中大學生報情色版事件

出自維基百科,自由嘅百科全書
Jump to navigation Jump to search

中大學生報情色版事件係指香港中文大學學生會屬下嘅《中大學生報》,係2007年5月因為「情色版」嘅內容被報紙報導而引起嘅一連串事件。事件嘅爭議主要同學生點睇性呢件事、中大校方嘅處理手法、出版自由言論自由等議題有關。呢單野除咗影響後續嘅人點寫《中大學生報》之外[1],亦影響了之後香港互聯網嘅文化[2]同報章點進行自我審查[3],並誘使香港特區政府檢討返《淫褻及不雅物品管制條例》[4][5]

香港喺1987年開始就立咗條《淫褻及不雅物品管制條例》,規管「內容屬於或含有淫褻或不雅成份(包括暴力、腐化或可厭嘅成份)嘅物品」,並規定要罰犯咗呢條條例嘅人[6]。到咗2007年5月6號,中大神學院嘅兩個學生黃達威同埋馮子釗就住《中大學生報》情色版嘅內容向各大報章報串,於是第二日就有三份報章喺到駡《中大學生報》嘅內容唔道德同太過露骨,並借機駡埋大學嘅道德教育做得唔好。5月8號各大媒體都開始聚焦喺呢單嘢上面,視線則轉放咗響2007年2月號嘅一篇問卷上,因為佢有部分問題關於亂倫同埋人獸交,觸及到社會對性嘅禁忌[7][8][9][10][11]。於是嗰啲內容通晒天之後就備受社會爭議,影視及娛樂事務管理處為此收到唔少人嘅投訴[9][12]。校方喺5月10號搞咗個有關呢件事嘅裁決小組;而《中大學生報》嘅編委則因為校方唔理佢哋嘅要求,而決定同個小組割蓆[9][13][14][15]

就喺同日,《中大學生報》編委為此搞咗場論壇同公眾解釋,順便回應埋觀眾嘅問題[16][17]。喺論壇臨尾個陣校方就向編委發警告信,響信入面叫佢哋唔好再寫《中大學生報》,但5月份嘅《中大學生報》只係延遲些少出版[8][9][16][18][19][20]。另外嗰日《中大學生報》亦被送咗去淫褻及不雅物品審裁處(下面會簡稱佢為淫審處)做評審[9][13],1-2日後就初步評佢為「不雅」[9][21]。呢個時候社會始出現認為《中大學生報》冇錯嘅聲音。佢哋認為淫審處或校方係處理呢單野時嘅手法有違學術自由或出版自由。但社會上都有一批反對《中大學生報》嘅聲音,反方認為《中大學生報》一啲都唔道德同低俗[7][8][22]。之後編委再喺旺角西洋菜街搞第二場論壇,吸引咗約300名正反方人士到場[23],並在論壇上面就自身喺呢件事上嘅處理手段跪低,但最後都係堅持返問卷嘅理念同宗旨冇錯[15][23][24]。除咗咁之外,《中大學生報》編委亦先後出席討論呢單野嘅直播節目[25][26]

《中大學生報》2、3月號同網上版1、2月號響5月15號暫時評做「不雅」[6][16][27],這一消息令唔少網民發晒火,並以投訴返經典著作嘅方式還擊[9][16]。《明報》亦都因引咗《中大學生報》情色版嘅內容係報內討論,而喺5月22號評咗做不雅[16][28]。《中大學生報》編委響同校方傾完點跟進單野之後,向東區法院提出要覆核結果嘅要求[15]。《明報》響暫評不雅後都提出咗該要求,相關聆訊響7月6號展開。之後由於《中大學生報》嘅代表律師話淫審處嘅審理方式有違法定要求嘅程序,而將案件轉交俾高等法院審理[8][4]。高等法院喺下一年嘅10月21號判《中大學生報》同《明報》勝訴,收返個暫定評級,並且唔需要重新評級[4][29]。中大校方亦響相討之後決定唔會對任何涉事人士進行處分[14][30],不過中大就響高等法院判咗單案後,仍拒收返已發出嘅警告信[8][31]

事件背景[編輯]

中大學生報》係一份主要以中大學生為其客群嘅刊物。佢響2006年12月加設咗情色版,內容有齊各種性議題,入面包咗性故事、性觀念調查、性信箱等內容[7][32]

香港喺1987年開始就立咗條《淫褻及不雅物品管制條例》,規管返「內容屬於或含有淫褻或不雅成份(包括暴力、腐化或可厭嘅成份)嘅物品」,而當中有關淫褻或不雅物品嘅裁定則由審裁委員小組(入面包咗一名裁判官同兩名或以上嘅審裁委員)基於「社會上普通人接受嘅道德禮敎標準」等因素而作出。首次裁定之後會為嗰份物品暫定一個類別,之後俾5天時間遞交者,睇佢要唔要求覆核。被評為不雅嘅物品唔可以發佈俾18歲以下嘅人,並響發佈俾18歲以上嘅人個陣受到一定限制;被評為淫褻嘅物品則唔可以發布俾任何人。而條法例寫明,唔理知唔知某物品係咪不雅都好,只要某人真係有向18歲以下嘅人發佈此類物品,即已經犯咗法[6]

