1964年夏季奧林匹克運動會

出自維基百科,自由嘅百科全書
跳去導覽 跳去搵嘢

1964年夏季奧林匹克運動會係第18屆現代奧林匹克運動會,1964年10月10號到10月24號喺日本東京搞。

背景[編輯]

對於二次大戰之後經歷現代化過程嘅日本人嚟講,1964年嘅東京奧運意義真係好大。之前東京曾經計劃承辦1940年奧運會,但係因為發動侵華戰爭搞到當時嘅國際關係惡劣而流產。

太平洋戰爭打完之後,作為主要戰敗國之一嘅日本嘅地位更一敗塗地。1964年,東京終於成功申辦奧運會,對比下成為咗日本重拾自信嘅改革象徵,係經濟急速恢復、轉型和平政治嘅重要國家記憶,因此後尾日本人對於奧運會嘅申辦有住零舍特殊嘅感情。所以東京後尾响2020年又再次申辦夏季奧林匹克運動會,從而成為亞洲第一個兩次主辦夏季奧運會嘅城市同國家(由於武肺疫情全球大流行嘅關係,2020年夏季奧林匹克運動會已被褪後到2021年)。

呢屆奧運一共有94個國家地區派出代表團參賽,但係利比亞代表隊响奧運開幕禮後退出賽事,因此參賽國家同地區數目其實係93個。

南非共和國因為國內大搞種族隔離政策,亦喺呢屆奧運會開始被禁止參賽,直到1992年,當南非政府廢除隔離政策之後,先至獲國際奧委會批准,喺1992年巴塞羅拿奧運會當中亮相。

印尼因為力撐中華人民共和國,反對中華民國參加1962年亞洲運動會,而畀國際奧委會暫停會籍,因為咁,印尼拒絕參加呢屆奧運會,直到1968年夏季奧林匹克運動會先至再次派隊參加。