屬格
屬格（粵音：suk6 gaak3）係名詞嘅其中一格。簡化講，語法格係指名詞要視乎佢喺語句入便扮演咩角色嚟變樣，而屬格就係指緊名詞「擁有者」嘅角色嗰時要變嘅樣。用粵語做例，阿珍部手機爛咗呢句說話之中，阿珍就係處於屬格個位。
對屬格等語法格嘅分析，傳統用於歐洲語言。例如英文喺一般情況下，男性嘅第三人稱代名詞係 he（近似粵音：hi1）但假如語句中嘅男性佢扮演「擁有者」嘅角色嗰陣，就唔係用 he 而係要將隻詞變做屬格形態 his，例如想講佢本書唔見咗：
- 錯誤例子：He book is missing.
- 正確例子：His book is missing.
喺呢度 his 就係由原格嘅 he 轉做屬格形態 his，用嚟表示佢嘅噉嘅意思。就算講嘢嗰方唔使用屬格，聽嘅人依然可能聽得明佢想講乜，但講出嗰句說話就會錯語法。某啲語言（例如拉丁文同俄羅斯文）甚至語序唔重要，靠格嘅變化嚟表達邊樣嘢屬於邊個。
基本概念
[編輯]用英文做例。廿一世紀初嘅英文已經演變到冇咩格詞形變化可言，得返代詞等少數嘅詞語會有格詞形變化[1]：
- This is him.
- → 粵譯：「呢個係佢。」（賓格）
- This is his dog.
- → 粵譯：「呢隻係佢隻狗。」（屬格）
响句一當中，he（男性佢）係句子賓語；而句二入面，his（男性佢嘅屬格形態）就表示佢嘅。即係話英文中嘅男性佢要按照「係主語、賓語定係表示擁有」而變樣——做主語用 he，做賓語用 him 而表示擁有就用 his。
屬格（歐文簡寫 gen）係語法格一種，用嚟標記某個名詞係用嚟修改第個名詞嘅，而喺歐洲語言中，常見嘅係行先嗰個名詞「擁有」跟住佢後面嗰個名詞，簡單講屬格嗰個就係「擁有者」嘅名詞。事實係第啲歐洲語言仲有更複雜嘅屬格變化，諸如拉丁文[2]、德文等英文以外嘅日耳曼語言、以至捷克文同俄羅斯文等嘅多種斯拉夫語言，唔淨只係代名詞有「做主語做擁有者，隻詞會唔同咗樣」嘅情況，所有名詞都有噉嘅情況。
所謂擁有未必真係擁有，而係可以係第種關係。例如，如果用現在分詞將一句句子變成名詞短語，原句嘅主語喺德文會變屬格；英文本來都係一樣，但係而今喺非正式場合好多時都係變賓格而唔係變屬格[3]。
漢語實例
[編輯]傳統上，語法格相關嘅分析主要係用於印歐語言嘅。不過好似粵語同官話等嘅漢語都有類似屬格嘅結構。
嘅、的句
[編輯]漢語中嘅屬格擁有關係一般由以下三個部分組成：
- 擁有者 + 屬格標記 + 被擁有者
例如喺粵語入便，最常見嘅屬格標記係嘅一詞，例如我嘅志願作「我所擁有嘅志願、屬於我嘅志願」噉解，結構係我（擁有者）嘅（屬格標記）志願（被擁有者）。呢種結構同官話中嘅的結構高度相似：
- 我的志願（普拼：wǒ de zhì yuàn）
意思基本上等同粵語我嘅志願，結構係我（擁有者）的（屬格標記）志願（被擁有者）[5]。
量詞活用
[編輯]除咗嘅、的呢種「標準」做法外，粵語仲可以直接用量詞表示擁有，而唔使嘅。例如以下用普通嘅量詞：
- 我隻狗
意思係指「我所擁有嘅狗」，結構係：我（擁有者）隻（量詞充當屬格標記）狗（被擁有者）噉嘅樣。同樣嘅構造仲可見於我部手機（我所擁有嘅手機）、阿苹件衫（阿苹所擁有嘅衫）同埋阿明架私家車（阿明所擁有嘅私家車）等嘅名詞短語[6]。量詞啲亦有類似功能，仲可以進一步標示被擁有方數量多過一個[註 1]：
- 我啲書
係指「我所擁有嘅書」而呢啲書數量超過一本[7][8]。例句仲有你啲同事、佢啲仔女等等，都係將擁有者（你、佢）同被擁有者（同事、仔女）用啲一詞連接起嚟，表示屬格噉嘅關係而被擁有方數量多過一個。量詞扮演屬格標記噉嘅作用，係有粵語特色嘅用法，能夠令語句簡化。
其他語言
[編輯]印歐語言
[編輯]以印歐語言嚟講，英文被指係喺語法方面有高度嘅簡化。廿一世紀初嘅英文整體上冇咩格變化可言，但仍然保留咗屬格嘅基本用法。屬格常用嚟表示擁有、隸屬或者類似嘅關係，一般名詞[註 2]主要透過兩種方式表達[9]：
- 加 's（例如：A-ming's book 表示阿明嘅書）
- 用 of 結構（例如：the color of the sky 表示個天嘅顏色）
以 's 結構為例，以下係一句簡單嘅英文語句，當中用咗屬格標示物件嘅擁有者：