報章報導[編輯]

2007年5月6號,《星島日報》、《東方日報》、《明報》因收到中大神學院學生黃達威同馮子釗嘅報串,而響第二日嘅報章上狂駡《中大學生報》嘅內容唔道德同太過露骨,並借呢個位駡埋大學嘅道德教育做得唔好。不過中大代表會或《中大學生報》均冇係事前收到任何人嘅投訴。5月8號各大媒體都開始聚焦喺呢單野上面,視線則轉放咗響2007年2月號篇有關幻想同屋企人做愛同埋人獸交嘅問卷上[7][8][9][10]

爭議內容[編輯]

《星島日報》等報章起初喺到駡情色版內嘅性故事同問卷問題,話當中寫有女人嘅性幻想嘅內容唔道德,此外又係到插問卷內嘅問題,話佢「露骨」[32]。隨後嘅報章焦點轉放咗響2007年2月號嘅問卷問題上面[8]

2007年2月號嘅問卷包含咗14條有關性嘅問題,包括自慰時嘅性幻想、做愛時嘅感受[33]。當中又以有關亂倫同人獸交嘅問題最為激起社會輿論[8],因呢啲內容觸及到社會對性嘅禁忌[11]。佢問咗以下呢幾條問題:「你會唔會幻想過同阿爸阿媽兄弟姐妹做愛?(無論細個或而家都得!)」、(承上)「你有冇裝過佢地沖涼、換衫、自慰、做愛?」、「你最想同咩動物做愛?」,問卷結果就喺3月號上刊登[33][34]。2月號嘅執行編輯吳嘉倫話,呢啲題目由「班編輯共同諗出來,希望借呢個問卷了解學生對邊類性問題最有興趣」,另外其都回應咗性信箱嘅回答冇咩學術權威可言嘅批評,話性唔一定得專業人士先可分析[32]

參考[編輯]

