蘇菲亞 (西班牙王女)

蘇菲亞王女
私人明細
全名	Sofía de Todos los Santos de Borbón y Ortiz
父	菲臘六世 (西班牙)
母	莉迪芝雅王后
出世	2007年4月29號（16歲）; 西班牙馬德里

蘇菲亞王女（西班牙文：Infanta Sofía，2007年 4月29號—），全名萬聖嘅蘇菲亞·德波旁ー柯蒂斯（西班牙文：Sofía de Todos los Santos de Borbón y Ortiz），係西班牙第二皇位繼承人，現任西班牙國王菲臘六世二女。

簡歷[編輯]

2007年4月29號下晝四點五十分，蘇菲亞響魯伯國際醫院用剖宮產呢個方法出世，係阿斯圖里亞斯親王菲臘同莉迪芝雅嘅第二個細路，而佢嘅出世由王室通過短訊公佈。佢嘅臍帶響剪咗後，同家姐莉安諾王女一樣畀人送去亞利桑拿州嘅臍帶血注冊處登記同埋儲存。呢點響西班牙引起爭議。

佢個名「蘇菲亞」嚟自佢阿嫲蘇菲亞王后。同年7月15號，佢響查瑞拉宮接受洗禮，教父母係Paloma Rocasolano（佢阿婆）同埋維丁親王康士坦丁ー阿森（保加利亞最後一任國王斯美昂二世個仔）。佢亦都有遺傳到波旁家族傳統嘅名「萬聖嘅」。

佢之後入讀響馬德里阿羅凡卡（暫譯，英文係Aravaca）嘅Santa María de los Rosales學校，佢老豆同家姐都響到讀過書。

2017年5月，佢響Asunción de Nuestra Señora接受第一次聖餐，並且係響老豆阿媽、家姐莉安諾、Menchu Álvarez del Valle（太嫲，阿媽莉迪芝雅王后個阿嫲）、阿爺環卡洛斯一世、阿嫲蘇菲亞王后、繼阿嫲Ana Togores同埋教父維丁親王康士坦丁ー阿森咁多人嘅見證下去食。