句中嘅 friend's 就係屬格形式，表示本書係由朋友擁有嘅。除咗加喺人名或代名詞後，英文嘅 's 有時亦可以加喺時間詞（例如 today's news 表示今日嘅新聞）或者抽象概念（例如 the company's policy 表示間公司嘅政策）後面。使用得宜可以令句子更簡潔、更清晰。
其他語言
[編輯]其他非印歐系嘅語言，都會有方法表示屬格或者類似嘅嘢。
日語都有方法標示擁有者同被擁有者之間嘅關係。日語中最常見嘅屬格標記係助詞
- 擁有者 + の + 被擁有者
例如：
- わたしの車（日羅：watashi no kuruma）
結構係わたし（我，擁有者）の（屬格標記）車（車，被擁有者）。呢個構造喺語法功能上，同粵語嘅我架車或者官話嘅我的車高度類似。の除咗可以表示擁有關係，仲可以用嚟連接形容詞同名詞、表達所屬分類、材料來源... 等等，係日文文法入面一個極之常用而多功能嘅元素[11]。
睇埋
[編輯]註釋
[編輯]引咗
[編輯]- ↑ Comrie, B., & Thompson, S. A. (1985). Lexical nominalization. Language typology and syntactic description, 3, 349-398.
- ↑ Hale, William Gardner; Buck, Carl Darling (1903). A Latin grammar. Ginn.
- ↑ Chicago Manual of Style (美國英文) (第18版). 5.118.
- ↑ Mäkinen, Panu (2004). "Genitive Stem". Finnish Grammar (英文). 喺2025年6月18號搵到.
- ↑ Yang, Yong (2014). "Generalized Case Theory and the Argument-Omission Structure in Mandarin Chinese". Chinese Lexical Semantics. Lecture Notes in Computer Science.第8922卷. pp. 441–447. doi:10.1007/978-3-319-14331-6_44. ISBN 978-3-319-14330-9.
- ↑ Tse, S. K., Li, H., & Leung, S. O. (2007). The acquisition of Cantonese classifiers by preschool children in Hong Kong. Journal of child language, 34(3), 495-517.
- ↑ Cheung, C. C. H. (2012, May). The non-parallelism between CP and the low IP area in Cantonese. In 14th China's International Conference on Contemporary Linguistics, Xi'an International Studies University, China.
- ↑ 啲
- ↑ Benjamin Thorpe, 編 (1861). The Anglo-Saxon Chronicle. Rerum Britannicarum Medii Aevi Scriptores.第23卷. Longman and Co. p. 372.
- ↑ の，粵典；喺廿一世紀初粵語中，呢個平假名粵語群體成日讀作 zi1。可以睇睇訓讀嘅概念。
- ↑ Shin'ya, Asano; Hiroyuki Una (February 2010). "Mood and Case: with special reference to genitive Case conversion in Kansai Japanese". Journal of East Asian Linguistics. 19 (1): 37–59. doi:10.1007/s10831-009-9055-y. S2CID 123519063.