崇基學院
崇基學院（Chung Chi College），係香港中文大學屬下成員書院之一，喺1951年成立，亦係1963年香港中文大學創校嗰時三間成員書院之一。
緣起
[編輯]喺崇基學院禮拜堂嘅聖壇兩旁，懸掛咗原大中華（1951年前）嘅十三間基督教大學嘅校徽木刻。呢「十三校徽」代表咗崇基學院嘅創立，係去繼承大中華十三間基督教大學嘅辦學使命。另外喺崇基行政樓側小廣場前，亦種植咗紫薇十三株（「十三紫薇」）做象徵。[1]
- 之江大學（1845年成立）
- 華中大學（1871年成立）
- 華西協合大學（1910年成立，前校長馬臨嘅母校）
- 上海聖約翰大學[註 1]（1879年成立）
- 嶺南大學[註 2]（1888年成立）
- 金陵大學（1888年成立，前校長李卓敏嘅母校）
- 東吳大學 (蘇州)[註 3]（1900年成立）
- 齊魯大學（1904年成立）
- 滬江大學（1906年成立）
- 華南女子文理學院（1908年成立）
- 金陵女子大學（1913年成立）
- 福建協和大學（1915年成立）
- 燕京大學（1919年成立）
喺1950年，中國大陸所有嘅基督教大學都先後畀中共當局接管咗，香港各基督教教會代表，認為需要喺香港創辦一間以中文為主嘅基督教高等學府，於是乎喺1951年10月創立咗崇基學院，以繼承返中國大陸既往嘅基督教大學悠久優良傳統嘅使命，並喺1955年依照返香港政府法例註冊成立。[2][3]
學院辨識
[編輯]校名
[編輯]崇基學院旨在繼承國內十三間基督教大學之辦學使命；本「崇奉基督」之精神，命名「崇基學院」[註 4]。「崇基」亦兼含「崇高基礎」之意。[4]
校訓
[編輯]崇基學院校訓係「止於至善」，語出《大學》：「大學之道，在明明德，在親（新）民，在止於至善。」[4]
校徽
[編輯]崇基校徽由圖案同文字組成，圖案上方係校名「崇基」二字，下方係校訓「止於至善」四字，兩者都係小篆。校徽圖案取材自唐代「大秦景教流行中國碑」嘅圖案。[4]
校歌
[編輯]校歌歌詞喺1952年創作嘅。内容宣述咗創校嘅時代使命，仲勉勵學子志學勤修，本著基督嘅精神同校訓「止於至善」嘅精神，融合中西學術，以發揚文化、匡時救世為己任。[5]（試聽「崇基學院校歌」可睇呢度。[6]）
- 崇基學院校歌 （H. S. Thompson 曲、謝扶雅詞）
南天海嵎，四方人士，同興此學府。
崇奉基督，勵志篤行，修業勤是務。
漫漫長夜，屹立明燈，使命莫辜負。
學成致用，挽救狂瀾，靈光照寰宇。
神州學術，源遠流長，數典不忘祖。
自由民主，嘉誼友邦，協力相互助。
中西結晶，增益文明，聖教宏其緒。
濟濟菁英，天降大任，至善勉同赴。
特色
[編輯]學院校訓係「止於至善」，勉勵每一位同學，世事同人生皆難達至完美境界，必須不斷努力，以「圓滿」做永恆目標。同其他幾家書院唔同嘅，除咗學院本身嘅基督教背景，就係學院範圍內嘅禮拜堂同設有神學院。崇基禮拜堂更係喺香港大專界中獨有嘅座地式教堂。大學九間成員書院入邊，得崇基學院係設有音樂同埋神學課程。[7]
註
[編輯]- ↑ 1965年臺灣度相關團體礙於政策限制，艱難復辦先做咗工業專科學校，到2003年改名聖約翰技術學院至2005年改聖約翰科技大學。
- ↑ 在港相關團體1967年以「嶺南書院」名義復校，到1999年恢復大學稱呼。
- ↑ 臺灣度1951年由東吳旅臺同學會以補習學校嘅名復校，到1969年改咗正名。
- ↑ 喺香港中文大學九間成員書院之中，只有崇基學院係以「學院」為名，其餘八間都以「書院」為名。另外，喺中文大學稱為「學院」嘅單位，可以係「書院（英文：College）」（只有崇基學院），亦可以係「學術學院（英文：Faculty）」（例如：醫學院，英文：Faculty of Medicine）或者「專業學院（英文：School）」（例如：藥劑學院，英文：School of Pharmacy）。