  1. 劉子僑; 羅奕媚 (2017-08-28). "中大學生報十年浮沉". 中大五十年. 原先內容歸檔睇2019-07-12. 喺2019-07-12搵到. 
  2. 黃正軒 (2016-03-02). "聖母像變流行文化icon 巴西藝術家「聖褻瀆」二次創作". 香港01. 原先內容歸檔睇2019-07-07. 喺2019-07-07搵到. 
  3. 李偉儀 (2011). "不可公諸於世的性幻想 情性信箱與香港淫審現況考察". 編 甯應斌. 性地圖景:兩岸三地性/別氣候. 國立中央大學性/別研究室. 第 125–131頁. ISBN 978-986-02-9040-0. 
  4. 4.0 4.1 4.2 吳嘉倫 (2017-08-28). "情色版事件之法庭篇". 中大五十年. 原先內容歸檔睇2019-07-12. 喺2019-06-29搵到. 
  5. 香港女同學社; 曹文傑 (2009). "《淫褻及不雅物品管制條例》引發道德與自由的攻防戰" (PDF). 華人性權研究 (1): 16. 原先內容歸檔 (PDF)睇2019-06-29. 喺2019-06-29搵到. 
  6. 6.0 6.1 6.2 "第390章 《淫褻及不雅物品管制條例》". 電子版香港法例. 原先內容歸檔睇2018-09-30. 喺2019-06-28搵到. 
  7. 7.0 7.1 7.2 7.3 梁旭明 (2007). "論《中大學生報》情色版風波". 香港電台. 原先內容歸檔睇2014-09-11. 喺2019-06-28搵到. 
  8. 8.0 8.1 8.2 8.3 8.4 8.5 8.6 8.7 杜振豪. "從校園掀起的文化戰爭". 中大五十年. 原先內容歸檔睇2019-07-11. 喺2019-06-28搵到. 
  9. 9.0 9.1 9.2 9.3 9.4 9.5 9.6 9.7 "情色版事件簿". 中大學生報. 2008. 原先內容歸檔睇2019-07-11. 喺2019-06-28搵到. 
  10. 10.0 10.1 "中大學生報露骨談性". 明報. 2007-05-07. (原先內容喺2007-05-09歸檔). 
  11. 11.0 11.1 陳效能 (2011). "性與人性". 性通識:本性權利與道德爭議. 香港中文大學香港亞太研究所. 第 15頁. ISBN 978-962-441-589-6. 
  12. 黃康棋 (2007-05-16). "「學生報」談亂倫 香港中大爆爭議". TVBS新聞網. 原先內容歸檔睇2019-07-07. 喺2019-06-28搵到. 
  13. 13.0 13.1 梁美寶; 盧文烈 (2007-05-11). "勒令學生報停刊情色版 政府未審 校方先判 中大干預出版權". 蘋果日報. 原先內容歸檔睇2019-06-29. 喺2019-07-05搵到. 
  14. 14.0 14.1 "中大教務會學生紀律委員會就學生報事件的總結". 香港中文大學傳訊及公共關係處. 2008-03-20. 原先內容歸檔睇2019-07-12. 喺2019-06-28搵到. 
  15. 15.0 15.1 15.2 "中大學生報「情色版」風波事件". 香港獨立媒體. 2007-05-15. 原先內容歸檔睇2009-04-16. 喺2019-07-05搵到. 
  16. 16.0 16.1 16.2 16.3 16.4 "情色版事件時序表". 中大五十年. 2017-08-28. 原先內容歸檔睇2019-07-11. 喺2019-06-28搵到. 
  17. "中大學生報情色論壇「性,我們如何表述」——學生報代表回應傳媒提問 part2". YouTube. 2007-05-11. 喺2019-06-29搵到. 
  18. "各報對《學生報‧情色版》警告信問題的報導". 中文大學校友關注大學發展小組. 2008-03-17. 原先內容歸檔睇2008-10-13. 喺2019-06-28搵到. 
  19. "堅決反對校方不義裁決聲明". 中大五十年. 2017-08-28. 原先內容歸檔睇2019-07-11. 喺2019-06-28搵到. 
  20. "大膽內容列不雅 校長促學生反思 《中大學生報》暫緩出版". 太陽報. 2007-05-13. 原先內容歸檔睇2019-06-29. 喺2019-06-28搵到. 
  21. 中文大學校友關注大學發展小組 (2007-05-13). "關注組:關於中大學生報情色版事件的聲明". 香港獨立媒體網. 原先內容歸檔睇2009-04-14. 喺2019-06-29搵到. 
  22. 黃慧貞 (2010). "宗教、情慾、家庭在香港的政治糾結". 編 何春蕤. 連結性:兩岸三地性/別新局. 國立中央大學性/別研究室. 第 73頁. ISBN 978-986-02-4104-4. 
  23. 23.0 23.1 "街頭公開論壇 認有不足之處 編委灑淚:請原諒我們". 太陽報. 2007-05-12. 原先內容歸檔睇2019-06-29. 喺2019-06-29搵到. 
  24. 周淑蘭; 胡幗欣; 戴寶瑩; 曾錦雯 (2007-05-13). "「盼媽媽知道我們無錯」 兩期學報初評不雅 中大編委擬上訴". 明報. Yahoo!新聞. (原先內容喺2007-06-12歸檔). 喺2019-07-10搵到. 
  25. "城市論壇". 佛教沈香林紀念中學. 2007-05-17. 原先內容歸檔睇2019-06-30. 喺2019-06-30搵到. 
  26. "中大事件". YouTube. 2017-04-25. 喺2019-06-30搵到. 
  27. "《中大學生報》徵法律意見". 星島日報. Yahoo!新聞. 2007-05-14. (原先內容喺2007-06-18歸檔). 喺2019-07-10搵到. 
  28. "明報轉載情色版暫列不雅". 明報. Yahoo!新聞. 2007-05-23. (原先內容喺2007-10-09歸檔). 喺2019-06-29搵到. 
  29. "官指淫審處失當 情色版獲撤不雅 中大學生報、明報勝訴". 蘋果日報. 2008-10-22. 原先內容歸檔睇2019-06-30. 喺2019-06-30搵到. 
  30. "《中大學生報》平反 高院裁淫審處評級違例". 明報. 中文大學校友關注大學發展小組. 2008-10-21. 原先內容歸檔睇2009-02-11. 喺2019-07-11搵到. 
  31. "破壞王劉遵義破壞事件簿". 香港獨立媒體網. 2014-12-02. 原先內容歸檔睇2015-08-06. 喺2019-06-28搵到. 
  32. 32.0 32.1 32.2 "《中大學生報》炮製「情色版」". 星島日報. 2007-05-09. (原先內容喺2007-05-08歸檔). 
  33. 33.0 33.1 "情色版欄目選讀:2007年3月號". 中大五十年. 2016-07-20. 原先內容歸檔睇2019-07-11. 喺2019-06-28搵到. 
  34. "香港中大学生报纸刊登淫亵内容 总编拒绝道歉". 中国新闻网. 凤凰网. 2007-05-08. 原先內容歸檔睇2019-07-13. 喺2019-07-13搵到. 

睇埋[編輯]