1968年夏季奧林匹克運動會

出自維基百科,自由嘅百科全書
跳去導覽 跳去搵嘢

1968年夏季奧林匹克運動會係第19屆現代奧林匹克運動會,1968年10月12號到10月27號喺墨西哥墨西哥城搞。

呢屆奧運會一共有112個國家同埋地區代表團參加,當中有12個國家、地區頭一次派代表團參加奧運會,包括巴巴多斯伯利茲中非共和國剛果民主共和國薩爾瓦多畿內亞洪都拉斯科威特尼加拉瓜巴拉圭塞拉利昂美屬處女羣島

賽事焦點[編輯]

  • 由呢屆夏季奧運會開始,民主德國聯邦德國各自派出選手代表團參加,直到1988年。
  • 呢屆奧運會入面,中華民國以「台灣」嘅名義參賽,女子田徑選手紀政响女子80米跨欄項目贏得銅牌,成為現代奧運史上頭一位獲得奧運會獎牌嘅中國女子選手。
  • 喺田徑項目男子200米賽跑嘅頒獎禮中,兩位獎牌得主:非裔美國人湯美史密夫(金牌得主)同埋莊卡路士(銅牌得主)喺升國旗奏國歌嗰陣,舉起咗佢哋佩戴嘅黑手襪,象徵對黑色力量嘅支持,而旁邊嘅澳洲白人選手彼得諾曼雖然冇參與舉手,但都戴住象徵公平正義嘅奧運人權勳章表示支持。為咗表示懲罰,國際奧委會因此成世褫奪兩名美國黑人參加奧運會嘅資格,而彼得諾曼返到去澳洲後亦遭到封殺,同奧運無緣。到咗1996年,國際奧委會終於承認對當年兩位美國黑人嘅懲罰係唔啱嘅,並且認錯,重同時邀請已經51歲嘅湯美史密夫參加亞特蘭大奧運聖火嘅榮譽接力跑。而到咗2012年,澳洲奧林匹克委員會先至向當時已經瓜老襯嘅彼得諾曼致歉,並且感謝佢响種族平等上嘅卓越貢獻同埋付出。
  • 呢屆夏季奧運會係奧運開辦72年嚟,第一次用彩色電視技術向全球轉播。