差人

  提示：呢篇文講嘅唔係公安。

芝加哥嘅差人

差人（粵拼：caai1 jan4），又叫差役（caai1 jik6）同埋警察（ging2 caat3），中國大陸度依家係由公安（gung1 on1）抑或人民警察（簡稱民警）去執行呢部分嘅職權，而香港仲係由警務處所屬嘅專職警隊去負責執法。差人一般有權拉人返差館問話；有出街行嘅，又有坐寫字樓嘅文職；分軍裝同埋便衣。

香港警察舊時俗稱叫做綠衣或者大頭綠衣。香港成為英國殖民地之後，就出現咗屬於香港嘅警隊。而嗰陣時警察成員大多數係印度人，由於香港人慣咗叫印度人做「阿差（aa3 caa1）」，加上差又有衙差嘅意思，所以喺兩者結合之下，香港人就慣咗叫警察做差人。

名同衍生詞彙

「差役」係粵語入面最先對「Police」嘅嗌法，呢種嗌法嚟自中國歷史上面分布喺唔同地方嘅治安機構「衙門」入面負責執行差事嘅「衙門差役」，後嚟演變做「差人」，至於「警察」就係再後嚟先由第啲語言度引入嘅。

由於嗰陣時嘅粵語社會將呢種職業嗌做「差人」，於是衍生咗好多同「差（caai1）」呢隻字有啦掕嘅詞語，譬如差佬（後生就嗌差仔）係攞嚟嗌性別係男嘅差人，而女嘅就嗌差婆，而佢哋做嘢返工嘅嗰笪地方就嗌做「差館」。

「暗差（am3 caai1）」，意思係暗藏身份嘅差人，同埋「雜差（zaap6 caai1）」，意思係要處理好多垃雜嘢嘅差人，都用嚟指而家嘅刑偵。