徐志摩

出自維基百科,自由嘅百科全書
跳去導覽 跳去搵嘢
徐志摩

徐志摩1897年1月15號1931年11月19號),原名徐章垿槱森,小字又申,另有筆名南湖雲中鶴,係中國新月派代表性詩人。佢一生追求「愛」、「自由」同「美」,倡導新詩格律。

生平[編輯]

早年[編輯]

徐志摩1897年響浙江海寧出世,出身響富裕家庭。老豆徐申如係清未年間嘅生意人,早年繼承家業開醬園,後嚟越做越大,唔單止有一座發電廠、一間梅醬廠、一間絲綢莊,響上海仲有間錢莊;同時又係硤石商會會長。而阿媽錢慕英就係徐申如嘅第二任太太。因為徐志摩係獨仔,所以屋企人特別錫佢。

1900年開始,佢入家塾讀書。七年後,佢入讀硤石開智學堂,跟隨老師張樹森,從此打好咗古文基礎。

1910年響硤石開智學堂畢業後,經表叔介紹,入讀杭州府中學(1913年改名叫杭州一中,依家就係杭州高級中學),同郁達夫厲麟似同班。

求學階段[編輯]

徐志摩同張幼儀

1915年畢業於杭州一中之後,考入上海滬江大學(即依家嘅香港中文大學崇基學院,而校址就畀咗上海理工大學)。同年10月,響老豆阿媽嘅安排底下,佢同張幼儀結婚。但係徐志摩唔鍾意佢,甚至第一日見面已經話:「鄉下土包子!」

同年年尾,佢轉讀上海浸信會學院;一年後又退學,前往國立北洋大學(即依家嘅天津大學)法科系。1917年,北洋大學法科系正式併入北京大學,而佢亦到轉到北大讀書。響北大嘅求學時期,佢接觸到好多新事物,令到本身就浪蕩不羈嘅徐志摩,更加堅定咗自己要追求理想人生嘅諗法。

1918年6月,佢正式拜梁啟超為師。同年8月,佢去美國留學,入讀克拉克大學歷史系。一年後又轉入哥倫比亞大學政治學系。

1920年3月,佢轉為到英國留學,入讀倫敦政治經濟學院,期間識咗英國作家H.G.威爾斯,開始對文學有興趣。同年,佢識咗林徽因,對佢一見鍾情,開始追佢。但係自己身為有婦之夫,咁樣去追人哋唔合理,所以佢就要求當時有咗BB嘅張幼儀墮胎兼離婚。張幼儀唔同意,話「聽講有人因為墮胎而死咗」,但徐志摩唔理,見張幼儀唔肯,就一走了之。

1922年,徐志摩正式同張幼儀離婚,之後轉校至劍橋大學國王學院,同年10月返中國。

進入文壇[編輯]

徐志摩同陸小曼

1922年10月返中國後,就即刻響報刑上發表好多文章。

1923年,佢同胡適聞一多梁實秋陳源等人創立「新月社」,個名由徐志摩改嘅,取自印度詩人泰戈爾嘅《新月集》。同年佢做咗北京大學英文系嘅先生。

1924年4月,佢做泰戈爾嘅翻譯,陪佢響中國各地訪問;之後又陪佢到日本、香港。同年8月,出版第一本詩集《志摩的詩》。同年12月,《現代評論》響北京創刊,佢做咗主要撰稿人。

1925年,佢升任北京大學教授,同年辭任;之後環遊歐洲

1926年,佢應邀出任光華大學教授兼東吳大學法學院英文教授。同年10月同陸小曼結婚。

1927年,新月社因為種種原因,中心開始由北京轉移到上海;同時佢亦同陸小曼搬到上海住。同年參加創立新月書店;之後佢又出國旅行。

1928年,佢兼任上海大夏大學教授。同年10月,同聞一多、饒孟侃葉公超等創辦《新月》月刊。11月,代表作《再別康橋》響《新月》刊登。

1929年辭任東吳大學、大夏大學教授一職,同年又出任中華書局編輯,之後兼任大東書局編輯。9月應邀出任國立中央大學文學院英文文學系教授。

1930年,出任中華文化基金委員會委員,畀人選為英國詩社社員;同年辭任上海光華大學、南京中央大學教授,轉到北京女子大學教書。

1931年,聯同陳夢家方瑋德等創辦另一個月刊《詩刊》。同年2月返嚟北京大學,出任英文系教授。

飛機失事[編輯]

1931年11月19號,林徽因要響北平協和禮堂演講關於「中國建築藝術」嘅嘢,徐志摩因為心入面仲有林徽因,希望去捧個場,就響當日朝早八點搭上中國航空公司「郵政號」飛機,由南京飛去北京。當飛機飛到濟南開山(即依家濟南長清區崮雲湖街)嗰陣,因為大霧而撞落開山,徐志摩因而死咗,終年三十四歲。

主要作品[編輯]

  • 詩集:《志摩的詩》,《翡冷翠的一夜》,《猛虎集》,《雲遊》。
  • 散文集:《我所知道的康橋》、《落葉》、《巴黎的鱗爪》、《自剖》、《秋》。
  • 小說散文集:《輪盤》。
  • 另有戲劇《卞昆岡》(同陸小曼合寫),日記《愛眉小札》、《志摩日記》,譯著《曼殊斐爾小說集》等。

親戚[編輯]

老豆:徐申如

阿媽:錢慕英

元配:張幼儀

  • 大仔:徐積鍇(1918年 - )
  • 細仔:徐彼得(1922年 - 1925年)

第二任太太:陸小曼

另外,香港出名作家金庸係佢表弟(金庸個阿媽徐祿同徐申如係兄弟姐妹關係[1]);政治人沈鈞儒係佢表叔;而台灣女作家瓊瑤就係佢嘅表外甥。

參考[編輯]

  1. "【金庸逝世26】金庸筆下「表哥」多負情郎 徐志摩疑是背後主因 | 蘋果新聞網 | 蘋果日報". 蘋果新聞網 (中文). 喺2021-06-02搵到.

[編輯]