洪水橋
洪水橋（粵拼：hung4 seoi2 kiu4；英文：Hung Shui Kiu）喺香港新界西部，介乎屏山同屯門藍地之間，喺屯門區同元朗區交界之上。青山公路都路經洪水橋。輕鐵經過都經洪水橋，有洪水橋站。
香港政府屬意發展洪水橋新市鎮，又叫洪水橋新發展區。洪水橋地域將大為拓展。
史
[編輯]1920年代嘅地圖，見唔到有洪水橋個地名。最近嘅村係佢西便嘅田心圍，同南便嘅鍾屋村。有河由鍾屋村過青山公路流去石埗，向北流向屏山西便嘅澤地出海[1]。
1949年經已有報導洪水橋，當時歸響屏山之下[2]。1967年地圖，有洪水橋地名標喺青山公路同丹桂村路交界。而洪水橋大街當時只係叫大街。嗰時洪水橋主要係田，大街同青山公路交界以西有屋[3]。
今日洪水橋嘅核心喺青山公路同洪水橋大街交界以西，田廈路以東。
行政
[編輯]洪水橋一帶，地方行政來講，喺元朗區同屯門區邊界上便。界由西便近足球場伸入田廈路，由田廈路南入到青山公路，青山公路北行到和平新村里，屈入和平新村里河邊，以河為界。界北係元朗區，界南係屯門區[4]。
區議會來講，和平新村歸入屯門區屯門鄉郊分區。洪水橋核心入元朗區廈村分區，而河東就入屏山南區。