山廈村張氏宗祠

出自維基百科,自由嘅百科全書
Jump to navigation Jump to search
山廈村張氏宗祠外觀

山廈村張氏宗祠,又叫華封堂[1],喺香港新界元朗區屏山山廈村(而家叫山下村),喺嘉慶20年(1815年)起,係村民聚會同祭祖嘅地方,1999年被評為法定古蹟

[編輯]

山廈村(而家叫山下村)嘅開村始祖係張直臣,早喺明朝因為經營鹽業,由東莞簧村搬去新安橫洲,喺清朝順治年期間搬去山廈村現址。康熙元年清廷嚴厲執行遷界令,張氏族人被迫搬走。康熙8年復界之後,部分族人未有回流返嚟,導致分居各地。時到今日,山廈村仍然係張氏嘅單姓村落[2]

張氏宗祠由該族第22代嘅張炳南、張志廣、張耀晃同張瑞一喺嘉慶20年起。1930至50年代宗祠曾經做過鄉村小學,畀村中嘅子弟讀書,而女仔就只可以喺晚間時分入祠裏面上學。1958年當族人喺欖口村附近起咗華封小學之後,祠裏面前廳嘅左邊廂房就由校長室改成村公所,用咗長達10年,而家就用嚟貯物,左邊側走廊曾經用嚟做廚房。

建築[編輯]

張氏宗祠係傳統2進一院3開間式青磚嘅建築,門額金字「張氏宗祠」,大門外掛咗南海陳景舒[3]寫嘅「民愛國體 爵振家聲」嘅對聯。廂房喺天井兩邊,後進明間放置咗歷代祖先木主嘅神龕,頂層供奉唐朝丞相張九齡嘅靈位,山廈村同廣東東莞張氏族人大多數供奉張九齡為祖先[4];兩邊偏廳分別掛咗咸豐11年「旨賞換花翎」同辛酉科「武魁」牌匾。

香港政府喺1998年中至1999年尾由建築署古物古蹟辦事處負責監督張氏宗祠復修嘅工程,慶祝重修完成嘅開光典禮喺1999年12月19號舉行。

參考[編輯]

  1. "元朗山廈村:生計、教育" (PDF) (用中文寫). lcsd.gov.hk. (原先內容 (PDF)喺2011-09-20歸檔). 喺2011-02-23搵到. 
  2. "元朗山廈村:立村" (PDF) (用中文寫). amo.gov.hk. 喺2011-02-23搵到. 
  3. 陳景舒,1931年出世,廣東佛山人。而家係中國書法家協會會員、廣東省書法家協會主席、廣東省文史研究館館員同埋廣東省書法藝術基金會會長。擅寫隸書,佢適遍兩漢簡牘碑刻,旁及歷代書跡,博取眾長,形成出入於東漢隸書同西漢竹簡之間嘅個人隸書面目。
  4. "元朗山廈村:張氏宗祠" (PDF) (用中文寫). amo.gov.hk. 喺2011-02-23搵到. 

出面網頁[編輯]