同時，亦都會將白鴿放生，寓意和平，但上屆（1988年）點燃奧運聖火嗰陣時，有好多白鴿被燒死，國際奧委會喺本屆開幕禮開始，取消放白鴿嘅環節，以放氣球取代，同埋改喺晚上進行。
• 奧運會頭一次批准職業球員參加籃球比賽，美國NBA派出嘅美國國家男子籃球隊（由米高佐敦、拉利布特、魔術手莊遜等人組成）輕鬆攞到奧運冠軍。
• 南非共和國自1960年以嚟首次被解除制裁，重返闊別32年嘅夏季奧運會賽場。
• 响女子10000米賽跑入面，嚟自埃塞俄比亞嘅黑人女跑手狄娜度·圖魯（Derartu Tulu）同埋嚟自南非共和國嘅白人女跑手艾蘭娜·美婭（Elana Meyer）喺過終點之後，手拖手一齊慶祝，象徵住非洲種族大團結。
• 白俄羅斯嘅體操選手維他里·謝爾博（Vitaly Scherbo）一人攞晒6面金牌，創下喺單屆奧運會中贏得最多金牌嘅記錄。
• 棒球頭一次成為正式奧運會項目，古巴奪得金牌，中華台北奪得銀牌。
• 羽毛球同埋女子柔道亦都係首次成為奧運會項目。
• 西班牙足球代表隊經歷咗1982年FIFA世界盃12強分組賽包艇之後，喺呢屆奧運會足球比賽，派出哥迪奧拿等人做主力，最後贏得金牌。