將死

將死，粵拼：zoeng1 sei2，英文：checkmate，又或者叫將殺，係國際象棋同類似遊戲，比如係中國象棋，之中會有嘅一種狀態。由於呢啲棋規則上係某隻特定嘅棋，下稱王，俾對手食咗就即輸，而將死就係指某棋手隻王俾佢對手逼入一個境地，跟住落嚟行邊步都會被食。

將殺嘅記號喺代數記譜法被記為井字 (#) ，例如 34.Qh8#，或者 ++。（++ 符號有陣時會被用來講雙將。）

規則

喺國際象棋規則上，要達成將死，必須同時滿足以下三個情況^[1]：

國王俾對手攻擊緊：國王處於對方啲棋嘅攻擊範圍之內（將軍）。
走唔甩：國王無論行去邊一格，依然會繼續處於受攻擊嘅狀態。
化解唔到：受攻擊嗰方無法
1. 用自己嘅棋去食對方嗰隻攻擊緊國王嘅棋，或者就算食咗嗰隻棋，國王都會畀另一隻棋攻擊^{[註 1]}。
2. 喺國王同攻擊者之間「墊」一隻棋嚟阻擋攻擊路徑。

譬如係以下呢啲棋局，都出現咗將死狀態。

D. Byrne vs. Fischer

白國王遭到將殺：黑城堡攻擊緊佢，佢左右嗰兩格（b1 同 d1）受黑騎士攻擊，同時白國王冇得食黑城堡，噉係因為黑城堡後面有黑主教看住。^[2]

Fool's mate

白國王受將殺：黑皇后攻擊緊佢，而且佢無法化解攻擊——冇任何一隻白棋有能力食黑皇后，或者移去白國王同黑皇后之間嘅位阻擋黑皇后攻擊。

Checkmate with a rook

黑國王受到將殺：白城堡正喺度攻擊佢，同時 g4 g5 g6 畀白國王看住。

响現實比賽，大部分棋手喺知道局面挽回唔到嘅時候，都唔會等自己被將死，會主動認輸（resign）。呢種認輸嘅行為唔會被認為係無禮貌，相反，係一種有體育精神嘅行為。

喺國際象棋戰術入便，有一系列技巧可以用嚟迫對方嘅國王陷入絕境。除咗直接攻擊之外，高級嘅將殺通常仲會配合埋多種戰術嚟用，例如係對手雖然有棋可以救國王，但係因為規則所限而焗住將自己嘅棋移去不利嘅位置。

例如牽制戰術係將殺過程入便嘅強力技法：若果對方有一隻棋，例如主教，受到某隻強力嘅己棋，例如城堡或者皇后，攻擊，同時因為該敵棋身後就係敵方嘅國王，所以規則上佢冇得郁，因此就受到「牽制」；呢種戰術好有用，如果對方某隻防禦用嘅棋子被牽制，佢就無法攻擊己方進攻敵方國王嘅棋，亦無法阻擋。

牽制嘅例子

呢盤棋出現咗牽制嘅情況：規則上，如果有某一步棋行咗係會令到己方國王受攻擊嘅，嗰步就唔行得；喺呢盤棋入便，若果黑騎士（e6）郁，黑國王就會受到白主教（f5）攻擊，所以規則上隻黑騎士唔准郁，即係話黑騎士受到牽制。

將殺格局嘅概念，就係指一啲喺實戰入便成日重複出現嘅將殺位置方法。熟識呢啲模型，有助棋手快速發現捉贏棋嘅機會。^[3]

英文：checkmate 一詞，據講嚟自波斯語。據講呢隻詞嘅原始語源係：

波斯文：شاه مات / Shāh Māt

當中 Shāh (شاه) 係指君主或者國王呢類意思，而 Māt (مات) 則係無助或者戰敗噉解。所以成段說話意思可以理解為國王陷入無助之意。^[4]

喺現代用語中，啲人亦成日會用將殺一詞，嚟指喺第啲遊戲中將對手迫入絕境。^[5]

Burgess, Graham; Nunn, John; Emms, John (2004), The Mammoth Book of the World's Greatest Chess Games (第2版), Carroll & Graf, ISBN 978-0-7867-1411-7
Kurzdorfer, Peter (2003), The Everything Chess Basics Book, Adams Media, ISBN 978-1-58062-586-9
Silman, Jeremy (1998), The Complete Book of Chess Strategy, Silman-James Press, ISBN 978-1-890085-01-8