後小松天皇

出自維基百科,自由嘅百科全書
Jump to navigation Jump to search
後小松天皇

後小松天皇日文:後小松天皇/ごこまつてんのう Go-komatsu Tennō1377年8月1號1433年12月1號)係日本第一百位天皇,亦係持明院統第六代天皇,原名幹仁(日文:幹仁/もとひと Motohito),響1392年11月19號至到1412年10月5號在位。

佢係後圓融天皇大仔,阿媽係三條嚴子。但係佢畀人懷疑係大臣足利義滿嘅私生仔。

經歷[編輯]

佢響1382年冊封做皇太子,同年老豆後圓融天皇讓位畀佢做天皇。

佢響任內最大嘅貢獻就係統一咗南北朝,但係後嚟實權畀大臣足利義滿掌握,搞到班使者唔知當今日本天皇係後小松天皇,以為足利就係日本天皇。咁樣一嚟,後小松天皇就畀人懷疑佢之所以做到天皇係因為有足利嘅幫助。

響大覺寺統嘅後龜山天皇投降嘅時候,後小松天皇曾經應承過佢,話佢死咗之後會傳位畀後龜山天皇大仔小倉宮恆敦親王,爾次談判叫做明德和約。但係後嚟後小松天皇聽咗足利義滿嘅說話,將皇位傳畀自己個仔實仁親王,違反咗明德和約,所以導致咗大覺寺統嗰邊嘅強烈不滿,特別係恆敦親王同佢後人。之後好長時間入面,佢哋試圖搶返皇位,即係後南朝運動。

佢將皇位傳畀實仁親王之後,自己就做上皇,改叫上皇幹仁,實施院政,而實仁就係稱光天皇

後嚟,稱光天皇早死,所以佢又傳畀契仔、 崇光天皇嘅太孫伏見宮彥仁親王,彥仁就係後花園天皇,而佢就繼續實施院政。佢做咗廿年嘅上皇,響1433年死咗,終年五十六歲。

仔女[編輯]

  • 長皇子 實仁親王(即係稱光天皇
  • 次皇子 小川宮親王
  • 長皇女 理永女王
  • 三皇子 一休宗純(聽講係私生仔)
  • 契仔 伏見宮彥仁親王(即係後花園天皇