寶礦力水特（Pocari Sweat，以前繙做「寶礦力」），係一種流行喺日本嘅運動嘢飲，由日本大塚製藥研發。寶礦力水特同人體體液相近，可以好快補充人體嘅水份同電解質，通常喺運動之後飲，嚟補充隨住汗水流失嘅水份同電解質。除咗原產地日本之外，喺中國大陸、香港、臺灣、大韓民國、泰國、印尼同阿剌伯聯合酋長國都有代理發售。寶礦力水特味道近似稀釋咗嘅西柚汁。
