2022年冬季奧林匹克運動會

2022年冬季奧林匹克運動會，係第24屆冬季奧林匹克運動會，2022年2月4號到2月20號喺中華人民共和國北京搞。

2015年7月31號，喺馬來西亞首都吉隆坡舉行嘅第128屆國際奧委會全體會議入面，北京以44票比40票擊敗阿拉木圖，攞到呢屆冬季奧運會嘅主辦權，做咗奧運史頭一個成功申辦夏季奧運會、冬季奧運會嘅雙奧之城。

呢次冬奧，除咗因為武肺疫情帶來唔穩定之外，國際社會亦因為中國侵犯香港泛民主派同新疆維吾爾族人嘅人權，出現咗一啲要求轉換場地或者杯葛嘅聲音。

呢屆冬奧總共有91個國家同地區代表團參加，之但係，北韓因為單方面缺席2020年夏季奧林匹克運動會，違反《奧林匹克憲章》，而喺2021年9月8號畀國際奧委會暫停會籍，因此北韓被禁止參加呢屆冬奧，2022年1月7號，北韓因疫情關係宣佈缺席北京冬奧。

至於五眼聯盟成員國方面，2021年12月6號，美國白宮宣佈唔會派官員出席2022年北京冬季奧運會，理由係中國鎮壓穆斯林少數民族群體同犯下其他侵犯人權嘅行為。紐西蘭同澳洲隨後同樣宣布唔派外交官出席北京冬奧。12月8號，英國同加拿大以中國人權狀況惡化為由，宣佈唔派官員參加北京冬奧。不過，佢哋同樣會派運動員代表團出席。

比賽項目

呢屆冬奧會舉行七個大項、十五個分項、109個比賽小項。比起上屆平昌冬奧會，呢屆冬奧新加入女子單人長雪橇、快速溜冰混合接力、混合團體跳臺滑雪、自由式滑雪男子同埋女子大跳臺、自由式滑雪混合團體空中技巧、單板滑雪混合團體障礙追逐。

• 高山滑雪（11）
• 冬季兩項（11）
• 長雪橇（4）
• 越野滑雪（12）
• 冰壺（3）
• 花式溜冰（5）
• 自由式滑雪（13）
• 冰球（2）
• 短雪橇（4）
• 北歐兩項（3）
• 短道速度溜冰（9）
• 俯式冰橇（2）
• 跳臺滑雪（5）
• 單板滑雪（11）
• 速度溜冰（14）

賽事焦點

• 挪威代表團打破四年前平昌冬季奧運會嘅單屆攞到最多金牌紀錄，一共攞到16面金牌，進一步鞏固冬季運動強國嘅地位。
• 中國代表團唔止打破咗12年前溫哥華冬季奧運會嘅單屆攞到最多金牌紀錄，亦都成功打破埋2006年都靈冬季奧運會、2010年溫哥華冬季奧運會嘅單屆攞到最多獎牌紀錄（喺2006、2010年嗰兩屆冬季奧運會，中國代表團攞到11面獎牌），攞到9金、4銀、2銅，總共攞到15面獎牌，喺金牌榜名列第三。

睇埋

• 同2022年冬季奧林匹克運動會有關嘅問題
• 外交抵制2022年冬季奧運會
• 冰墩墩同雪容融