劍河
(由康河跳轉過嚟)
想搵中國貴州黔東南嘅縣嘅話，請睇劍河縣。
劍河（粵拼：gim3 ho4，英文：River Cam），又譯康河，係東英格蘭嘅一條河，流經劍橋市中心。
名
[編輯]劍河個名係一個左借右借嘅故事。條河古時叫「格蘭打」(Granta)，後來有人喺河邊起咗條村，於是叫條村做「格蘭打橋」（古英語：Grantebrycge）。條村個名慢慢演化成「劍橋」（Cambridge），並因為劍橋大學嘅成立而令到條村出名過條河。所以中世紀時，啲人就掉返轉用條村個名嚟叫返條河，變成「劍河」(Cam)。而Granta呢個名就仍然用喺劍橋市以外嘅一部分劍河支流。
流域
[編輯]劍河有兩大支流，一條叫Rhee，起源赫福郡；另一條叫Granta，起源雅息士郡。兩大支流喺劍橋市西南匯合成劍河，由南至北穿過劍橋市，呢截河就係遊客最熟悉嘅「後花園段」(The Backs)，大學唔少學院都跨過條河，主要大樓喺河東、花園同宿舍喺河西。條河去到抹大拉學院附近轉右，之後向東北流，去到伊利(Ely)加入大烏茲河(Great Ouse)，最後流出北海。
-
王后學院、數學橋 -
聖約翰學院、嘆息橋 -
抹大拉橋、撐船碼頭
康樂
[編輯]劍河最出名嘅活動係扒艇(rowing)同埋撐船(punting)。扒艇用槳，用撥水嚟推隻船向前，係劍橋大學嘅主要運動項目，喺河嘅下游度扒。撐船用篙，靠篤河底嚟推進，遊客去劍橋必試。
另外，河上面仲有人扒獨木舟同釣魚。下游可以玩帆船。上游仲可以游水，但係市中心嗰截河太污糟，唔俾游。
-
扒艇比賽 -
遊客撐船
