屏山
(由屏山 (香港)跳轉過嚟)
屏山（Ping Shan）係香港新界一個鄉，響正元朗西面。屏山最出名係聚星樓，香港政府亦都開咗條屏山文物徑。文物徑重有古井同鄧氏宗祠呢啲古蹟。
屏山西北面有天水圍，西便有廈村，西南面有洪水橋，東北係橫洲，東面係水邊圍，南便係唐人新村。
屏山雖然夾響元朗新市鎮同天水圍新市鎮中間，但都保得住鄉下風貌。屏山分做三圍六村，三圍係上璋圍、橋頭圍同埋灰沙圍，而六村係坑頭村、坑尾村、塘坊村、新村、洪屋村、新起村。
地理
[編輯]屏山地勢平坦，但亦有幾座矮山圍住。屏山東面有條坑，係舊時呢處主要水源。
史
[編輯]古時屏山係海側邊，所以有唔少漁民聚集響附近海面。不過去到20世紀中期，唔少人圍塘造田，加上沙泥沖積，屏山就離愈遠。
早期屏山無乜記載，直至到12世紀後期，住響岑田（家下錦田）嘅鄧氏有五大房人，分別係元英、元禧、元禎、元亮、元和。除咗元亮呢房，其他四房都周圍搵地起屋。而元禎呢房人，就揀咗屏山開村[1]。
去到屏山鄧氏七世祖鄧彥通。1382年，即係洪武15年，佢俾當時大明皇帝朱元璋封做寧國府正堂。佢就響屏山起咗七層嘅聚星樓，不過座塔後尾俾雷劈淨三層[2]。
交通
[編輯]屏山中間有青山公路（屏山段），係呢區大馬路，東去元朗，南去屯門。而輕鐵就有幾個站響屏山，南面青山公路有屏山站同塘坊村站，東面屏廈路有坑尾村站，而北面輕鐵就同西鐵綫天水圍站匯合。